Los repunantes na formación de la nación asturiana

Estimaos repunantes d'honor, repunantes numberarios y amigos y amigues en xeneral ya inclusive en capitán xeneral:

Un añu más cellebramos el nuesu Congresu Nacional que güei reunimos en La Pola, villa capital de Llaviana, conceyu que ye berciu d'illustes compatriotes, del qu'el menor nun ye, precisamente, el presidente Barbón. Por favor, de pies ya inclinatio capitis.

Podemos tar contentos del balance d'esti cursu pasáu. La nuesa asociación va medrando y, pesie a la nuesa particular idiosincrasia, dengún nun marchara nin fuere espulsáu, anque dalgún de los de la primera hora sigui cola so matraca de que cualisquier aconceyamientu en más al sur de Güerces, al és de Deva y al oés de Veriña ye cadiós y tenemos que disculpar la so ausencia otru añu.

Esti añu tamién mos dexara una bona noticia: los políticos asturianos van faciéndose más repunantes y menos maltomaos, que ye como dicir que más del espíritu de Bimenes y menos del espíritu del alcázar de Toledo, más d'Urraca que de Sabel II y más d'Álvaro Flórez que de Lola Flores. Paez ser que la oficialidá del asturiano ye posible ya yelo porque los amos del país paez que somatizaron tolo que yera mester somatizar ya entraron na destinización y na desjavierización, una vuelta desapaecíu el déspota y desmontada la vieya guardia del astursocialismu realmente esistente.

A ún tiempu, llegara una xeneración más culta, na qu'hai homes y muyeres que foran escolarizaos na so propia llingua, por más que parcialmente, y que sabe que se puede falar inglés falando asturianu a un tiempu, non como los paletos anteriores que pensaben qu'ata falaben español cuando falaben un mal asturiano con jota y xirigonza cheli aflamencada d'arrabal. Yeran, y son entá bastantes, los de "he venido de Madrid, he estao col jefe lestao,  díjome que les coses van dabuten y que tenemos que ponenos dacuerdu col empresariao...". Eso sí, cuando tan en Grao dicen que tan en Grado. Namás falta que nesta comedia que ye Larregión, escrita por Torcuato Fernández-Miranda, dirixía por Adolfo Suárez, con escenografía de Rafael Fernández y producción de Xuan Carlos de Borbón, unos faigan bien el papel que prometieron ya otros nun faigan mutis pel foro.

Nel presente añu esti vuesu Presidente Soberanu, como ye'l so vezu dende l'entamu, apúrrevos información valiosísima pal movimientu de la repunancia y, en xeneral, pa la patria. Trátase d'un documentu atopáu na biblioteca pública de Veracruz, conserváu ente archivos privaos de catedráticos, funcionarios, militares, cures, traficantes d'esclavos y capadores de carneros, un testu inéditu que me llegara por mediación de doña Pánfila de Huehuetenango y Ventanielles, amiga de la familia, que ye fía natural del obispu de Mondoñedo, esposa d'un prestoxosu bioquímicu espertu n'etanoles y, en selmanes alternes, amante del gobernador de Colorado.

Paso a dar llectura.

& & & & & & &

Documentu 666/n4 del archivu personal de Claudio Sánchez Albornoz.

Montevideo, 11 de febreru de 1949.

Tres llargues y llaborioses investigaciones que dieran como frutu llibros como Estampes de la vida en Llión hai mil años ya otres obres menores que me llevaron a preparar la entá nun asoleyada monumental historia sobro'l reinu d'Asturies como aniciu de la nación española, fuera faciendo anotaciones sobro una parte de lo qu'Unamuno llamara intrahistoria y fixando un corpus de lo que podría mañana ser un llibru sobro la impronta de los repunantes na formación d'aquel reinu altomedieval.

Años enantes de la proclamación de la nuesa república, visitara l'Ateneo de Madrid, que presidía precisamente Unamuno, onde tuvi amena charra con ésti y con Ortega, tando tamién presente Azaña, entóncenes secretariu de la Docta Casa. Espuse someramente les mios investigaciones y sometiérame a les sos sabies considerances. De tal reunión salí decidíu a paralizar pel momentu la espublización de los mios algames científicos, atendiendo a los sos conseyos.

Don José Ortega consideró que la tesis sobro los repunantes anteriores al reinu d'Asturies y la so influenza en tal fechu históricu ponía en custión la so tesis de qu'Asturies nun yera transitiva, lo que lu indispondría cola editorial Espasa y, lo que yera peor, someteríalu a entrugues embarazoses por parte de les marqueses coles que merendaba café y bizcochos con anís, que yera onde de verdá disfrutaba de prestixu y reconocimientu. 

Pela so parte, don Miguel nun vía nada bien qu'unes tierres verdes, montañoses y xabaces pudieran gozar del prestixu de la repunancia, pa mala imax de los maltomaos de les tierres llanes, ermes y de collor ceniza, asina como del sangre vertío por grandes caballeros y cristos velazqueños. Y, añadió qu'entá podría ser peor si la repunancia yera modelu consolidáu embaxo'l cetru d'Adefonso II, fíu de vascona, un pueblu por civilizar del qu'elli mesmu escapara como un volador pa residir n'académica palanca salmantina o salamanquesa.

Don Manuel Azaña nun tinía opinión porque elli yera más bien afrancesáu ya un poco masoncete, pero tinía na cabeza la idega d'una república integral pa España que podría vese perxudicada pola apaición d'un movimientu que trestocara'l tranquilu devenir de los sieclos hispanos. Pero como daquella nun pensaba pasar a la historia masque como ateneísta, cosa que pue ser cualisquier zoquete ya inclusive llegar, como elli, a secretariu, díxome: "don Claudio, vusté escriba, anque seya esquemáticamente, y yá veremos dientro d'unos años". Y siguiera esi conseyu.

Cuntien los cronicones más antigos qu'a les actuales Asturies llegara Tubal, un ñetu de Noé, que tuvo qu'abandonar les tierres de Mesopotamia por repunante, persiguíu polos sumerios y particularmente polos sacerdotes del maltomáu dios del so güelu, un tal Yaveh. Desembarcara nuna sablera a la que llamara Noya, n'honor del güelu que, al fin y al cabu, yera un ecoloxista que protexera a los animales d'una catástrofe, menos al cuervu, que dende entós pacá tuvo muncha manía a los semites. Asina comenzaba la historia d'Asturies, nación fundada por un indoariu mui repunante.

Hai datos que mos dan la sospecha de que cuando llegó Tubal había yá dalguna población, pequeña y mui dispersa, que pintaba nes cueves y comía munches llámpares, afogaínes con augua, sal ya herbes colocones, ata que, un tiempu dempués, inventaran el zythos y les llámpares taben muncho meyor. Paez ser qu'aquellos homes de les cueves yeran entá más repunantes que los indoarios y les muyeres más que los homes, colo que la cosa diera nuna civilización tan intratable que, en sieclos, naide nun quixo establecese ellí. Ata que llegaron los celtes que, de repunantes que yeran, acabaron apautando colos ñaturales y meciéndose con ellos pa dar nuna raza yá ultrarrepunante.

Colos romanos tóo entamó a cambiar. Yera un pueblu mui diferente, cerealeru, poco dáu a la caza, con lleis y tribunales, con abogaos y xueces, pero nun yeran mui mal tomaos y aceutaben cualisquier cosa siempres que se cumpliere colo llexislao. Foran los precursores d'una llarga tradición que llegara a los nuesos días: si nun te metes en política nun te va pasar nada. Ata podíen los indíxenes llegar a ciudadanos, que yera como tener el carné d'un economatu. Pues resulta que tampoco-ys gustara esto a los repunantes y entamaron les guerres asturcántabres contra Roma. Octavio, que nun yera tan maltomáu como'l so padrín Xulio pero que tampoco tinía la paciencia ente les sos virtúes, mandó llexones y llexones. Tardó años pero, al final, ganó la guerra y los repunantes tuvieron qu'abellugase nes montañes. Aparentaron tar quietos pero yá taben preparando armala otra vuelta cuantisque pudieren.

Los romanos estableciéronse riba tóo nel occidente, en castros de los pueblos vieyos cerca la costa y nos valles interiores nos qu'había mines d'oru. Esa distribución contribuera muncho al desendolcu d'una de les tradiciones que meyor conservaron los asturianos ata agora mesmo: la música. Los astures de la costa tiníen rellación colos albiones, una tribu mui repunante de les islles del norte, pero, coses de la mala pronunciación, llamábenlos albanos. Pola mesma razón, llamaben a los romanos rominos, de forma que, nes fiestes d´hermanamientu, solsticiales ya equinocciales, compitíen los astures colos grupos d'albanos y rominos, de los que garraron estilos llíricos ya un poco dulciplayos. Pela so banda, los astures del interior, conocíos como pésicos, llamaben a los romanos, porque tamién pronunciaben mal el llatín, ramones. De los ramones garraron dalgunos estilos musicales, con muncho de percusión y metal, dalgo minimalistes, con lletres cencielles y repetitives, enigmátiques y, delles vegaes, ensín xacíu aparente. Pero los romanos, tolerantes como yeren nestos asuntos, anque dexaron güelga, nun pudieron con aquellos repunantes y llegaran a nosotros cánticos y dances en nada influyíos polos albanorominos, anque sí un pocoñín polos ramones.

Al poco entraron dende África pela Bética los vándalos que dedicáronse, como diz el so nome, a quemalo ya esgoncialo tóo. Víen una basílica... basílica quemada, llegaben a un pueblu... pueblu baltáu, daben con cien oveyes... parrillada dende Egabra a Cartago. A les Asturies nun llegaron porque, aparte del pueblu repunante, pero dalgo romanizáu colo que yá había subraces dexeneraes, andaben pellí los suevos. 

Los suevos yera bona xente, pero mui diletante y poco dao a la engarradiella. A les primeres de conflictu dixebráronse en tres facciones que llevantaron tres divises bien estremaes: los d'impórtame un suevu, los de tócate los suevos y los de nun me toques los suevos. Los repunantes astures, entá mayoría nel oriente y nel suroccidente y non tanto nel nororiente por influenza de los albanorrominos, punxéronse del lláu de la tercera facción, la de nun me toques los suevos, qu'acabó siendo asimilada polos propios astures. La segunda, la de tócate los suevos, coló pal sur, pasando l'Esla;  y la primera, la d'impórtame un suevu, cruzara l'Eo y caminó haza'l finisterre.

Fartucos los romanos de Tarraco, de Hispalis y d'Emerita de pelear con unos ya otros, llamaron a los visigodos pa que fixeran de policíes. Estos godos sí que yeran maltomaos. Atacaron a los suevos y palmaron, atacaron a los astures y palmaron, atacaron a los vascones y palmaron. Yeran tan maltomaos que lo que más-ys prestaba yera pegase ente ellos, menos dos o tres años qu'apararon y decidieron zumba-ys a los romanos. Dempués d'echalos d'Hispania, volvieron pegase ente ellos, cosa qu'aprovecharon los árabes.

Los árabes yera xente que se llavaba muncho y perfumábase, que nun tomaba alcohol y que nun comía gochu. Cuando los repunantes del norte s'enteraron d'esos estremos decidieron que nanái. Los romanos y los suevos tovía, pero a estos taraos nin el pan y la sal. Y amás, cuando les muyeres, muncho más repunantes que los sos paisanos, como yá mencionamos, supieran qu'aquellos africanos yeren polígamos, la cosa yá taba más que fecha. La resistencia taba entamada y preparáronse por si los árabes llegaben a Asturies, cosa qu'entá nun taba claro. 

Rodrigo, el rei godu, un bon rapaz más rápidu cola bragueta que cola espada, presentó batalla nun llugar que dicen que ye un rigu y perdiera. Con elli diba'l so espatariu y amigu Pelayo. Unos dicen que yera d'Asturies ya otros que godu casáu con una asturiana, cuerda qu'amarra más que ser ñatural del país. El casu ye que Pelayo afuxó pal norte, crució los cordales y cayera na tierra de la vieya Vadinia, onde taben dalgunos de los pueblos más repunantes d'aquelles naciones bárbares. Cuando llegó nun lu tomaron en serio porque, ¿cómo diba ser de los suyos un puntu vistíu de godu y que se llamaba Pelayo, pelagicus, el de la mar en llatín?

Repunantes pero demócrates y asamblearios, los ñetos de los vadinienses llamaron a conceyu y les tribus sentáronse na gran piedra de Noega, convidaos polos ñetos de los cilúrnigos. Fora de xuru la reunión de mayor intensidá repunante de tola historia mundial. Aprovechando que xugaben en casa, los de Noega propunxeron a Pelayo como princeps, yá que conocía l'arte de la guerra moderna, conocía bien a los árabes, falaba llatín y godo y, tamién, yera prebáu repunante. Eso sí, desixeron que modificara'l so nome y pasare a llamase Playu. El caudiellu aceutó y xuró, y arrecibiera de manes del druida l'escudu blancu y bermeyu, les vieyes collores de los cilúrnigos que recordaben les piedres de la so cantera. Ellí, na campa de Noega, aquellos pueblos de fondera conocencia de metalurxa y calderería, armaron tropes que Playu llevó pal oriente, cuntando colos capitanes más repunantes de la nación y reclutando más homes y garrando caballos asigún avanzaben haza'l Seya. 

El restu de la historia ye conocía: abellugaos nel somatu de la diosa madre, los asturianos vencieron a los árabes, llevantando la cruz y la espada, tomando como divisa hoc signo tvetvr repunantivs, hoc signo vincitvr maltomatvs.

Dexo equí estos apuntes mientres sigo cola monumental historia del reinu d'Asturies, porque nun sé mui bien como filvanar esto cola teoría de los anicios de la nación española.

& & & & & & &

Esti ye'l documentu rescatáu de los archivos de La Huasteca veracruzana, que guardaremos con gran ciñu nel arcón de la repunancia, el nuesu custos arcani. 

Y asina finalizo la mio intervención, non ensín recordar a los repunantes cayíos n'actu de serviciu, que son tóos, porque el repunante asturianu muerre pola causa en cualisquiera circunstancia, yá seya tranquilino na cama, arrodiáu, como Manrique, de muyer, fios, ñetos, y parientes y criaos, nuna espicha soberbia o en dura batalla p'abrir el plásticu d'un abrefácile de xamón cocío del Alimerka.

Ante vos, en Llaviana y a tres díes del 25 de mayu, segunda fecha emblemática de l'Asturies soberana y repunante.

Dixe.