Nes llendes qu'abelluga'l caín
Abro esti blogue
desplicando el so títulu, Nes llendes
qu’abelluga’l caín. Hai yá bastantes años, a finales de los setenta, la
xente de Conceyu d’Asturies de Madrid organizamos un conciertu de Carlos
Rubiera nel salón del Centru Asturianu, qu’entós taba tovía nel palaciu de
Gaviria, al delláu de la Puerta del Sol. Anunciámoslu como ún representante del
Nuéu Canciu Astur, nel que figuraben, amás de Rubiera, Xulio Ramos, Calandreru,
Nuberu, Rafa Lorenzo, El Ñetu Celo Xuan, y tamién dalgunos que cantaben en castellán
como Daniel Vega o José Ramón Flórez. Tóos ellos cantaran dalguna vegada na
fiesta del 25 de mayu que, dende 1978, organizábamos na Casa de Campo nel
domengu más cercanu al día de la soberanía.
El casu ye que Carlos
Rubiera estrenara ellí el so Cantu a los llugones. El conciertu quedó grabáu
nuna casete d’aquelles y los de Conceyu daprendiéramosla de memoria. Yo sela
entera. Lo llamativo ye que Rubiera nunca la grabara en dengún discu, nun sé
por qué. Voi reproducila.
Entama a riscar
y pelos montes
surden los homes
a los castros onde tienen
el so llar,
a la vera aú pastia la bardial.
Nes sos llendes
qu’abelluga’l caín
tienen engarradielles col
vecín.
Tan en guerra,
tan en guerra.
Llugones d’anguaño,
dexái el llabor,
garrái los venablos,
sollertes al Sol.
Homes, la tierra ye
vuestra,
vuestra la secha’l sudor.
vuestra la sangre
mariella,
la llume que vos parió.
Vuestra, que reza nel
nome,
llugones, fíos del Sol.
Echái uñes al imperiu
que vos quier arremanar,
nunca dexéis que vos
prima
quien nun ye del vuestru
llar.
Morréi, si cuadra, na
guerra,
como muerre l’asturcón.
Homes, fierros y
caballos,
mentanto que nun seyáis
llibres.
llibres,
¡llibres!