"Ye'l futuru d'Asturies, pero tamién un cambiu fonderu del capitalismu"
(RPA, 15-1-2020)
Arantza Margolles:
Bienllegaos y bienllegaes a estos alderiques de los miércoles de les seyes de
la tardi, de La buena tarde, na RPA.
La Unión Europea anunciara qu’el so plan de descarbonización va facer xusticia
colos mineros asturianos y que va movilizar un biyón d’euros na década pa
llevar allantre’l pautu verde, nel envís de convertir la Unión en neutra de carbonu
en 2050. Dientro d’esti plan va entamar con un fondu de transición xusta de
7.500 miyones d’euros pal períodu 2021-2027. Pa charrar sobro esto tenemos a
David M. Rivas, profesor d’estructura económica yá xubiláu. Bona tardi.
David M. Rivas: Bona
tardi, Arantza Margolles.
A.M.: ¿En qué consiste
esta midía y pa qué va servir?
D.M.R.: Pa entamar vamos
poner tres coses en claro. La primera ye la necesidá de dexar de perdemos en
debates absurdos ya ermos: la política de descarbonización ye un fechu ya ye
una prioridá de la Unión Europea. Tovía hai quien discute sobro si hai que
descarbonizar o si nun hai que facelo. Estes discusiones nun lleven a denguna
parte por absurdes. Esta llínia de debate nun lleva a denguna parte ya ye
mester dexala pa prau, cosa que debimos facer hai yá tiempu. La segunda custión
ye qu’el plan de descarbonización ye una oportunidá que ta abriendo y non sólo
un problema nel curtiu plazu. Ya’l tercer ellementu fundamental d’esti asuntu
ye la equidá, los criterios de repartu, cómo se van repartir los fondos ente
los miembros de la Unión y, dientro de caún d’ellos, cómo ente comunidaes,
rexones, departamentos. Pero, diendo a lo más cenciello, entremos nes cifres.
Cuando falamos d’estes custiones na radio o notros medios empobinaos a xente
que, mayoritariamente, nun ye especialista en macromagnitúes, siempres surde la
mesma entruga: ¿cuánto son 7.500 miyones d’euros? La xente llega a entender los
15.000 o 18.000 euros que cuesta un coche porque pue facer comparances: “el
coche cuéstame cuatru salarios, diez salarios, tres vacaciones…”. Pero 7.500
miyones, nun digamos ya un biyón, ¿qué significa?, ¿ye muncho o ye poco?, ¿a
qué equival? Pues 7.500 miyones d’euros en seyes años equivalen, más o menos, a
un añu y mediu de presupuestu d’Asturies y a diez de los presupuestos sumaos
del Barcelona ya’l Real Madrid. Y agora la entruga: ¿esa cantidá ye muncho o
poco pa la política choque inicial de descarbonización? Na mio opinión ye
escoso, tamos falando d’una cifra baxa. Pero la principal batalla va tar na
distribución, que va dase nel parllamentu d’Estrasburgu.
A.M.: La batalla de cómo
se reparten esos fondos.
D.M.R.: Ehí va tar la
madre’l corderu. Hai cuatru criterios a ponderar: nivel de desemplegu, nivel de
renta, volumen d’emisiones contaminantes y presencia de mines de carbón. A
Asturies benefícienla los niveles de desemplegu y tamién el volumen
d’emisiones, pero perxudícala muncho los niveles de renta ya’l fechu de que
namás que tenemos un pozu abiertu, el San Nicolás. La suma de los cuatru
criterios beneficia riba tóo a los países del este y particularmente a Poloña,
anque tamién beneficia a la rica Alemaña. Pero’l casu de Poloña ye
perimportante porque falamos d’un país que nin tansiquier se comprometiera a
tener emisiones de carbonu neutres en 2050. Podría dase la paradoxa de qu’un
país recibiera fondos públicos ya inversión privada pa una política a
mediu-llargu plazu que yá diz agora que nun va cumplir, mientres que sedríen
maltataos otros países que tan dimpuestos a cumplir colos protocolos y
alcordaes comunitarios ya internacionales.
A.M.: ¿Van mirar por
nosotros n’Europa o en Madrid, que nun
sé ónde ta más difícile?
D.M.R.: Espero que sí,
porque ye de xusticia, pero la esperiencia nun me fae mui optimista. Lo que
falábamos d’una Poloña favorecía y que yá anunciara que nun piensa cumplir los
obxetivos del añu cincuenta, llévamos a remembrar que les comunidaes autónomes
como Asturies, que cumplieran con gran sacrificiu los obxetivos de déficit
fiscal, acabaron pagando los desbardies de les que nun cumplieron y viendo como
Cataluña o Valencia, incumplidores añu tres añu, volvíen ser, tamién añu tres
añu, beneficiaes pol Fondu de Lliquidez Autonómica, pola retirada de peaxes nes
autovíes ya otres coses menores.
A.M.: Ta claro, profesor,
que la minería nun tien gran futuru.
D.M.R.: Eso ye clarísimo,
pero ye que yá taba claro nos años sesenta del XX, d’aquella non tovía cola
problemática ambiental, sinón cenciellamente económica. Pero les circunstancies
históriques foran les que foran. El franquismu nun podía tensar más les rellaciones
llaborales, con una clas obrera qu’entamaba organizase otra vuelta y que,
concretamente, na minería asturiana nunca dexó de tener cierta organización,
con un posu sindical potente. Amás falamos d’un seutor estratéxicu de primer
orde. Cuando la transición, en plena cris económica y enerxética, encabronar a
les cuenques mineres asturianes nun yera conveniente. Y asina tiramos ata la
reconversión realizada pol PSOE, qu’aprofitó la so bandera esquierdista pa
torgar muncha griesca y los fondos europeos pa tapar la realidá. Ata la escuela
mines siguió colos sos programes docentes como si nun pasara nada, cuando les
escueles franceses fueran tresformando dende la minería clásica haza
especializaciones medioambientales, una reordenación qu’entamaran yá a mediaos
de los setenta. Repito que la esperiencia debería amosamos dalgo y nesti casu
yá vimos que l’alministración n’Asturies de los fondos europeos y
particularmente de los fondos mineros ye una historia impresentable. Ye una
historia de clientelismu, llocalismu malsanu, corrupción, decisiones
antieconómiques…
A.M.: La cosa ye
planificar a trenta años, o a los que seya, pero saber qué se quier facer.
D.M.R.: Ehí ta l’asuntu,
que fue lo que nun se fixo enantes. Ye que nun tamos sólo nun procesu de
descarbonización, non. Tamos falando d’una transición enerxética. Tamos falando
d’un cambiu de modelu, Puede que teamos falando, cuásique, d’un cambiu de modu
de producción. Y cuando emplego esti términu, modu de producción, toi emplegando intencionadamente esi términu
marxista, porque tamos delantre d’un cambiu fonderu del capitalismu. Y nesa
tresformación de la estructura económica la batalla presupuestaria tien gran
importancia. Estos fondos dedicaos a la descarbonización nun son del biribiri, nun cayen del cielu, sinon que
compiten con otros fondos. Puede haber una disminución de fondos agrícolas,
fundamentales pa fixar población nel mediu rural; de fondos de cohesión, que
permiten equilibrar rentes; de fondos estructurales, que financien los sistemes
de comunicaciones. Ye qu’el cambiu de modelu nun pasa sólo pola
descarbonización, sinón que afleuta a caltener población nes fasteres rurales,
planes de reforestación con especies autóctones, pa modificar la ganadería haza
un modelu estensivu non agresivu pa col mediu. Por eso ye mester planificar.
Nun falo del gossplan, sinón d’una
programación razonable, de programar el nuesu futuru a cincuenta años, que son
menos de lo que paez. Otru asuntu importante ye si vamos basamos nun criteriu
de tarrentoriu o nun criteriu de población. Voi desplicalo d’una forma que
cualisquier asturianu pescancia. ¿Cómo entendieron los nuesos alminitradores
los fondos mineros?, pues por población afleutada. Un erru d’órdagu a la grande.
El problema del pieslle de les mines nun yera un problema de los mineros sinón
un problema d’Asturies. Nun lo vieran asina. El SOMA yera un poder fácticu, que
non democráticu nin representativu, y arrastró na so política a tou un país,
incluendo a los mineros y, riba tóo, a los sos fíos, a los sos ñetos y a los
conceyos de les cuenques. Yo espero que los políticos, especialmente los del
PSOE, daprendieran la llección y vean qu’esti nun ye un problema mineru, sinón
una posibilidá pa un país. Nesto soi un poco más optimista. Los cambios
políticos de los últimos menses paecen sonar meyor, pero los analistes xugamos
con funciones contínues, anque perdamos la vitalidá
de les variables discretes, más con recurrencies que con discontinuidaes… Y
querría comentar una última cosa: tenemos qu’entamar a facer controles en
frontera del carbonu. Si descarbonizamos y permitimos a un tiempu importaciones
d’aluminiu, d’aceru, de lo que seya, de países que incumplen los acuerdos de
París, el protocolu de Kioto o, como la mesma Poloña comunitaria, l’alcordada
de neutralidá pal 2050, taremos contaminando lo mesmo globalmente, tirando les
perres y castigando a los países que cumplen los sos compromisos. Por cierto,
allégrome muncho de qu’a esto fixera referencia ayeri n’Estrasburgu Jonás
Fernández. El fechu qu’un eurodiputáu asturianu del PSOE plantegue esti asuntu
ye mui importante. Y quiero creyer que seya significativo.
A.M.: Munches gracies,
profesor Rivas, por estes reflexones, siempres tan clares ya entendibles.
D.M.R.: Bona tardi,
Arantza Margolles, pero son cenciellinos apuntes al rau l’actualidá. Veremos
qué pasa nes vinientes selmanes.