L'antroxu n'Asturies: d'ayeri a güei

L’antroxu, en puridá, entama de vienres, al día siguiente de les comadres, polo que nalgunos llugares llamen a esi día vienres de comadrines. Pero los díes grandes son el domengu gordu, el llunes d’antroxu y, ribatóo, el martes d’antroxu. Ye entóncenes cuando apaecen les mázcares y los mazcaritos, que, anque güei podría pensase que ye cosa de fiestes urbanes, cellebrábense –y sigui faciéndose- nes mesmes families, nes caseríes. Los mazcaraos facíen mofa de la vida campesina y de la urbana, como buscando un paréntesis catárticu pa custionar l’orde social establecíu. Ye por eso polo que una de les característiques qu’entá podemos apreciar y que sigui furrulando igual que nos antroxos tradicionales ye la tresgresión. Los homes disfrácense de muyeres, putes munches vegaes, los ateos faense cures, los acomodaos faense méndigos y los méndigos reis. Tamién ye corriente que se reciten poesíes sarcástiques y que se canten coples irreverentes. Ye tal la subversión de roles que dalgunos antropólogos calificaron, ensín entaramangase, al antroxu como día de la venganza. Pero cuerren malos tiempos pal antroxu: la corrección política, esta vegada dende los que se llamen progresistes, yá mos diz de qué podemos disfrazamos y de qué non.

Ún de los rasgos del antroxu ye que se comía abondosamente. Na casa campesina de la sociedá tradicional consumíase lo meyor que se tinía y convidaben a los vecinos a participar d’ello. Nun ye casualidá que nel asturiano actual el verbu antroxar nun namás significa correr l’antroxu sinón tamién comer ensín tasa. De fechu, el refraneru recuérdanos que

n’antroxu fartura,

dempués fame segura.

L’antroxu ye ya yera cellebráu per toa Asturies y con ceremonies y rituales mui asemeyaos en tolos sitios, pero vamos aparamos en dalgunos llugares, d’antaño y d’anguaño. En Sarzol, nel conceyu d’Eilao, los neños facíen manoyos de paya  y cuerríen con ellos prendíos peles finques de la parroquia, lo mesmo que facíen en Trabáu, nel conceyu de Degaña, onde al manoyu llamen pachizu. Lo más llamativo ye que invadíen toles güertes y lloses sacantes les que yeran de malos vecinos, pa que nun tuvieren bona collecha. Ye evidente qu’aquel xuegu infantil cuerrespondía con un ritual pa propiciar la fertilidá de la tierra.

En Xixón viense cellebrando l’antroxu, cuando menos, dende’l sieclu XVII. Esti datu tenémoslu  porque fora entós cuando’l párracu de San Pedro, un tal Bolde, espublizó severes amonestaciones pa que los mazcaritos, asigún elli nes sos desmanes y licencias, nun profanaren el suelu santu. Ye mui posible qu’a lo que se refería esti cura yera a l’antigua costume d’entrar nos cimenterios nes nueches de los ritos de pasu. Xixón cellebra l’antroxu dende’l vienres ata’l martes pero los díes principales son los dos últimos. El llunes d’antroxu, al cayer la nuechi, entama un desfile de carroces, cumparses y charangues, con una participación multitudinaria. Al día desiguiente, martes, cellébrase l’intierru la sardina, acompangada de plañideres vistíes de llutu, tirando l’emblemáticu pexe a la mar y acabando con fueos d’artificiu.

Por embargu, la recuperación del antroxu, prohibíu pol gobiernu de Franco en 1937, namás tomar la ciudá y llograr la capitulación d’Asturies, y autorizáu otra vuelta en 1976, amosa evidentes ellementos d’aculturación. Poques manifestaciones culturales hai n’Asturies, non namás en Xixón, tan poco asturianes como esta que tratamos. Los antroxos de Xixón, y asina lo recueyen cronistes ya investigadores, como tamién lo dexen claro grandes pintores del XIX y de principios del XX, poco tienen que ver colos desfiles del presente. Ata la victoria del fascismu na última guerra civil, los mazcaritos yeran, xeneralmente, figures grotesques qu’amosaben irónicamente les miseries y les contradicciones de la sociedá d’entóncenes. Diben armaos con escobes coles que perseguíen a los viandantes de bones costumes y manchábenlos con burraya. Le sos vestimentes y les sos actitúes yeran asemeyaes a los guirrios y zamarrones del añu nuéu. En cambiu, anguaño, l’antroxu de Xixón ye una probe copia de los carnavales de Río de Xaneiro o de Tenerife, con plumbes, vistíos entallaos y música tropical.

Lo mesmo podemos dicir del antroxu d’Avilés, nel que cuntamos con un descensu de la cai Galiana col yá clasicu ingrediente, insoportable nuna nueche de plenu iviernu, de tirar calderaos d’augua enriba la xente dende los balcones. Agora bien, n’Avilés permaneciera una tradición más que milenaria: la quema la vieya nel miércoles.

Y falamos de que “permaneciera” la tradición porque fora suprimía l’añu 2009. A instancies de la esquierda bienpensante que vela pola moral como templariu en Tierra Santa, amosando a un tiempu la so talla cultural, la quema la vieya fora refugada: aquello yera denigrar a la muyer y a la tercera edá. Eso de quemar la vieya sonaba permal. Pero la quema la vieya nun ye sinón un ritu pa quemar l’iviernu, ritu qu’Asturies comparte cola Xermania y cola Escandinavia. Amás ye un ritu vinculáu a la diosa madre, a la divinidá femenina, un ritu que resulta intolerable pa los políticos (polítiques) feministes. Ye tóo d’esperpentu valleinclanescu. De los restos quemaos de la vieya, del iviernu, ñaz la muyer xoven, la vida, la primavera, la que vuelve a dar calor al mundiu. Tampoco sabrán estos munícipes d’escosu bagax humanísticu ya inorancia supina de la cultura’l país, que lo que seguramente llamen arco iris siempres fora l’arcu la vieya. Ye más: metanes la cuaresma (esti añu ye’l 17 de marzu) ye cuando parte la vieya na tradición asturiana. La so representación ye la de una vieya esgurripiada con una fueya bacalláu na manu, pola dieta cuaresmal, y con siete pies, poles seyes selmanes de la cuaresma y la del antroxu. Y pal conceyu de Salas, puede que tamién notros sitios, cuando n’avientu entamen los díes, pasin a pasu, a medrar, dizse que

per Santa Llucía

la vieya estira la pía.

Pero de xuru qu’el principal antroxu d’Asturies enantes de la prohibición yera’l de Ribeseya. Nos años de la república llegaba haber bailles en tres sales simultániamente y les cais de la villa taben atascaes pol tráficu rodáu tan impresionante qu’había. Agora tamién sufriera cola mesma aculturación de Xixón o d’Avilés pero caltién Ribeseya una tradición antigua, la llegada’l Rei Momo, que llee un pregón festivu como manden los cánones.

Anque seya menos importante polo que toca a repercusión, l’antroxu de Cazu, nel conceyu de Ponga, conserva perbién toles característiques de los ritos de pasu más antiguos. Na mañana’l domengu dos o tres mozos percuerren a caballu la collación, pidiendo de puerte en puerte una voluntá, lo que mos recuerda a l’aguilandu nadaliegu y a l’añu nuéu del guirria de la cercana parroquia de Beleñu.

Queda falar del antroxu d’Uviéu, importante fiesta dende antiguo na capital. Tien tolos ingredientes d’aculturación de les demás poblaciones grandes y, por si poco fora, cellébrase normalmente en plena cuaresma, lo que diz bastantina de los sos organizadores. L’ayuntamientu, pa nun competir con otres fiestes y particularmente con Xixón, que ganara la guerra antroxera hai años, treslladó la cosa a unes selmanes de baxa intensidá folixera. L’antroxu d’Uviéu ye l’exemplu más claru del pasu del conceptu de fiesta como rotura o cambiu de ciclu a otru conceptu nel que namás importa’l cartelu d’actuaciones musicales o circenses y nel que mesmo da la nuechi de solsticiu, el nadal, el vienres santu o los muertos. Ya esti añu Uviéu ye l’únicu llugar que nun cellebra antroxu, antroiru, antroidu, antrueyu, entroidu, antruexu, que varies son los nomes nel domininiu llingüísticu asturianu (Asturies, Cantabria, Llión, Miranda de Douro, Estremaúra), sinón que cellebra carnaval.