"L'apueste d'Asturies ye agroindustria, teunoloxía ya un nuéu modelu enerxéticu"

(RPA, 11-9-2018)

Monchi Álvarez: Abre la puerte l’estudiu y siéntase na so siya, la que ta reservada pa elli. Escritor, ensayista, economista y amigu del programa. Con pinta de dandi británicu y mirada vivaracha. Ye David Rivas. Bona tardi, profesor. 

David M. Rivas: Bona tardi, Monchi Álvarez.

M.A.: Asturies, llarga historia la d’Asturies y los asturianos. ¿Conociera dalguna vegada tiempos de bonanza Asturies? ¿Igual los años 60 o 70?

D.M.R.: Vamos ver. Si por bonanza entendemos que la xente tinía una bona renta, sí qu’eses décades, década y media, ata’l crash del 73-75, son años bonos económicamente n’Asturies. Había perres n’Asturies, habíales nes ciudades y nes cuenques corríen, pero tamién empezaba habeles nes zones rurales, naquelles que taben saliendo de la cris de l’agricultura tradicional, anque al coste de la emigración. Pero si por bonanza entendemos un modelu económicu que se caltenga, entóncenes pamidea que nunca nun lu hebo.

M.A.: ¿Nunca?

D.M.R.: Nunca igual ye muncho dicir. Podemos dir al final del sieclu XVIII, cuando la illustración, la xeneralización del maizu, l’espardimientu la mazana, l’apaición d’una clase campesina propietaria, cuando los puertos comerciaben con América. Esto ye que nos sesenta había perres en bolsu pero non una economía sana y caltenible. Y, riba tóo, habíales en comparanza. Yo recuérdome perfechamente de los primeros años setenta. Mio padre fue a montar una industria a Portugal, a Setúbal concretamente, anque viviríamos en Llisboa. Cuando llegó la revolución de los claveles, como la empresa yera española, pasó a quedar identificada col franquismu, independientemente de que mio padre nun tuviere eses posiciones polítiques y la empresa llevaba unes patentes asturianes ya otres alemanes y britániques. Entós tuvo que dirixir la cosa dende Badajoz. Ye fácile de maxinar: yera’l rei del mambo. Con una renta de directivu del metal de Xixón en Badajoz… De fechu, yera vezu de la empresa pagar los salarios colos criterios asturianos, colo que la secretaria, una neña col bachiller, cobraba muncho más qu’el meyor obreru especializáu y vente años d’esperiencia. Los asturianos tiníamos una renta mui superior a los demás, namás comparable al País Vascu, a Barcelona, non a Cataluña sinón al área metropolitana de Barcelona, y para de contar. Paezme que nin Madrid podía encomparase. Pero yera una economía tan débile tan débile qu’al primer embate carecíu yá viéramos lo que pasó.

M.A.: ¿Por qué nun tenemos un modelu económicu? Pasen los años y los asturiamos seguimos siendo una triba d’irlandeses o de polacos n’España, buscando fortuna más allá de les fronteres.

D.M.R.: Voi contestar cuásique con un chiste: porque somos un principáu. Asturies decidió, o más bien decidieron polos asturianos, qu’Asturies fora una comunidá de segunda o de tercera. Asina de claro. Acabo de pasar per Los Campinos de Begoña y viera la esposición sobro los centenarios de Cuadonga. Sedríen vente o trenta semeyes. ¡La metada d’elles yeran de Juan Carlos y de Felipe! Ye qu’en mil trescientos años, ¿namás diéramos que pa eso?

M.A.: Nun s’entiende esi vasallax.

D.M.R.: Esi ye ún de los mayores problemes. Hai más, evidentemente. Yo nun soi tan simplista como pa creyer qu’una sola causa provoca los efeutos que sufrimos, pero esa causa que-y digo ye una de les más importantes.

M.A.: ¿Cuéstamos superar el recuerdu industrial y mineru entá güei?

D.M.R.: Sí, pero vamos per partes. Lo minero hai dalo por amortizao, pero ye que debimos amortizalo hai tres décades. Otra cosa ye la industria. Ye evidente que la nuesa economía, la economía europea, ye, a efeutos del PIB, una economía terciaria, pero denguna economía potente dexó de tener una base industrial. La industria, na mio opinión, ye fundamental, y la industria asturiana sigui siendo fuerte. A la nuesa industria de bienes d’equipu sólo se-y pué encomparar la del País Vascu, la de Vizcaya.

M.A.: Y bonos profesionales.

D.M.R.: La cualificación profesional d’Asturies ye elevadísima y, precisamente agora, corremos el riesgu de perdelo. Los téunicos asturianos son, posiblemente, los más cualificaos del reinu. Y cuando falo de téunicos nun falo sólo d’inxenieros y peritos, sinón tamién de mayestros industriales, de mineros, de torneros, de fresadores, de caldereros, de soldadores… El nivel téunicu de los trabayadores asturianos ye peraltu. Pero, como dicía enantes, podemos tar perdiéndolo. Pero, por eso falaba de lo del principado, la nuesa cris ye política. Evidentemente, hai una cris económica, pero que ye o fue la mesma que la d’otros vieyos países mineroindustriales. Por el contrario, la nuesa cris política ye singular y procede d’una voluntá de convertir a Asturies nuna comunidá de tercera división pa que se paseen pel so guapu paisax los nuesos señores naturales. Nun se pué vender nada si nun tiés confianza política nes tos posibilidaes y capacidaes. Eso sabémoslo los economistes dende siempres, non dende Marx o los clásicos lliberales, sinón de muncho enantes.

M.A.: A David Rivas entendémoslu mui bien. Ye más, Rivas dixo una vegada nesti programa que si a un economista nun lu entendemos ye que ta intentando engañar.

D.M.R.: Dígolo munches vegaes. Cuando a un economista una persona de cultura medio, esa persona que tará sintiendo agora La Buena Tarde, nun lu entiende, ye que ta engañándola o intentando engañala. Hai economistes a los que yo nun los entiendo, hai ministros d’economía a los que tampoco los entiendo. Pienso: ¿qué dicen, qué me tan contando?

M.A.: Y dalgún qu’otru conseyeru.

D.M.R.: ¡Bono, eso yá…! Dicen cada cosa… Toi pensando nunos cuantos y non na conseyera d’agora, que me paez sensata, polo menos eso. Dolores Carcedo ye de lo meyor que tien l’actual gobiernu. ¡Pero otros…! O son inorantes, que pué ser, o mienten, o les dos coses. Hai díes que llego pensar que la política acabó siendo la profesión de los que nun tienen profesión y que ye la so forma de vivir d’una forma privilexada. 

M.A.: Lo dicho, a David Rivas entendémoslu y, amás, nun pide permisu pa falar. Por eso mos presta traelu a La Buena Tarde. Siguimos. Taba pensando agora na nuesa conversa d’hai unes selmanes sobro la emigración asturiana a Madrid y de los asturianos con perres, como los d’El Corte Inglés, Galerías Preciados, Alsa, xente con perres que queda en Madrid, que nun regresa a Asturies. Si los encomparamos colos empresarios vascos que, amás, durante munchos años, tuvieron presionaos con un impuestu más, el impuestu revolucionariu de la banda armada ETA, nun hai collor. Estos resistíen, non tóos, pero sí la mayoría, y quedaben n’Euskadi. Y n’Asturies, ¿qué pasa? ¿Ye qu’el que fae perres equí marcha pa Madrid y nun invierte n’Asturies?

D.M.R.: Ye que ata’l Banco Santander sigui teniendo la so sé central en Santander. La burguesía asturiana, que fue una burguesía revolucionaria ya emprendedora durante  trenta años, pasara a ser fonderamente reaccionaria, conservadora, acomodaticia y fascista durante los cien siguientes. Voi cuntar una anéudota que, la verdá, contela tantes vegaes qu’igual yá lo fixe tamién equí. Nun cursu que dirixíamos en Xixón Pepe Alba, de la Universidá d’Uviéu ya yo, tuvo de profesor Ramón Tamames, que tinía muncho interés en conocer Somiedu. Pallá que fuimos los tres y anduvimos pel conceyu tres díes. Por cierto, Tamames quedó impresionáu porque pensaba que yera namás que viesques con osos y gallos monteses. Tinía una idega de Somiedu que más podría ser Muniel.los. Quedó sosprendíu cola ganadería, cola gastronomía y con tol complexu cultural, amás de los llagos y les viesques, y de pasar dos nueches na casona de Flórez Estrada. Pero l’asuntu que quería comentar ye de cuando visitamos la central de La Malva. Nun sé si vuste conoz esa central, la primera hidroelléutrica d’Asturies. Ellí baxaron del monte a cartuchu y fesoria.

M.A.: Conozo la central. ¡Menudu trabayu que fixeron elli!

D.M.R.: Si la conoz igual se diera cuenta d’una llábana que ta na paré de la esquierda asigún entramos. Nella tan los nomes de los propietarios de la central y los de los de los inxenieros que la ficieron. Tamames, de xuru qu’ún de los meyores conocedores de la historia económica d’España, miró para la placa y dixo: ¿aú quedara esta Asturies emprendedora? Pepe Alba ya yo mirámosmos con un xeitu vergoña y nun diximos nada. Si faláramos, sólo podríamos arrepostiar que desapaeciera va yá cien años. Aquella burguesía industrial, emprendedora, non poco esplotadora al mesmu tiempu, porque nun falamos d’anxelinos del cielu, sabía lo que quería facer. Tamos falando de capitanes d’industria. Yo entá conocí a ún de los últimos d’eses estirpes, mio padre, anque él yera téunicu, non propietariu. Anguaño, dende van unes décadas tenemos una burguesía vendedora. Toós vendieron les empreses, cuando nun les arruinaron colos sos vezos de niñatos pijos. Un exemplu claru de la burguesía vendedora que coló pa Madrid coles perres en bolsu ye’l de los Rato, igual ún de los más claros. Rodrigo Rato ye’l típicu fíu de la burguesía asturiana vendedora y que nunca trabayó. Los sos güelos y bisgüelos trabayaron, sacando plusvalía, que diría Marx, pero trabayaron.

M.A.: El milagro económico, ¿recuérdase?, aquel llibru sobro Rodrigo Rato que la editorial Planeta tuvo que comer con pataques, nel que falaben de Rato y del so millagru económicu.

D.M.R.: Paezme tener media idega pero nun me recuerdo bien. Pero tamién hebo haxografíes de Mario Conde y d’otros nesa dómina. Aquella época, los finales 90, fue una cosa llamentable. Pero l’asuntu ye que si mira vusté pa los asturianos illustres d’esos años, los fíos de les vieyes families de la gran burguesía, son toós ñacíos en Madrid. Lluéu dirán que son de Xixón, o de L.luarca, o de Mieres, cosa bien publicitada pola nuesa prensa cada branu. Evidentemente, naide ye culpiable de venir al mundiu onde lu traxo la so madre pero eso evidencia ónde vivía l’alta burguesía asturiana. Lleven les ses a Madrid y, polo tanto, la mayoría tributa ellí.

M.A.: ¿Por qué pasa eso y nun pasa n’Euskadi?

D.M.R.: Naide, nin nosotros nin dengún oyente, va quedar espavoriáu polo que voi dicir porque tóos sabemos perfechamente lo qu’hai: cenciellamente porque la burguesía vasca ye una burguesía productiva y vasca, mientres que la nuesa ye una burguesía rentista y madrilana.

M.A.: Cuando David Rivas fala… Tién que venir más a tar con nosotros.

D.M.R.: Encantáu. A min falar préstame pola vida.

M.A.: Y a un home como David Rivas, qu’ama fonderamente esta tierra, si yo-y pongo equí una bola cristal y pretende facer de futurólogu, o yo lu obligo a facer de futurólogu, ¿qué me podría dicir del futuru d’Asturies? Porque los sos mayestros y amigos Velarde y Tamames dicíen l’otru día que podría haber futuru económicu pa Asturies, pero nun se poníen d’alcuerdo cuásique en nada.

D.M.R.: Los dos fueron mayestros míos, anque yo soi más de la escuela de Tamames. Siguí mui atentamente y de cerca la discusión ya hebo dalgo que me llamó la atención: paeciérame que Tamames conocía meyor la economía asturiana que Velarde. Tamames nunca estudió a fondo la economía asturiana, ye muncho más xeneralista qu’un Velarde mui centráu n’España ya ún de los economistes oficiales d’Asturies, amás de ser de Salas, mientres que Tamames ye de Madrid. Gustome muncho, nos sos choques de política económica, una cuesión que punxo na mesa Tamames. Teo falalo con elli pa que me desplique meyor qué ye lo que quería dicir. Elli falaba de que, escontra la idega d’una reindustrialización poles víes clásiques, nun descarbonizar y qu’una vuelta medio reconstruyía la estructura industrial traer manu d’obra de fuera, debería caminase haza un modelu económicu con menos población. Yo nun llego a saber qué ye lo que pensaba esautamente, pero paezme una idega perinteresante. Amás, llevo munchos años con Tamames y, anque nun tea munchos datos dalgunas veces, ye un home con una intuición ya una visión de futuru formidables. Porque reconstruyir lo perdío nun tien muchu xacíu. La descarbonización nun ye un asuntu más o menos discutible, sinon que ye dalgo inevitable. Si hai un modelu con futuru ye un modelu descarbonizáu. Podremos apautar que seya flesible, menos lesivu, con mayores plazos, pero la descarbonización ye dalgo inevitable nel mundiu y, a pocu plazu, na Unión Europea. Esto ye: quiebra de la estructura industrial clásica y descarbonización, el final de l’Asturies del sieclu XX. Pero la economía asturiana ya entró nel sieclu XXI. La industria de bienes d’equipu asturiana ye puntera y de les meyores del reinu, pero nun ye tan intensiva en trabayu como la clásica y básase na teunoloxía, lo que-y permite facer componentes pa la Nasa, pal Ave de Arabia Saudina y pa los principales productores d’enerxía eólica del mundiu, por poner tres exemplos. Ya esa ye la llínia a siguir.

M.A.: Velarde dicía tolo contrario.

D.M.R.: Velarde sigui ancláu nun industrialismu que nun vivió la revolución enerxética de finales del XX y acelerada agora. Hai una gran diferencia ente los dos. Yo conózolos perbien a los dos pero son distintos. Los tres somos d’estructura económica, lo que mos da espaciu común ya una amplitú mires que nun tienen otros economistes, pero pa min Velarde ye historia económica y Tamames ye prospectiva económica. Velarde nunca entendió la custión del mediu ambiente, de xuru que nin tuvo interés por ella. En La Granda llegó a dicir que les enerxíes renovables yeran una bona opción “por si un día había un problema ambiental”. Nel fondu, anque nun lo diga claramente porque ye un home intelixente, nun creye nel cambéu climáticu. Pela so banda, Tamames lleva nestos asuntos dende hai décades, enantes yá de morrer Franco, cuando taba nun PCE pal que lo del ecoloxismu yera cosa de hippies.

M.A.: Y Rivas, ¿qué futuru tien David Rivas pa una economía asturiana, un futuru que nun sía aterrador?

D.M.R.: Ye necesario partir de que la economía que vamos tener dientro de vente años nun se va paecer en nada a l’actual. L’ochenta por cientu de los chavales que güei ta estudiando bachiller nun sabe a qué se va dedicar. El cambiu ye d’una aceleración tremenda. Siempres va haber abogaos porque siempres va haber pleitos y conflictos, como siempres habrá mélicos porque siempres va haber enfermedaes y problemes de salú, pero la mayoría de los que piensen entrar n’economía o n’alministración d’empreses nun sabe tansiquier a qué economía va alfrentase. Y ye’l cambiu enerxéticu ún de los pegoyos d’esa gran tresformación. Garrar la bola cristal y profetizar ye difícile. Pero hai dos llínies con grandes posibilidaes n’Asturies porque ya tienen presente: la agroindustria ambientalmente caltenible y la industria altamente tecnificao, y les dos con manu d’obra de gran cualificación. Eso ya esiste n’Asturies y tien un futuru impresionante. Por eso otru retu ye, como falábamos enantes, caltener l’alta cualificación profesional, que güei ye de les más altes d’España. Y pa eso tenemos que saber retener a determináu seutor: si los profesores colen, ¿quién da clase?; si los inxenieros nun tan na cabeza d’una llínia de fabricación, ¿de quién daprenden los siguientes? Y la xente mozo velo. A min gústenme muncho unes xornaes que fae tolos años La Nueva España que se llamen l’Asturies que funciona o dalgo asina. Yo cuásique nunca puedo dir porque coincide col mio periodu llectivu na Autónoma, pero sígolo na prensa. Esi ye un problema porque ente lo que diz dalguién nun debate, lo qu’apunta’l periodista, lo qu’escribe y lo qu’acaba espublizao, el güevu pue acabar siendo una castaña.

M.A.: Nun acaba vusté de fiase de la prensa…

D.M.R.: Nun ye que nun me fíe. Lo que pasa ye que tuvi demasiaes esperiencies. Los periódicos nun manden siempres a estos foros a profesionales qu’entiendan conceutos tan precisos como los que se pueden emplegar. Hai poco, nun debate sobro desendolcu caltenible, un periodista entrugó que qué significaba la pallabra resiliencia, términu básicu na economía ecolóxica. A lo que diba: lo que más me gustó del cursu pasáu fora que los estudiantes que diben a los actos dicíen, mayoritariamente, lo mesmo que yo digo, qu’Asturies tinía como grandes baces l’agroindustria y la teunología. Pero resulta qu’estes son llínias históricamente non prioritaries pa los gobiernos asturianos y lo mesmo pa los gobiernos españoles. Por exemplu, la I+D+i d’España ye, en porcentax de PIB, más baxa que la de Portugal y Grecia. Con teunoloxía, un modelu agroindustrial bien asentáu nel so entornu ambiental ya un modelu enerxéticu diferente cabría la posibilidá de que, como dicía Tamames, con menos población ficiéramos más, pola mayor productividá.

M.A.: Esi impulsu trendrán que lo dar les empreses ya’l gobiernu.

D.M.R.: Tamién en La Granda, nesi debate, dicía Velarde que nun abastaba con llevantar la bandera de los intereses d’Asturies, con ponese a dar voces nel palaciu de Fruela. Vinía dicir que menos propaganda y menos utopíes. En parte, Velarde tien razón. Pero Tamames dicía otra cosa: que n’Asturies faltaba lliderazgu, lo mesmo empresarial que políticu. Entóncenes pensé: bono, ya que vien ún de Madrid, a ver si lu escuchen, yá qu’equí cualisquier cosa que vien de Madrid ye portada, lo que reafirma la falta de lliderazgu de la que falaba el mesmu Tamames. A los que llevamos con estes coses ya décades pero somos de casa, nunca mos escucharon, ye como si glayáramos en castañéu. Escaeciera Tamames la tercer pata: la universidá. L’últimu ranking dexa a la Universidá d’Uviéu a la cola nel ítem del impautu nel tarrentoriu, que quier dicir que da lo mesmo que tea n’Asturias qu’en Llituania o que n’Australia.

M.A.: Otra custión de mayor actualidá, del agora mesmo, un tema que sabemos que-y preocupa particularmente a David Rivas, fácil de siguir porque lleva varios artículos y munches intervenciones nes redes sociales. Ye una custión vital p’Asturies. ¿Cuálu puede ser, Rivas?

D.M.R.: ¿La financiación autonómica?

M.A.: Efeutivamente.

D.M.R.: Esti tema yá lu tratamos notros programes. Pa entamar, pienso que ye mester ser serios nos debates y ser serios nes metodoloxíes económiques. Por eso me paez que ta fuera de toa llóxica la discusión sobro los federalismos simétricos o asimétricos. Nun creyo que seya bono, por definición, que toles autonomíes respondan a simetríes, que tean la mesma financiación. Si hai comunidaes autónomes que quieren tener poques competencies, llóxicamente tendrán que contar con menor financiación. Si Cataluña ya Euskadi quieren toles competencies tendrán que tener un tipu de financiación diferente al de les que no lo quieren. Euskadi yá tién toles competencies, sacantes defensa ya esteriores, y Cataluña les mesmes menos la soberanía fiscal. Si mañana, como yá se plantega, dalgunes comunidaes deciden devolver competencies al gobiernu central, que les devuelvan, pero tendrán que remanar menos dineru. Esti ye un puntu básicu pa entamar a discutir. Agora, si discutimos sobro l’actual modelu de financiación y la so reforma, entramos en dos asuntos mui preocupantes dende’l puntu de vista asturianu. El primeru ye’l cálculu, la fueya de cálculu. Equí hai que lluchar duramente pa que se ponderen más la dispersión poblacional y l’avieyamientu, especialmente la dispersión. Dalgo se avanzara col frente común fechu por Cantabria, Castiella y Llión, Galicia, Asturies y Aragón. Pero resulta que cada vuelta qu’aconceyen, con puntos comunes y con discrepancies, siempre hai una de les cincu comunidaes que saca menos o nun saca res.

M.A.: ¿Asturies?

D.M.R.: Asturies. Pa que se vea aú tamos llegando, a Asturies nun va llegar dineru suplementariu nin pa erradicar la plaga del plumberu de la pampa, lo que va multiplicar por dos el tiempu pa consiguilo, si ye que se consigui. Pel so lláu, hai unos díes Cantabria, nuna d’eses reuniones nes que ta Asturies, nun tando ausente, sacara de la Unión Europea 150 miyones pa facer frente al problema, cosa que fixo al traviés d’un pautu cola alministración central.

M.A.: ¿Y cómo se come eso de que Cantabria reciba aída pa erradicar los plumberos y Asturies non na mesma ronda reuniones?

D.M.R.: Supongo que les anchoes de Santoña que lleva Revilla tendrán el so aquello, mientres que Fernández brinda con vino español. Cualisquier gobiernu central y lo mesmo n’Europa sabe que los gobiernos asturianos, ún tres otru, nin quieren negociar nin-yos interesa, nin defiende los asuntos d’Asturies. Tol mundiu sabe de la indolencia d’Uviéu y de que ta más preocupáu pola llingua nos colexos catalanes. Tóos saben qu’al gobiernu asturianu lo que más-y prestaría ye tener entá menos competencies de les que tién.

M.A.: ¡Nun lo puedo creyer!

D.M.R.: ¡De xuru que nun me lo creye nin los oyentes tampoco!

M.A.: ¡Nun pueo creyer lo que ta vusté contando! 

D.M.R.: Quédamos otru asuntu perimportante que ta pasando agora y que ye un auténticu despropósitu: les quites de la delda. Resulta que les comunidaes que nun cumplieron lo apautao y saltaron los compromisos de déficit van ser beneficiaes con una quita por parte del gobiernu central. Son los casos de Cataluña y Valencia. A esta última acaben de perdonái ata les deldes del puertu de la so capital. Eso quier dicir que les comunidaes que cumplieron, que cumplimos, munches vegaes con grandes costes sociales, vamos pagar otra vuelta los desbardies de Cataluña y de Valencia. Por cierto, Cataluña ye la comunidá cola peor política social de les diecisiete na última década. Vaya, qu’el déficit nun se xeneró n’hospitales y dependientes precisamente. Porque podríamos entender una quita porque hubo un terremotu, o porque tienen una cris sanitaria… Pero ser solidarios colos que son más ricos que tu, alministraron peor, incumplieron tolos alcuerdos y tienen peor política social, nun tién xacíu nin responde a denguna política económica razonable, aparte de meter manu otra vuelta nel bolsu’l contribuente que yá pagara polos axustes y l’austeridá presupuestaria. Y si yá falamos de soberanía y d’autonomismu, ¿qué vamos dicir?

M.A.: ¿Y el turismu, ta enfocándose bien n’actualidá?

D.M.R.: El turismu n’Asturies ta bastante bien porque nun ye mui agresivu. Los que somos d’equí y vamos a la playa, vémosla abondo llena. Podemos facer ata’l discursu que faen los xenófobos: esto nun soporta tantu mesetariu. Pero nun ye asina. Nun tenemos demasiao turismu y, amás, el que tenemos nun ye mui estrozón. Estrozamos más nosotros colos planes urbanísticos que lo que faen los turistes por sigomesmos. Y pa san Xuan nun hai munchu turismu y la playa de Poniente en Xixón acumula tonelaes de mierda, de plásticos y d’otres coses. El turismu n’Asturies nun llegó al puntu saturación, sacantes en dalgunos llugares. Sedría mester calcular esi puntu, porque hai téuniques pa calculalu, pa los llagos de Cuadonga y, si se llega, se pieslla’l parque y acabose. Hai playes que nun aguanten más, riba tóo nel oriente. Les d’occidente carecen menor presión. Una playa como la de Xixón, San Llorienzu, que ye una playa urbana, aguanta bien porque ye una sablera yá degradada, al tar integrada nuna ciudá de trescientos mil habitantes. Pero, por exemplu, Gulpiyuri nun soporta ecolóxicamente tanta presión. Ye una sablerina pa que vaigan cuatru. Nun ta nin tansiquier pa que vaigan los del conceyu de Llanes. Nun ye problema de los madrilanos, los valencianos, los de Sevilla o los de Bilbao. Pero, respondiendo a la entruga, nun ta bien enfocao esti turismu porque sigui entá los parámetros de sol y playa d’hai décades y del Mediterrániu. ¿Qué una semana llueve muncho?, ¿y qué? A min faenme gracia dalgunos turistes, también xente d’equí, con eso: “lo que más me gusta ye’l paisax, tan verde, y lo que menos que llueve muncho”. Un apunte: a les cuatru la tarde nun pueblu de Córdoba tol mundiu ta en casa, nel bar o nel hotel, porque fuera tan a 42 graos. Si n’Asturies llueve ta’l chigre, el muséu o’l paragües, que naide muerre d’orbayu y sí de güelpe callor. ¿Por qué ye razonable lo d’Andalucía y non lo d’Asturies?

M.A.: Pero ye que vusté ye de lluvia.

D.M.R.: Sí, yo soi de lluvia, anque los díes soleyeros tamién los esfruto. Pero prefiero esti clima qu’otros. Ya eso qu’esti añu la mio muyer ta enfurruñada porque’l mes de xunetu dexola ensín les fabes.

M.A.: Otru día falaremos del turismu, ¿val?

D.M.R.: ¡Sí, ho! Yá vengo yo con dalgunos datos, non como güei, que vine ensín preparar nada.

M.A.: David Rivas vien siempres preparáu a La Buena Tarde.

D.M.R.: Siempres convién afitar les opiniones en dalgún datu. Yo neso soi mui pudorosu y prudente.

M.A.: Ya sabe David Rivas qu’equí, en La Buena Tarde, tien el cafetín con pingarates cuando quiera.

D.M.R.: Val, val, munches gracies.