Xueves de comadres, l'entamu l'antroxu

El final del ciclu iverniegu asturianu pieslla col antroxu, tamién conocíu como antroidu y antroiru. El términu antroxu procede de la palabra llatina introitum, entrada, porque ye cuando la primavera ta abriendo la puerte. De siempres que fuera una de les principales fiestes del añu, amás de ser de les que más allargaben nel tiempu, porque podría tratase cuásique d’una selmana entera, de xueves a martes. Eso, tanta folixa nuna sociedá rural tradicional afitada nel autoabastecimientu, llevaba al esbardie.

Col antroxu, pesllando’l ciclu iverniegu, acababen tamién los samartinos, que, centrales nel ciclu serondiegu, entamaben, como mos diz el nome, por Samartín. Si nuna casería nun mataran pal antroxu ye porque nun había daqué, porque nun tiníen. Yá’l refraneru mos recuerda que

Antroxu fuera,

el que nun mate

nun come morciella.

En munchos llugares d’Asturies, como del restu d’Europa, l’antroxu entamaba col xueves de comadres, una cellebración nel que la muyer ye’l centru. Ata hai poco tiempu los afiaos facíen homenax a les sos madrines, munches vegaes en romeríes onde namás que participaben elles, los neños y les madres d’esos neños, quedando más o menos al marxe los paisanos. Dende siempres se vien diciendo que

El xueves,

bon día pa les muyeres.

Esta fiesta, como otres munches tres la rotura de la sociedá tradicional, o desapaeciera o tresformárase. La tresformación más importante viniera hai tres o cuatru décades, cuando, na voráxine’l final del franquismu ya’l nacimientu d’una sociedá más abierta, les muyeres –y mui específicamente les feministes- alcontraron nesti xueves una triba revindicación. En Xixón, la ciudá asturiana más lliberal dende siempres, yá veníen cellebrando les comadres el so día dende los años sesenta, con fiestes privaes, anque munches vegaes en llugares públicos como cafés ya hoteles. Hai que notar que l’antroxu, non namás que la fiesta comadres, taba prohibío embaxo’l franquismu. A Franco, a los militares y a los falanxistes de xuro que-ys daba lo mesmo, pero fora la ilesia católica la que persiguiera con saña al antroxu, una fiesta que consideraba de raigañu paganu.

La tardi de comadres cellébrase agora, y tamién enantes, en munchos llugares d’Asturies, pero nalgunos sitios sobrovivió con más xixa y, tres el franquismu, resurdiera potente. En Grao, anque nun tien dengún calter específicu, congrega dende siempres a munches muyeres. N’Avilés ye fiesta mui ruidosa pero ensín gran tradición y tién como atractivu fundamental la nuechi caliente, que da más pa analises sobro la subcultura porno que sobro antropoloxía cultural.

Ye en Xixón y La Pola (conceyu de Siero) onde meyor se conservara la tradición, anque, evidentemente, mui alteriada pola llarga nueche prohibicionista y la cris de los antigos modelos tradicionales. En Xixón cellébrase una romería en La Talaya, nel gumiu de Santa Catalina, onde traten de reproducir de dalguna manera la fiesta de madres, madrines y neños d’antaño, magar que, llóxicamente, nun se puede llegar a tanto. Ente otres coses, anque puea paecer anecdótico, nun se reproduz del tóo porque ente les asociaciones  organizadores nun ta, precisamente, mui consolidada la figura de la madrina, porque la madrina ye la que lleva al neñu a la pila bautismal cristiana. La madrina xura entós, ante la ilesia, llevar pel bon camín al so afiáu si faltara la so madre. Nostante, la figura de la madrina ye de raigañu ancestral, quedando na mitoloxía nórdica y xermánica como la fada que curia pol neñu, una triba d’ánxel de la guarda na tradición oriental qu’heredara’l cristianismu. Tóos sabemos, anque seya pola película de Disney, de les tres fades madrines de Cenicienta, que representen, a un tiempu, les tres virtúes teologales.

Ye interesante remembrar que la dirección de la vieya fábrica tabacos de Cimavilla, güei desapaecía ya en procesu de rehabilitación pa otres funciones, permitía esi xueves a les trabayadores salir tres cumplir media xornada, pa que comadraran, costume que data, asigún documentos, de, cuando menos, 1885.

La Pola –dicen qu’el pueblu más festeru d’Europa- cellebra, ensin duldia dala, la fiesta les comadres mas antigua de cuantes tenemos datos. Yá en 1837 apaez nes cróniques, diciendo que trátase d’una tradición que vien de munchos años atrás. Paez ser qu’enantes del xueves de comadres, un par de selmanes enantes, cellebraben un xueves de compadres, pero esta fiesta masculina de padrinos, padres y afiaos, nun pasó de finales del XIX, amás de nun gociar de munchu raigañu. Ye propio de La Pola el bollu comadres, pal que nun hai una receta única, siendo unos mui acurasanaos ya otros más consistentes. Lo que si lleven tóos ye mantega, cuásique nunca presente como ingrediente notros bollos preñaos que se-ys paeza. Los paisanos polesos, siempres recelosos del xueves de comadres, dicíen qu’a les muyeres prestabá-ys el bollu preñáu porque siempres tinía’l chorizu dientro.

En Villaviciosa tamién se cellebra dende siempres el xueves de comadres, anque con característiques peculiares. Equí los xóvenes, lo mesmo mozos que moces, xuben al monte Cubera y tan ellí de folixa ata dempués del atapecer. Asigún la tradición, les úniques persones mayores que pueden dir con ellos son les sos madrines. Tamién equí ye’l bollu preñáu la vianda principal y tien centralidá como bébora la sidre. Dalgunos autores piensen que nes comadres de Villaviciosa entemécense fiestes d’antroxu con fiestes d’iniciación sexual, averándose un tanto a les matronalies, les fiestes que les muyeres casaes cellebraben n’antigua Roma.