"Flórez Estrada ye'l gran economista de la historia d'Asturies"

(RPA, 6-11-2018)

Alejandro Fonseca: Segunda hora del programa y vamos dar una vueltina pela historia con David Rivas, profesor d’economía, escritor, un llibrepensador.

Monchi Álvarez: Un amigu del programa, un bon amigu. Bones tardes.

David M. Rivas: Bona tardi, amigos. Contentu, como siempres, de tar con vustedes.

A.F.: Vamos falar d’un asturianu illustre: Álvaro Flórez Estrada, economista como David Rivas.

D.M.R.: Y con más coses en común.

M.A.: Políticu, tamién como David Rivas.

D.M.R.: Ye economista, ye políticu, anque a min lo de la política nun me saliera mui bien. Bono, la verdá ye que me saliera la cosa cuásique tan mal como a elli, que la verdá ye que llogró poques coses de les que quería. Compartimos tamién otres perversiones, como l’anglofilia. De fechu, de tolos illustraos asturianos, ye l’anglófilu. Siendo como yera’l más radical de tóos, almira’l parllamentarismu británicu y tien más simpatía pola revolución norteamericana que pola francesa. Cuando cellebramos el so aniversariu hai un par d’años, convidáronme a un debate que resultó bien interesante na so casa de La Pola, nel conceyu de Somiedu. Ellí colgaran un retratu del illustráu, obra del pintor Santarrua, mui simbólicu. Ye un retratu d’esos tipu renacentista o neoclásicu nos que ta’l protagonista en primer planu y de paisax fonderu dalgo que pa elli fora representativo. Pues vese al economista somedán, recreando Santarrua’l so retratu que ta nel Muséu de Belles Artes d’Asturies, fechu por un pintor inglés del que nun sabemos el nome. El pintor carreñanu amosa un Flórez ente llibros ya escribiendo, con una vela ya un compás enrriba la mesa y, al fondu, el parllamentu británicu.

M.A.: ¡Ai, esa anglofilia…! Pero vusté nun fuera tesoreru xeneral del reinu.

A.F.: Pel momentu.

M.A.: Tóo s’andará…

D.M.R.: Non, yo a lo más que llegara fue a secretariu del Ateneo de Madrid.

A.F.: Que nun ta nada mal.

D.M.R.: Voi contar una anécdota mui significativa sobro Flórez Estada. Tolos años, como actividá a los mios estudiantes póngo-ys dos llabores de fin de cursu, que faen en grupos d’a cuatru: un trabayu escritu sobro cómo un país concretu respondiera a la recesión d’estos tiempos ya una esposición verbal sobro’l pensamientu d’un economista. Como teo siete grupos ente economía, empresa, drechu y polítiques, igual acaben falando de trenta o cuarenta teóricos de la economía. Como yo siempres barro pa casa pongo sobro la mesa tol lliberalismu asturianu: Campillo, Xovellanos, Flórez Estrada, Canga Argüelles, Mon… Una vegada entrugué, enantes de que entraran a estudialos, si los conocíen. Xovellanos sonaba a tol mundiu, pero de Flórez Estrada namái que supo una neña: “debe ser un economista asturianu porque tien una cai n’Uviéu”. La rapaza brañaba n’Asturies porque una güela, lluéu tuvimos falando, yera de Coceña, nel conceyu de Colunga. El casu ye que l’estudiante que primero intervino nel grupu de Flórez Estrada entamó diciendo, más o menos, esto: “tenemos que dicir que tamos avergonzaos por nun conocer a esti personax”. Flórez Estrada naz en La Pola, nel conceyu de Somiedu, y va estudiar a Oxford. Nun llega conocer a Smith pero ye siguidor del profesor escocés. Sí que conoz a Ricardo, del que ye discípulu, ya ye amigu personal de John Stuart Mill. Tamién traduz al español parte de la obra de Smith.

M.A.: Vaya, que ye un economista d’altor.

D.M.R.: Ye’l gran economista asturianu, con muncho más talla que los demás. Y foran munchos los economistes asturianos ente los sieclos XVIII y XIX. Ta mui perriba de Campillo, de Canga Argüelles, de Campumanes, ata de Xovellanos. Falo de talla teórico. De xuru que Xovellanos tién muncha más importancia na política económica, nel día a día de la xestión. Xovellanos, pesie a los malos tragos que pasara, yera un home más moderáu, tamién más vieyu. Ente tar en Bellver, nun encarcelamientu tampoco tarrecible, como lo podemos lleer nos sos mesmos escritos, y tener que dir al esiliu con tres condergues a muerte hai diferencia. Pero, centrándomos no económico, na teoría económica, Flórez Estrada ye, con diferencia, el más importante. Lo que tuvo Xovellanos fue, como diz el profesor Pepe Alba, somedán como Flórez, meyor xefe de prensa, meyores publicistes.

A.F.: ¿Tamién ye más importante políticamente?

D.M.R.: Eso ye más relativo porque depende de cómo entendamos eso de político, si dende lo ideolóxico o de lo alministrativo. Xovellanos ye muncho más importante dende un puntu vista alministrativu, como Mon, tiempu dempués, sedrá perimportante na práctica facendística, cola primera gran reforma fiscal de la historia d’España. Pero, dende un plantegamientu políticu como ideolóxicu, Flórez tien tamién un valor políticu grande. En 1808, cuando Asturies proclama la so soberanía y declara la guerra a Francia, quien preside la Xunta Xeneral ye Flórez Estrada. Nesos díes escribe que “la llucha contra l’invasor nun tien xacíu si nun ye a un tiempu una revolución política”. Pa elli, que los amos foran los borbones o Napoleón yera indiferente. El so gobiernu llama a les armes a villes y conceyos y recluta un exércitu, al tiempu qu’unvía a Toreno a solicitar una alcordada con Inglaterra. El conde de Toreno aconceya na cámara los lores, qu’aceuta les condiciones y los comunes apreben mandar tropes al mandu de Wellington. Flórez ye un personax mui interesante. Ye un protorrepublicanu, tamién un protosocialista, ye’l lliberal más avanzáu de tola camada de lliberales que diera aquella Asturies… Ya ye un home pa mín mui importante porque sabe enllazar la modernidá cola tradición. Y vémoslo nun asuntu de vital importancia. Cuando llega la desamortización, de xuru que la política económica más importante de la dómina, Flórez Estrada, que defende la desamortización, considera que la tierra nun ye privatizable, que la tierra ye comunal, anque pueda ser usada privadamente.

A.F.: ¿Pero nun dicía enantes que yeral lliberal?

D.M.R.: Yera un lliberal, de la llínia de Mill. Lo que pasa ye que cabalgamos sobro etiquetes y la esquierda en xeneral y la drecha n’España diéranmos n’heredá una visión del lliberalismu propia de los que nunca lleeron a los clásicos lliberales. Quedaron colo más pedestre de la so teoría económica, que yera más descriptiva que prescriptiva, más positiva que normativa, per otru lláu. Y agora andamos col neolliberalismu… Y, miren si tan tochos dalgunos, que llamen lliberales a los mesmos que llamen fascistes. Elli ye favoratible a la desamortización pero contrariu a que les tierres se-ys quiten a la ilesia y a los conceyos pa que les compren de saldu los burgueses. Lo qu’entóncenes plantega ye que les tierres puedan ser esplotaes individualmente por families campesines pagando un canon a la comunidá. Equí avérase a la fisiocracia francesa, a la escuela de Versalles, a la que tamién taba averáu Xovellanos. Lo que plantega Flórez Estrada ye qu’el propietariu cobre un tanto durante los años de la esplotación media, cobru que podía ser n’especie. La pumarada, por exemplu, sedría de 35 años. Munchos autores ven nesto un avance haza posiciones socialistes o a nueves visiones del mercáu, cuando la verdá ye que Flórez Estrada ta plantegando dalgo que cualisquier asturianu anterior a la guerra civil reconocería: el foru y la mampostería. Yera dalgo tan vieyo como la enfiteusis de la baxa edá media, que n’Asturies conservose ata los cincuenta del sieclu XX. Yo mesmu, afitándome nel drechu consuetudinariu, teo tierres con contratos enfitéuticos. Otra custión importante de Flórez ye la so oposición al proteccionismu catalán porque taba afogando a Cuba y diz qu’esa política lleva a Cuba dafechamente a la independencia. Elli conocía perbién la esperiencia nortiamericana, la qu’impulsaran lliberales de la so llínia, como Jefferson. Nun debemos escaecer qu’el procesu independentista nortiamericanu surde por un problema fiscal: pagaben impuestos y nun tiníen drechos ellectorales. El glayíu fora “no taxation without representation”. Eso pasaba en Cuba. Flórez Estrada ye un gran almiraor de la revolución americana. Agora, como naide nun sabe nada, nin tansiquier profesores como Pablo Iglesias, que bien amosara la so ignorancia públicamente, escaeciéramos que la revolución de los Estaos Uníos ye de 1765 y la de Francia de 1789. ¡Cuásique un cuartu sieclu enantes! Y Flórez Estrada ye un observador y analista con gran visión. Ye más, Marx, un gran tramposu que cuásique nunca cita, na so Contribución a la crítica de la economía política, tién un párrafu copiáu lliteralmente de Flórez Estrada. 

A.F.: Como si fora suyo.

D.M.R.: Sí, onde fala de Cuba y de la política monetaria tres la cris de la plata y cuando la primer repatriación de los capitales americanos a España de dos o tres décades enantes. Lleí a dalgún autor qu’esi párrafu del que falo ta nel Tratáu d’economía política de Flórez Estrada. A min estrañárame. Nun diba ser tan tontu Marx de copiar ensín citar d’un llibru estudiáu durante un sieclu nuna montonera d’universidaes. Tuvi la humorada de peñerar testos y resulta que ye de la obra Efeutos producíos n’Europa pola baxa na producción de les mines de plata, qu’alcontré nun llibru n’inglés nel que tamién ta’l testu Desamen de la cris comercial d’Inglaterra. Porque l’asturianu ye, seguramente, el primer economista que plantega una teoría monetaria, un sieclu enantes de qu’esistiera na tradición anglosaxona.

M.A.: ¡Marx copió a Flórez Estrada! Como diría Ana Rosa Quintana, sedría un homenax…

D.M.R.: Tamién ye verdá que si te copia Marx, ún de les meyores cabeces de la historia, diz muncho de ti, anque’l mui manguán nun te cite.

A.F.: Total, qu’Álvaro Flórez Estrada ye ún de los grandes desconocíos.

D.M.R.: Pudo ser entá más importante. Participó nes cortes de Cádiz nes primeres sesiones pero non na redacción de la constitución, lo que fuera bona pena porque plantegaba recortar los poderes al rei, quitar competencies educatives a la ilesia, suprimir completamente la inquisición, sin xurisdicción nin tan siquier eclesiástica, promulgar el sufraxu universal… Por tóo eso se lu considera un protorrepublicanu. Por eses idegues y pola so filiación masónica tien qu’afuxir a Inglaterra en 1814, cuando vuelve Fernando VII y lu conderga a muerte. De fechu, sofita el pronunciamientu del so compatriota Riego y acaba acumulando tres condergues a muerte por parte de Fernando VII. Tien que marchar al esiliu y vuelve a Llondres, onde ye recibíu y aidáu por antiguos compañeros y profesores de la universidá. A día de güei y dende van cuásique doscientos años n’Oxford hai una Florez-Estrada Classroom. Na Universidá d’Uviéu nun la tuvo ata 2015. Y denguna otra universidá española recuerda al gran economista lliberal ya illustráu. Equí, como dicía avergoñáu aquel alumnu míu, nun sabemos quién ye.

A.F.: Tampoco quedara vivu na memoria política, a lo que paez. ¿Va resultar l’escaezu ún de los rasgos de tolos asturianos illustres?

D.M.R.: Ye un rasgu de l’Asturies de güei escaecer a los sos meyores fíos. Ye cosa que vien de dempués de la guerra civil y de la conversión de la Universidá d’Uviéu, que pasa de ser centru intellectual de referencia europea y llatinoamericana a lo más provinciano y servil, caspa de la que ta saliendo pocos años depacá. De tol lliberalismu del XVIII-XIX namás que Xovellanos ye reconocíu y tamién Mon, pero esti más en círculos especializaos, facendísticos especialmente. Xovellanos tuvo grandes paladines dempués de la guerra, como José Caso y la propia familia Xovellanos, que sigui esistiendo y con dalgunos bonos intellectuales. El xornal El Comercio tamién fixo grandes campañes xovellanistes. El mesmu ayuntamientu de Xixón, tanto nel franquismu como na democracia, lu revindicó constantemente. Por embargo, l’ayuntamientu de Somiedu nunca quixo saber nada del so fíu más illustre ata’l 250 aniversariu del so nacimientu, yá en 2015, y de mala gana y cuerriendo porque víen que nun salíen na televisión y que nun podíen meter la cuyar nunos actos programaos por otros. Tamién revindicaron a Xovellanos dalgunos políticos de la transición, normalmente de la drecha, como Agustín Antuña o Álvarez-Cascos. Flórez Estrada yera una figura más incómoda, más difícile d’asimilar pol franquismu y por una universidá dominada por falanxistes. Tampoco interesó a los profesores del PCE, fonderamente antilliberales, anque munchos son d’esos que nunca vieran un llibru d’un lliberal clásicu. D’estos autores, historiadores polo xeneral, heredamos interpretaciones infumables, cuando non falses directamente, sobro la historia d’Asturies.

A.F.: Nun vamos poner nomes propios, pero paez evidente a quienes se refier el profesor David Rivas.

D.M.R.: Supongo que nun ye necesario. Pero ye que, volviendo a Flórez Estrada, alcontramos munches otres coses llamatives. Nun sé si se recuerden de les primeres páxines de Los miserables. Víctor Hugo rellata l’entamu de la rebelión nuna manifestación con motivu d’un intierru qu’acaba nun grave episodiu de represión. Nel llibru fálase de los oradores del mitín. Pues ún d’ellos yera Flórez Estrada. Falamos del cortexu fúnebre del xeneral Lamarque, un ídolu del lliberalismu más radical, un republicanu opuestu a Luis Felipe. Tamos en 1831. Esti episodiu desplícalu perbién Juan Uría Riu nun artículu espublizáu n’Archivum. Na ponte d’Austerlitz toma la pallabra otru lliberal de la mesma triba, tamién militar, el xeneral Lafayette, y da la pallabra o dos o tres convidaos. Ún d’ellos ye Flórez Estrada, qu’arremete contra la Santa Allianza y contra Fernando VII. La xente entama dar vives a la república y la temperatura va xubiendo. Les tropes del gobiernu carguen y acaba la cosa con unos doscientos muertos ya unos quinientos firíos. Ehí arranca la rebelión que narra Victor Hugo na so novela.

M.A.: Y volvió p’Asturies.

D.M.R.: Pero unos años dempués. Dende 1823, tres la execución de Riego y la entrada de les tropes borbóniques franceses pa sofitar a Fernando VII, los llamaos Cien mil fíos de san Lluis, ata 1833, l’absolutismu imperó n’España. Ye lo que la historia rexistra como década ominosa. Fue cuando fuera condergáu a muerte otres dos vegaes. Volviera d’Inglaterra cuando muerre el sátrapa y va representar a Asturies dende 1834 ata 1840. Quixeron presentalu pola Universidá, que tinía más prestixu y más asignación económica, pero siempres prefiriera representar a “los mios paisanos, al mio país”. Senador vitaliciu dende 1846 y con 87 años decide dir a morrer a Somiedu, pero nun llega y fina nel palaciu de Miraflores, en Noreña. Tamos en 1853. Ellí ta, nuna fosa común del cementeriu. Hai una placa que lu recuerda. Ellí, ente güesos de decenes de persones tan los del, pa min, meyor economista que diera esta tierra ya’l primer presidente d’Asturies, entendiéndola como una nación moderna.

M.A.: Tinía razón el so alumnu: ¿cómo ye que nun sabemos nada de Flórez Estrada?

D.M.R.: Yá lo comentábamos enantes. Y si’l desconocimientu sólo afleutara a Flórez Estrada entá podíamos dalo por bono. El desconocimientu de la propia historia ye una enfermedá n’Asturies y de xuru que tamién d’otros países. Volviendo a la universidá: fuera de círculos mui cultos, ¿dalguién sabe lo que significara’l Grupu d’Uviéu o la Estensión Universitaria? Pero ye que nin nes facultaes d’economía españoles saben de Germán Bernacer, por exemplu. Puede que nun sepan d’elli nin tansiquier nel Alicante onde naciera, siendo l’economista qu’esbozó la teoría de la demanda agregada enantes que Keynes. Y asina podríamos falar de munches coses y de munches persones. Eso sí, a paradoxes nun mos gana naide. Como nesti reinu de los nuesos esmolecimientos tóo ye raro, por nun dicir esperpéntico, nel meyor sentíu valleinclanescu, cuásique l’únicu homenax que tuvo Flórez Estrada fixéralu la dictadura de Franco en 1946, en plena posguerra, cuando emitiera un billete de 25 pesetes col so retratu nel anversu y la so casona de La Pola nel reversu.

A.F.: Dimos una vuelta pela historia con Álvaro Flórez Estrada. Gracies a David Rivas, que diz que ye economista, pero creyemos qu’eso, siendo cierto, nun lo ye sólo. Sí que ye un bon home de radio porque mos fae pasar grandes minutos.

D.M.R.: Gracies a vustedes. Préstenme estos alderiques. A min gústame muncho falar y d’estes coses más tovía.

M.A.: Seguimos en contactu pero, por favor, ¡responda al teléfonu!

D.M.R.: Ye que lu teo fechu una llaceria. Teo un teléfonu qu’un neñu de doce años nun querría.