"Asturies tinía la soberanía propia d'un estáu: moneda, defensa ya esteriores"

(RPA, 8-8-2018)

Monchi Álvarez: Otra vuelta tenemos con nós a David Rivas, profesor d’estructura económica n’Autónoma de Madrid, escritor, polemista incansable, col que vamos falar del Conseyu Soberanu d’Asturies y Llión. Igual a dalgunos puede sonái a chino pero a otros puede traéis recuerdos de tener nes manes unos billetinos bancarios emitíos pol Conseyu Soberanu. Bones tardes, profesor.

David M. Rivas: Bona tardi, amigu.

M.A.: El Conseyu Soberanu d’Asturies y Llión, ¿cómo naz y cuándo naz?

D.M.R.: Naz cuando, tres la cayía de Bilbao ya’l pactu de Santoña del gobiernu vascu colos fascistes italianos, el frente del norte ta, sinón condergáu definitivamente, sí que con enormes dificultaes pa sobrovivir. Asturies y Santander queden aisllaes del restu del tarrentoriu republicanu ya’l gobiernu de Xixón decide declarase soberanu y convertir el vieyu Conseyu Interprovincial d’Asturies y Llión en Conseyu Soberanu. Por eso caltienen el nome de Llión, anque la so xurisdicción abarcaba Asturies, menos la so parte más occidental y la capital, tomaes yá polos franquistes, y cuásique tola provincia de Santander. Fixéralo’l gobiernu por un principiu de responsabilidá, especialmente pa garantizar los abastecimientos y l’orde nel exércitu, que pasa a depender de Xixón y non de Valencia, onde taba’l gobiernu republicanu. Pero tamién se fixera por un principiu autonomista, custión de la que prestaríame falar dempués. Hai, n’actualidá, gran confusión ente l’autonomismu d’aquellos homes y d’aquelles organizaciones, ya inclusive hai autores que falen, directamente, de nacionalismu. Lo que ye verdá ye que l’estatutu d’autonomía asturianu taba nel Congresu de los Diputaos y qu’Asturies diba convertise na cuarta comunidá autónoma, tres Cataluña, Euskadi y Galicia. Pero col iniciu de la guerra tóo camudara y l’estatutu nun se pudo aprebar.

M.A.: Oseya, qu’el Conseyu Soberanu ye una tresformación del Conseyu Interprovincial.

D.M.R.: Sí, ye una evolución llóxica. Nestes denominaciones pesaron muncho les cadarmes previes de les organizaciones polítiques y sindicales. Por exemplu, la federación asturiana de la CNT yera dende los años venti Federación d’Asturies, Llión y Palencia, comprendiendo Asturies tamién a Santander y Llión tamién a Zamora. Ye dalgo que llama l’atención ver cómo los anarcosindicalistes consideraben como fronteres les de les antigües tierres de los ástures y los cántabros. Esto ye que, per baxo un discursu mui antinacionalista no político, tiníen mui asumía lo que llamaríamos la so nación primixenia. Nel anarquismu hai una llarga tradición d’entender la nación como una realidá histórica y cultural, pero non como un constructu políticu, que pa ellos eso namái que lo ye l’estáu. A eses coses me refiero yo cuando falo de la discusión ente rexonalismu, autonomismu, nacionalismu…

M.A.: Yera cuando Asturies y Llión caminaben xuntes, cosa que rompió más tarde. Porque nun taba mal esa idega de dir xuntos nuna autonomía. Tu entrugues a un llionés y, normalmente, responde que ta más identificáu con un asturianu que con un castellán.

D.M.R.: Eso ye evidente. Y na última encuesta que fixera’l CIS sobro la custión nacional, cuando fala de lo qu’en socioloxía denominen termómetru de los sentimientos, nel qu’estrema entre Llión y Castiella, los asturianos danse un 9, entre 1 y 10, a sigomesmos, un 7 a los llioneses y nun apreben a naide más, raspiando’l pase los gallegos y los vascos con un 4 y picu. L’autonomía de Castiella y Llión fora cosa de Martín Villa, un falanxista llionés. Tratábase de formar una rexón mui grande que amortiguare’l pesu de les periferies y, amás, que pudiera identificase col orixe teóricu de la unificación d’España. Pero, d’otra banda, hebo una llucha ente burguesíes llocales. Si Castiella yera autónoma, la so capital diba ser Burgos; y si Llión lo yera tamién, la so capital sedría Llión. Les fuerces vives de Valladolid vieron la so ocasión na propuesta de Martín Villa y ganaron. Lo mesmo fixeron les fuerces vives de Logroño y de Segovia, que pretendíen dixebrase del proyeutu, ya unes algamáronlo, dando orixe a La Rioxa, ya otres non. Pero caro que los llioneses preferíen dir con Asturies. Seguramente los asturianos nun tiníen tantu enfotu nello.

M.A.: Enantes falábamos de la moneda, porque equí emitiéranse billetes.

D.M.R.: Sí, que llevaben la firma de Belarmino Tomás y por eso la xente llamábalos belarminos. Muncha xente recordaralos. Seguramente poco xente los emplegara como mediu de pagu porque poques persones con diez años más o menos en 1937 siguirán nesti mundiu, pero munchos conociéranlos y dalgunos tendránlos tovía. Fuera terrible cuando Franco toma Asturies y suprime la moneda del Conseyu Soberanu y muches families quedaron ensín nada.

M.A.: Esi dineru yera papel moyao, yere como una collección de cromos.

D.M.R.: Asina fora, el gobiernu franquista nun autorizó dengún tipu de cambiu nin de convertibilidá. Yera un castigu más a los asturianos. Quien tinía perres nel bancu tovía pudo facer dalgún xuegu, pero los que lu teníen en casa, que yera lo normal porque la xente nun confiaba na banca naquelles condiciones de guerra y pensaba que lo mesmo lo necesitaba pa escapar o pa comprar favores, inclusive alimentos o melicines nel mercáu negro, quedárase con una arqueta enllena de billetes de monopoly. Los mios güelos maternos, por exemplu, tiníen l’equivalente pa comprar una casa. Por eso munchos asturianos de la mio edá y más xóvenes conociéramos los belarminos. Yo xugaba con ellos cuando neñu, y como yo cientos de neños más.

M.A.: ¿Y qué-y contaben a David Rivas los mayores, en casa, del Conseyu d’Asturies y Llión?

D.M.R.: Yo tuvi la suerte de que mio güelu maternu vivió munchos años y, amás, yá yera un home relativamente mayor cuando la guerra porque naciera en 1901. Tinía mui claros los recuerdos y, amás, participara en política, nel sindicalismu, dende los años venti. Elli falábame del gobiernu de la Casa Blanca, esa casa d’El Parchís que tien un estilu naval, que tien traces de barcu. Ellí taba la sei del gobiernu. Tamién la llamaben Casa de Belarmino Tomás, un nome que tal paez de casería, d’aldega. Pa mio güelu el Conseyu Soberanu yera’l gobiernu llexítimu y los conseyeros yeren los sos representantes. Evidentemente pa elli aquel gobiernu yera llexítimu porque asina lo decidieran previamente les organizaciones a les que pertenecía, aprebando qu’entraren nel conseyu miembros de la CNT y de la FAI. Un amigu suyu al que yo conociera yá nos setenta, Ramón Álvarez Palomo, yera el conseyeru de pesca en representación de la FAI. Tamién me contara, porque lo viviera de primera manu, qu’el Partido Comunista nun quería que se declararen soberanos y que punxo milicies n’El Parchís cola orde d’afusilar a los conseyeros si lo facíen. Nun llegaron a la situación del mayu de Barcelona, a tiros unos con otros, porque’l PCE viérase en minoría política y con una fuerza armada mui inferior y, al final, aceptó la decisión y participó nel gobiernu, salvándose la unidá de los republicanos.

M.A.: Hai unos minutos manexaba dos términos: autonomista y nacionalista. Esos dos términos qu’hai vegaes que se crucen y que paez que se fusionen, ¿por qué los manexa David Rivas falando del Conseyu Soberanu d’Asturies y Llión?

D.M.R.: L’autonomismu yera una corriente que taba presente na sociedá asturiana desde décades atrás y fueron autores y políticos tradicionalistes, lliberales y reformistes los que lo impulsaron. Tamién parte del republicanismu, el que vinía de Pí i Margall, lo llevaba como bandera. Cuando la república, n’Asturies yeran autonomistes los reformistes de Melquiades Álvarez y la mayor parte d’Izquierda Republicana. La izquierda nun lo tinía tan claro, pero’l PSOE tinía una estructura interna federal, lo mesmo que la CNT, colo qu’entendíen la custión ensín grandes problemes. Nel fondu, como dicíamos, yera la organización más historicista, por cuanto la so federación abarcaba Asturies, Llión, Zamora, Santander y Palencia. Contra l’autonomía y contra cualisquier descentralización taben les dreches qu’acabaron formando la CEDA, los comunistes y, evidentemente, los fascistes. Eso quier dicir que, sacantes el PCE, toles fuerces en presencia del conseyu yeren favoratibles al autonomismu. La cuestión nacionalista ye cosa distinta. Hai agora una llectura de l’Asturies de los años trenta qu’incide nun plantegamientu de calter nacionalista, entamando pola mesma revolución del 34 y, riba tóo, pasando pol Conseyu Soberanu. Ye una visión minoritaria pero non por eso despreciable y con argumentarios dignos de tenese en cuenta. La mayoría d’autores refuguen esa razón, basándose en que, si miramos los documentos de la época, dengún personax d’importancia nin denguna organización fala en términos nacionalistes sobro la realidá d’Asturies, anque hai dalgún artículu d’Eleuterio Quintanilla que güei podría espublizase n’Infoasturies ensín desentonar de la llínia xeneral d’esi dixital. Pero, ya yo pienso qu’equí ta la custión, nun fae falta que revindiques la consideración d’Asturies como nación o que te definas como nacionalista pa que nun dexes de tener comportamientos y polítiques nacionales. Lo mesmo que, a la inversa, puedes definite como lliberal y ser un fascista de llibru, como vemos nel presente. Si llámate lliberal nun evita que nun lo seyas, ¿por qué nun llámate nacionalista nun va evitar que sigas polítiques nacionalistes? Los actores d’aquellos años respondieron a un fechu nacional, un fechu diferencial que yá arranca de primeros del XIX, col 25 de mayu de 1808 como gumial, que sigui nel XX, españando en 1934 y que tién otru culmen en 1937. Pensemos nel 34. Obreros organizaos habíalos en Vizcaya, en Barcelona… ¿por qué namás Asturies? En parte, ya ehí alcontramos una primer razón pa pescanciar l’añoriciu de la clas trabayadora al nacionalismu nominal, ye que lo mesmo nel País Vascu qu’en Cataluña hai una potente burguesía nacionalista cola que nun quieren collaborar. N’Asturies esa burguesía nun esiste y, polo tanto, son los socialistes y los anarquistes los que representen a la nación, ensín necesidá de definiciones polítiques ad hoc. Son, cenciellamente, asturianos y, la mayoría, obreros. Pero vamos dar otru pasu: el Conseyu Soberanu desixe al gobiernu republicanu que-y mande armes pa “defender la nuesa tierra, que abonda sangre vertiéramos nosotros defendiendo otres”. Como nun tién rempuesta de Valencia, el conseyu unvía representantes a Xinebra pa pedir abellugu a la Sociedá de Naciones. Ye lo mesmo que la Xunta Xeneral fixera en 1808, cuando unviara a Toreno a Llondres pa firmar una alcordada con Inglaterra. Si mandar embaxadores a Xinebra nun ye un actu d’autodeterminación, que me digan a min los politólogos qué ye un actu d’autodeterminación. Les tres característiques básiques d’un estáu soberanu son la defensa, l’alcuñu de moneda y la política esterior. Les tres les tinía Asturies nesa dómina.  

M.A.: Pasen los años y llegamos a los setenta, col gobiernu preautonómicu, y volvemos buscar nome pa esta tierra. Ente 1979 y 1982 embaráxense cuatro nomes: Principáu d’Asturies, el que quedó definitivamente, Xunta Xeneral, que quedó pal parllamentu, Conseyu Rexonal y el nome cenciellu d’Asturies, que ye’l que plantega el PCE y que queda en solitario.

D.M.R.: Ye evidente que ye’l PCE el que tinía la razón. Nun tamos yá nel mesmu PCE de los trenta, que taría opuestu, non a un nome o a otru, sinón a la más simplona descentralización alministrativa. La transición nun namás yera xeneral dende los años sesenta del desarrollismu, sinón tamién otra particular nel interior de los partíos, qu’entamen a entender les custiones nacionales, con dificultaes y meyor nunos sitios que notros. El PSUC, por exemplo, pescanciáralo bien ceo, al Partíu Comunista d’Euskadi costói un poco más, los gallegos nun lo entendieron mui bien pero llegaron y los asturianos nun lo entendieron nunca pero acabaron por tragar con ello. El nome col que se quedaron, el de Principáu d’Asturies, ye’l más infame.

M.A.: El más infame.

D.M.R.: Sí. Ye asumir como nome del to país el que provién d’una humillación. Muncho xente piensa que somos un principáu por privilexu real, cuando ye tolo contrario. Asturies ye principáu como castigu de los reis de Castiella y que más lluéu caltuvieron los reis d’España. Como los asturianos yeren llevantiscos y, amás, como cuásique tóos yeran fidalgos, nun pagaben impuestos, copiando del modelu de Gales, el modelu col que la corona inglesa humilló a los galeses, la corona castellana enayenó Asturies al heriede de la mesma. Nun tenemos un príncipe, agora una princesa, por privilexu sinón pola humillación a la que mos sometieran los reis de la casa de Trastamara, que tamién yeran de la casa de Lancaster y d’ehi daprendieron el casu de Gales.

M.A.: Pues agora somos principáu. Eso sí, con autobuses gratis pa dir ver a los reis.

D.M.R.: Yo casi prefiero volver ser Provincia de Oviedo.

M.A.: ¿Provincia de Oviedo? Eso queda mui antiguo…

D.M.R.: Provincia ye como llamaben los romanos a les naciones vencíes. Provincia significa la que fuera vencía. Ya eso, nel nuesu casu, ye una realidá.

M.A.: A min gústame lo de País Astur.

D.M.R.: Sí, yá lo sé, siempres-y lo siendo dicir.

M.A.: Munches gracies, David Rivas, poles sos reflexones, siempres atinaes y cuásique siempres provocadores, porque provoquen, porque faen pensar por ún mesmu.

D.M.R.: Gracies a vusté por convídame otra vegada a esta radiu pública asturiana.