"Pedro Menéndez d'Avilés diseñara técicamente'l primer campu de concentracion"

(RPA, 19-2-2019)

Alejandro Fonseca: Segunda hora del programa y vamos dar una vueltina pela historia con David Rivas, profesor d’economía, escritor, un llibrepensador d’esos que piensen n’alto y nun tien miéu a la controversia, nin tansiquier a enquivocase.

Monchi Álvarez: Otra tardi con nós un bon amigu del programa. Bones tardes, ¿cómo andamos?

David M. Rivas: Bona tardi, amigos. Pues toi mui bien y contentu, como siempres, de tar con vustedes. Y sí, ye verdá que nun teo miéu a enquivocame y nun me guardo. Güei mesmu voi reconocer un erru que llevo arrastrando dende hai tiempu.

A.F.: ¡Nun me diga! A propuesta del profesor Rivas vamos falar d’un asturianu illustre, Pedro Menéndez d’Avilés, l’adelantáu, ún más, porque hebo varios.

D.M.R.: Voi empezar diciendo que yo nun soi especialista en Pedro Menéndez d’Avilés, anque conozo bien la so historia, como la d’otros asturianos que dexaron la so güelga na historia. Agora, como tamos nel quinxentésimu del so nacimientu, que fora tal día como güei de 1519, tol mundiu paez saber del adelantáu de La Florida.

M.A.: ¿Quinxentésimu? Eso nun lo diz naide. Esti David Rivas ye mundial.

D.M.R.: Ye que los cardinales tan escaecíos, como los partitivos. Toudiós confunde onceavu con undécimu… Cuando se cellebren quinientos años tamos nel quinxentésimu.

A.F.: Ser precisu na llingua ye importante. Sigamos falando del avilesín más conocíu.

D.M.R.: Contra lo que podría paecer, ye una figura poco conocía. De fechu, durante muncho, namái que tuviéramos el llibru de Ciriaco Miguel Vigil de 1892, respublizáu en 1987. Dempués hebo otru de Constantino Bayle en 1928. Y para de contar. Porembargo nos Estaos Uníos trataron más de Pedro Menéndez. Que yo me recuerde, hai un llibru de Jeannet Connor de los sesenta basáu nun manuscritu de Gonzalo Solís de Merás de 1923, y otros de Roberts y de Thompson d’hai venti o trenta años. Acaba d’espublizase un llibru más, ésti sí n’español, dicen que definitivu, Pedro Menendez d’Avilés, señor de la mar, adelantáu de La Florida, d’Antonio Fernández Toraño. Nun lu tuve entá nes manes.

A.F.: ¿Yera l’adelantáu porque, como diz Marcos Busto, llegó a América un añu enantes que Colón?

M.A.: Non, ho, yera un títulu que-ys daben.

D.M.R.: Yo creyo que yera un adelantáu porque Avilés de siempres fora una villa mui adelantada.

M.A.: ¡Esti David Rivas ye un crack, un fenómenu!

D.M.R.: Yo nun conozo de la historia de Pedro Menéndez masque lo que cualisquier persona un poco culta, pero soi a dar unes cuantes pincelaes. Ñaz esi 19 de febreru n’Avilés, nel bierzu duna familia de poco acomodu. Como tien que buscar sustentu y ye dau a la mar, a los 14 años entra de grumete n’armada que defende les costes cantábriques. Cuando tien 30, Maximiliano II da-y patente de corsu y más lluéu Carlos I lo mesmo, pero esta vegada no que llamaben carrera de les Indies, lo que lu lleva a Canaries y dempués al Caribe. Los ingleses conocíenlu como the asturian pirate, mui renomáu porque derrotó en batalla naval al famosu Jambe de Bois, Patapalu, el corsariu que sirviera primero a Francia y dempués a Inglaterra nos mares d’América’l Norte. Yera François Le Clerc, un protestante de Normandía. Poco dempués Felipe II noma al marín asturianu capitán xeneral de carrera y, como tal, marcha pa Flandes. Al poco marcha pa La Florida ya en tres menses acaba cola presencia francesa naquelles tierres. Felipe II tinía en gran estima a Pedro Menéndez. La confianza de Felipe II en Pedro d’Avilés yera tanta que lu acompangó a Inglaterra cuando’l rei casara con María Tudor. Ye más, unos años dempués, secretamente, llevó, por orde del rei, a la princesa d’Éboli a Calais. Un galernazu obligó a Menéndez a entrar d’arribada nel puertu inglés de Dartmouth. L’alcalde la villa nun quiso permitir l’atraque del asturian pirate y peslló con cadenes la bocana. L’avilesín echó un bote, desembarcó y, personalmente, franció les cadenes. Entró na ciudá y, cuenten los ingleses, naide nun saliera a la cai. Felipe II noma a Pedro d’Avilés gobernador de Cuba. Pero ta poco tiempu porque’l rei llámalu pa qu’encadarme una armada pa defender la rexón d’Amberes. Munchos piensen que, nel fondu, lo que Felipe II tramaba yera la invasión d’Inglaterra dende Flandes, pa lo que contaba cola mayestría del avilesín. Poco sabemos más. El 9 se setiembre de 1574 salió mandando la nave capitana de l’armada española dende Santander, no que dalgunos ven un ensayu del ataque a Inglaterra de 1588, el de l’armada invencible, pero un tifus exantemáticu matolu na mesma bahía y morriera’l día 17.

M.A.: Yá tenemos encuadráu a Pedro Menéndez.

D.M.R.: Ya equí vien lo del erru que-ys dicía enantes. Yo pensaba, nun sé por qué, que participara na conquista de Tenerife, cosa imposible porque ñaciera enforma dempués de la conquista del menceyatu d’Anaga. Esi ye l’erru del que-ys falaba al entamar.

A.F.: ¿Por qué esa confusión?

D.M.R.: Nun sé, pero igual entemeciera sensaciones y fechos históricos. El conquistador de Tenerife, tres una derrota brutal de los castellanos a manes de los guanches en Acentejo, fora Alonso Méndez de Lugo, que mandaba tropes compuestes en bona midía por gallegos y asturianos, los soldaos más fieros de la corona de Castiella, asigún diz Maldonado, entós gobernador de Canaria. Si un día tienen ocasión, pongan el discu de Los Sabandeños La cantanta del mencey loco, que trata de la resistencia de Benearo, el mencey d’Anaga, la última tierra que los guanches conservaron, nel nordés de la islla. La mio segunda muyer yera d’ellí y percorriera con ella tola xeografía de la resistencia y la conquista. Hai un corte del discu onde sentimos una carga de les tropes de Méndez de Lugo contra un grupu de guanches que van desarmaos. Y hai un tal Domingo de Barrios que los reta con insultos, y faelo con una tonada, con una tonada asturiana. Llamárame l’atención. Tuvi la suerte de conocer, pola familia de la muyer, a dalgunos de Los Sabandeños, riba tóo a ún de los vieyos, precisamente el qu’encadarmara la cantata, Elfidio Alonso. Entruguéi pol asuntu. Díxome qu’ellos, na so investigación, supieron de la presencia de soldaos asturianos, que yo pensé, erróneamente, llevaos por Pedro d’Avilés. Tamién me contara que fixeron esa composición porque tiníen una gran consideración de la tonada. Bono, la isa canaria ye una derivación de la xota mariñana asturiana, lo mesmo que los tambores de La Gomera proceden de los pandeiros de los vaqueiros, porque con xente del occidente asturianu poblaron les zones altes de dalgunes islles y mui particularmente de La Gomera. Entá queden apellíos perende. Conocilo mui bien porque conviví siete años con una familia canaria llarga y bien situada. Nun falo por falar. El casu ye qu’a Elfidio díxei que, en fín, nun mos dexaba mui bien: una matanza colonialista al son d’una tonada, un asturianu de gallu d’una tropa xenocida.

M.A.: Buscaremos la cantata y, si quier, charramos un día al rodiu d’ella.

D.M.R.: Pues prestaríame porque conozo bien a los personaxes, qu’unos son reales ya otros mitolóxicos, y tamién, como-ys dicía, la xeografía. Pero la verdá ye que-ys propunxe falar de Menéndez d’Avilés güei por un motivu mui coyuntural. Hai unos díes quitaron en Barcelona la estatua del marqués de Comillas porque dedicábase a la trata d’esclavos. Entós yo recordeme de que l’adelantáu puede que seya’l primer estratega qu’organiza científicamente un campu de concentración. Fora en La Florida. Yera un campu pa concentrar a los hugonotes franceses.

M.A.: Sí, ye verdá, con los hugonotes nun tuvo misericordia.

D.M.R.: Asína fuera. Pedro d’Avilés nunca tuvo problemes colos indios. Nun yera racista. De fechu tuvo indios como homes de confianza y como guardia personal mientres tuvo naquelles tierres, homes que, diz la so biografía, comíen na mesa con elli. Ye más: castigó con dureza a los españoles que maltrataben o esclavizaben a los indios, aplicando con tol rigor les lleis de la raina católica, Sabel, y les más protectores entá de Xuana I. Llegó a mandar a la forca a un noble por violar a una india. Fue a América a otra cosa, porque tampoco se fixo ricu, nun fixo una fortuna saqueando y robando. Tinía tovía los valores de los fidalgos asturianos, colos sos xeitos morales medievales, nun compartía los valores d’un capitalismu que yá taba xorreciendo. Ye llamativo que fundara dos ciudades: San Agustín, patronu d’Avilés, y Santa Mónica, la madre d’Agustín. Por cierto, la cai más antigua que sigui esistiendo de los Estaos Uníos ye Avilés Street. Ye una cai pequeña, col empedráu antigu, una cai mui animada de bares y terraces. Nuna fachada ta l’escudu d’Avilés. L’asuntu ye qu’organizó los campos de concentración calculando inclusive cuálu yera l’espaciu mínimu pa qu’una persona sobroviviere. Tamos falando de cuatru sieclos enantes d’Auschwitz y del gulag. Y, entóncenes, la mio entruga ye: ¿quitamos la estatua de Pedro Menéndez del parque’l puertu d’Avilés? La rempuesta ye clara pa min: non. Nun podemos xulgar a un medieval colos criterios d’un home del sieclu XXI. Podemos xulgar a Hitler, a Stalin o a Franco, pero non a Sabel la Católica o a Octavio Augusto.

M.A.: Son bonos exemplos. Amás Pedro Menéndez d’Avilés nun llegara a Florida pa conquistala, sinón pa quitáila a los franceses, a los protestantes, que la tiníen ocupada dende unes décades enantes.

A.F.: Esto pasa munches vegaes, cuando pensamos que la historia empezó cuando nacimos nosotros o, como muncho, los nuesos padres.

D.M.R.: Esti asuntu ye ún de los que más me preocupen, especialmente cuando lo faen los políticos y, riba tóo, cuando los mozos se dexen llevar por esa marea. La historia ye mui llarga. Nun hai que rellativizar, pero tampoco absolutizar. Hai mantenese nesa cuerda que va, como dicía Nietzsche, de la bestia al superhome, al überman, esa cuerda tendía sobro l’abismu pela que transita l’home, con procuru de nun mirar demasiao al abismu pa que nun mos devore. Nesa cuerda alfrentamos lluces y solombres. ¿Podemos censurar la obra d’un autor por custiones ayenes a la obra mesma? Yo pienso que non. Por exemplu, a mín gústame la lliteratura de Celine. Yá sé que fuera un filonazi. ¿Qué faigo?, ¿nun lu lleo? Lope de Vega fuera amigu de la Inquisición… ¿qué faigo?, ¿nun lu lleo? Alberti o Neruda nun quixeron ver el xenocidiu estalinista… ¿qué faigo?, ¿nun los lleo?

M.A.: Vivimos tiempos de lo políticamente correcto.

D.M.R.: Ye verdá. Eso a min esmolezme muncho. Pero resulta qu’hai otru güelpe pendular que tamién me preocupa: “como toi fartu de la corrección voi poneme de rompedor y póngome a insultar a tol mundiu”, como yá vemos en dalgunos columnistes de prensa y dalgunos contertulios de televisión. Por facer un chiste: hai tiempu namás que se daben por ofendíos los dioses del monoteísmu y agora paez ser que tamién tien piel fina Buda.

M.A.: Buda yera un gordu apaicible.

D.M.R.: Los gordos suelen ser apaicibles cuásique siempres, ¡cuasi!

M.A.: Sómoslo polo xeneral.

D.M.R.: Nun escaezamos qu’al lláu de Hitler y Himmler taba Göring.

M.A.: ¡Qué rapidez, David Rivas, qué rapidez!

A.F.: La bona intención de protexer a les minoríes, ¿fixérales demasiao sensibles, por dicilo asina?, ¿igual un tanto intolerantes ante cualisquier cosa que-ys paez un ataque?

D.M.R.: En parte sí. Ayeri lleyía nun periódicu, nun me recuerdo nin cuálu nin quién yera l’autor, una reflexón mui interesante. Dicía l’autor que ye mui normal sentir que “escontra tal cosa, tolerancia cero”. Y ametía que naide diz “escontra tal cosa, intolerancia”. Pues tolerancia cero ya intolerancia ye lo mesmo, pero tamos atrapaos nun llinguax, nun metallinguax, que ye talo qu’una armadía. Miren: yo soi un bon conocedor de la obra del divín marqués, de Sade, ún de los puntales de la modernidá. Güei tendría problemes pa publicar o acabaría nun xulgáu colos raperos y los titiriteros. Voi contar una anécdota. Yo taba n’Alemaña cuando permitieron la publicación de La mio llucha, de Hitler. A min paezme de fatos prohibir esi llibru, non namás que porque seya una decisión poco lliberal, sinón porque ye una babayada. L’alemán mediu ye una persona normal y puede lleer el llibru tranquilamente. Ye tan malu y con una prosa tan probetaya que pocos pasarán de la páxina vente. Y si falamos d’un alemán anormal, un nazi, va siguir siéndolo anque nun llea’l llibru. De fechu hai miles de nazis que lo son anque nunca lu tuvieron porque taba prohibíu. Ye más: cuando Hitler espublizó esi bodriu vendió unos trescientos mil exemplares, seguramente menos. Unos años dempués tuvo doce miyones de votos. Nun fueron los llectores del llibru los que llevaron a los nazis al poder. Los llibros nun son pelligrosos. El problema ta notros sitios.

A.F.: Estes coses abórdales mui bien Darío Adanti nel llibru Disparen al humorista, con unes observaciones mui interesantes y que, dalgunes, coinciden colo que vusté ta desplicando.

D.M.R.: Sé d’Adanti porque lu sigo en Mongolia y tamién del llibru, pero nun lu lleí.

A.F: Dispidimos equí al profesor David Rivas, que, como siempres, diéramos dalgunos datos que nun tiníamos y, riba tóo, el so puntu de vista críticu y la so opinión en sin rede que lu ampare. Ata’l próximu día, amigu.

D.M.R.: Cuenten comigo pa lo que-ys pruya. Bona tardi.