Cuando la oficialidá pudo ser en diferío

Lleendo ayeri una entrevista a Xuan Xosé Sánchez Vicente con motivu del so Premiu Nacional de Lliteratura Asturiana, viniéranme a la memoria aquellos díes de la oficialidá en diferío. Como nunca cuntara cómo fora la sesión parllamemtaria na que se tratara la reforma l’estatutu d’autonomía d’Asturies, voi facelo agora. Yera l’añu 1998 y llegaba al Congresu de los Diputaos el nuéu testu l’estatutu, redactáu y aprobáu pola Xunta Xeneral y que, como bon fueru otorgáu, yera mester convalidar nes cortes españoles.

Bien ceo pola mañana aportáramos al Congresu Xicu Díaz Yepes ya yo pa intentar falar colos grupos políticos que nun tiníen representación nel parllamentu asturianu y que diben votar el nuesu estatutu. Nun tiníamos intención de falar col PSOE, nin col PP nin con IU, sinon con otros. La custión yera informalos de la situación de la llingua asturiana, na idega de que la mayoría d’ellos sabríen poco del asuntu, por nun dicir nada. Díaz Yepes diba en representación de la Xunta pola Defensa de la Llingua Asturiana ya yo pola Academia de la Llingua Asturiana.

El casu ye que consiguimos aconceyar con CIU, PNV y Coalición Canaria. Joaquim Molins, portavoz entóncenes de CIU, arrecibiéramos amablemente nel so despachu pero num mos fixo munchu casu y argumentó que, anque nun-y gustara l’estatutu asturianu porque lu vía probe democráticamente, la norma’l so grupu yera respetar siempres la redacción llegada del parllamentu autonómicu y votar a favor. Con Luis Mardones, de Coalición Canaria, tuviéramos charrando na cafetería. Home mui simpáticu, diéramos bones pallabres pero amosó nun saber nada nin tener interés por saber nada. Y cuando digo nun saber nada nun falo d’Asturies nin del asturiano, sinon de nun saber nada de nada, paezme que nin tan siquier de la cultura canaria. La mio muyer d’entóncenes yera de Tenerife y más conocía yo de les islles qu’el diputáu nacionalista.

Fora Margarita Uría, del PNV, la que más interés punxo nel asuntu. El portavoz yera Iñaki Anasagasti pero diba ser ella la que falaría nel plenu nel que diba debatise l’estatutu. Uría sí sabía de la problemática llingüística asturiana y, anque caltuvo una posición asemeyada a la de Molins, dixo que diba dedicar unos minutos de la so intervención a la oficialidá del asturiano.

El plenu taba convocáu pa dempués de comer y anduvimos deambulando pel Congresu, tratando d’atopar a dalguién más anque, descontaos los tres partíos que tiníen representación n’Asturies, con falar col PNV y con CIU yá tiníamos cumplía la xera encomendada. Y nesto que nun pasiellu damos de cara con Luis Martínez Noval, diputáu socialista por Asturies. Díaz Yepes, amigu de tender pontes, un pontífice, párase (yo pasara de llargo) ya empobínase al diputáu. Yo volviera patrás y tamién lu saludé. Más o menos, Díaz Yepes díxoi esto: “bono, esti ye un camín llargu y siguiremos falando y discutiendo”. Martínez Noval fixo cola man un cruz y raya mientres dicía: “nun hai nada que falar, esto queda equí y puntu”. Saliérame la vena lliberal y díxei: “vusté ye’l mio representante porque a esta casa lu mandamos los asturianos, ya un representante nun puede falar nel parllamentu con un ciudadanu al que representa como si tuviera discutiendo nun chigre de fúbol; vusté sedrá señoría pero ye bien poco señor”.

Llegara la hora’l plenu ya ellí que mos sentamos na tribuna d’invitaos. La escenografía yera de película: el bancu azul taba vacíu, namás qu’había un ministru. Colos brazos espurríos nel bancu y piernes cruzaes, Francisco Álvarez-Cascos sopelexaba eso de “esta cosa ye mía ya yo abástome solu”. La presentación del testu estatutariu fixérala el socialista Celesto Suárez. La so intervención yera p’avergonzar a cualisquiera. Tamién se discutía l’estatutu de Baleares y los convidaos de les islles que taben con nós nun yeran a entender cómo un parllamentu podía tar representáu por aquello.

Molins dixo lo que yá sabíamos, anque incidió en que l’estatutu yera tan defectuosu que nun tardaría en volver pa ser reformáu y que meyor nun saliere d’Uviéu. Mardones nun dixo nada. Margarita Uría faló de la llingua como drechu fundamental de los asturianos y dixo que la oficialidá yera un mandatu constitucional. Yera la segunda vegada que nel Congresu se defendía l’asturiano. Primero fixéralo Ramón Tamames, diputáu d’IU por Madrid, agora una diputada del PNV por Vizcaya y más sero diba facelo Joan Puig, diputáu d’ERC por Xerona. Nunca un diputáu por Asturies lo fixera.

Entóncenes pasó una de les coses más rares que viví en sesenta años, más de cuarenta nestos enguedeyos. Xube Cherines Fernández a la tribuna d’invitaos ya entrúgamos que qué mos paez apautar una oficialidá en diferío, qu’entre nel estatutu pero se dexe pa desendolcar una llei posterior. Xicu Díaz Yepes puede que tuviera capacidá de decisión en nome de la Xunta Pola pero yo, evidentemente, nun la tinía nel nome de l’Academia. Llimitámosmos a dicir que, personalmente, víamoslo bien pola cenciella razón de qu’otra nun había. Si la diputada Fernández diera esi pasu ye porque, clariquino, Álvarez-Cascos taba detrás de la propuesta. El PP pidiera un recesu pa falar con otros grupos. El PSOE cerrárase en banda. Supongo que Suárez nun diría nin mu, qu’abondo tinía con lleer lo que-y escribieran pa xubir al estráu, pero ellí taría l’autoritariu Martínez Noval imponiendo les directrices de la inculta y acomplexada FSA. Final de la historia.

Visto dende’l presente, nun sé mui bien qué pasaría de salir aquello palantre. Nin tansiquier sé si yera d’encax llegal lo que Fernández y Cascos proponíen, pero que les coses taríen dalgo meyor seguramente que sí. Agora tamos notru tiempu, con un PSOE notra posición que quiero creyer sincera y a falta d’un votu na Xunta Xeneral. Agora los asturfalantes tenemos en contra a Vox, al PP, a Ciudadanos, a la metada de la prensa asturiana y a la prensa de Madrid, El Mundo particularmente. Y con dos diputaos de FAC que nun saben si ponese a servir o a buscar criáu. L’asturiano siempres nel filu la navaya que, por desgracia, nun ye la d’Ockham.