Apuntes d'un ministru
(El Fielato y El Nora d'esta selmana)
El ministru Castells nun dixo nin mu dende
qu’asumiera’l cargu. Bono, dixo, con tola razón, que dixebrar ciencia ya
universidá yera una mazcayada y que, polo tanto, entraba cola cartera vacía.
Manolo Castells fora profesor míu hai munchos años. Yera entóncenes miembru del
PCE ya ún de los meyores científicos del urbanismu y de la política rexonal que
nun yeran arquitectos o inxenieros de caminos, lo que yera un puntazu daquella.
Yera brillante y provocador, como bon discípulu d’Alain Tourane. Elli fora’l
que me llevara a dir un mes a Boloña, na Emilia Romaña, pa ver cómo furrulaba’l
meyor proyectu de ciudá d’Europa, con una integración urbe-rexón o campu-ciudá
que güei paezmos lo último de lo último. Pues falo de finales de los setenta.
Dempués trabayó na planificación de Madrid, siendo primer teniente d’alcalde
Ramón Tamames y conseyeru de la comunidá Eduardo Mangada. Nun pudo facer nada
de provechu y marchó pa California, pa Berkeley. Dende ellí convirtiérase nun
de los referentes mundiales de la socioloxía, particularmente en custiones de
la sociedá’l conocimientu.
Pero Castells tien la so importancia n’Asturies. Nos
años noventa, siendo presidente Rodríguez-Vigil, coordinó un macroestudiu
conocíu como “ERA”, que yera l’acrósticu de “Estratexes de Reindustrialización
d’Asturies”. Aquel estudiu, como tolos fechos nesti país, acabara nun caxón
porque nun coincidía colos intereses del SOMA y de les families socialistes.
Poco dempués, Rodríguez-Vigil, un home illustráu pero que pagó cara la so chulería
ya’l so despotismu, cayera. El mesmu SOMA que lu llevara al gobiernu tiráralu
de la siya. Ye pa cuntar la so charra como presidente cesante nuna xinta nel
Club Siglo XXI de Madrid, presentáu pol periodista Cándido. Yo, curiosidaes de
la vida, taba ellí.
El casu ye qu’el estudiu de Castells quedó pa prau.
Pero munches de les coses que plantegaba siguen vixentes ya otres resultaron
ser verdaes como puños. En 1997 dixo una frase llapidaria que recoyera tola
prensa: “a la economía asturiana namás que-y queda rezar a la virxe de
Cuadonga”. El profesor nun doblara escontra les mentires de los fondos mineros
ya estructurales que mos veníen de la Unión Europea, non, sinon que dixo les
verdaes del barqueru.
Un periodista entrugárai que cualu yera’l futuru de
“la tribu asturiana”. Si, sí, nun ye recurso lliterariu, asina fora la entruga.
Castells dixo lo que yá yera evidente y que güei tóos sabemos: “la tribu
asturiana vive mui bien pero vive de prestao y nun piensa qu’esto va acabar”.
Tamos falando de 1997. Son cuásique venticincu años. Primer apunte: el gobiernu
asturianu y los sindicatos taben planificando tener pan pa esi día y fame pa
los vinientes, altes rentes pal güelu y miseria pal ñetu.
Segundu apunte: dicía entóncenes Castells que los
asturianos “deben escaecer Madrid, que namás que-ys cobra una tasa de peax”.
Pero los gobiernos, los sindicatos y los empresarios siguieron erre qu’erre
cola so visión provinciana y cosmopaleta, ata llegar a qu’un presidente dixo na
Xunta Xeneral, testualmente, que la so misión nun yera defender los intereses
d’Asturies. Un tal Fernández, mui preocupáu pola política llingüística en
Cataluña. Ya otru anterior, un tal Areces, dicía que la emigración de los
xóvenes yera una “llienda urbana”.
Tercer apunte: dicía Castells qu’Asturies tinía “una
perfuerte identidá cultural” que nun aprovechaba económicamente. Nun vamos
falar d’esto y de lo que fixeran los gobiernos asturianos cola nuesa cultura,
entamando pola llingua, pasando pola sidre, pola música, polos horros, pol
prerrománicu…
Nun sé que pensará Adrián Barbón, el nuesu presidente,
d’esti incómodu ministru. Tampoco importa muncho porque la cartera
d’universidaes ye un chochín pal café de media tardi de Podemos. Dalgo de
cultura hai que dar a la esquierda pa pintar la mona. Pero, a lo menos,
presidente, atienda a los estudios d’un mundialmente reconocíu investigador.
Dexo ehí, modestamente, tres apuntes.