Soltaran a los neños
El Fielato y El Nora, 29 d'abril
El
gobiernu abriera la manu y permitiera que los neños salgan de casa una hora al
día pa qu’esparzan. Tan los medios de comunicación enllenos d’especialistes en
psicoloxía, n’educación, en pedagoxía…, ensín dexar de lláu tolos contertulios
televisivos que, dempués de paecer catedráticos d’economía hai un añu, de
microbioloxía en febreru y d’epidemioloxía en marzu, agora sonlo en psicoloxía
infantil. Tóos, lo mesmo los espertos que los charranes, falen de la necesidá
que los neños tienen de tar al aire llibre y de xugar ensín programación. Ye
verdá que la situación nun permite tola necesaria llibertá que se propón, pero
esti debate llévame a otra custión.
Hai
yá tiempu que los neños dexaron de selo a partir de los cincu años, más o
menos. Escolarizaos dende bien pequeñinos, son homes y muyeres en miniatura a
los que preparen dende’l trubiecu pa ser persones d’ésitu, productives, bien
adaptaes pa trunfar na vida. Na guardería, conforme a los horarios llaborales
de los padres, que, nel meyor de los casos, ye media xornada, tienen rutines de
mayores: papá y mamá salen de casa pa dir a la oficina o a la tienda ya’l neñu
a la guardería, el so centru de trabayu.
Con
cincu años más o menos ya tienen profesor d’inglés, xuegos educativos, natación o pianu. Cuando lleguen a la escuela daprenden
coses útiles, dende lleer ya escribir ata les operaciones básiques
matemátiques, cosa que nun recomienda, per otra parte, el modelu educativu de Finladia
que, dicen, ye’l meyor del mundiu. Pero, non conformes con un horariu escolar
de fábrica’l metal, entamen les actividaes estraescolares: sigui l’inglés,
igual el deporte decae o cambia ya’l neñu que facía natación pasa a baloncestu
porque na so escuela hai un bon equipu y, si van a colexu d’altu copete, igual
ata lu ponen a montar a caballu, nuna pista, eso sí, que cabalgar a lo
campesino nun ye cosa de prestixu.
Nun
hai yá dengún resclavu de diversión sinón una dura preparación pa una vida
competitiva na que, darwinismu ramplón mediante, namás que trunfen los meyor
adaptaos. El neñu, yá cuásique adolescente, nun ficha como pa entrar nuna
empresa pero la so cuotidianeidá ye mui asemeyada. De les seyes hores de
guardería pasárase a les ocho d’escuela y a les diez o doce de vida llaboral. Y, al acabar el día, dempués
de xugar un poco col tecláu, pa la cama mayaos, sabiendo qu’el día viniente va
ser esautamente igual.
Nun
soi espertu nestes materies nin contertuliu habitual espertu en toles materies,
pero paezme que la decisión de sacar a los neños de casa, que seguramente ye
mídía pensada y bien articulada, yera más necesidá pa los padres que pa los
neños. Dase cuenta de repente de qu’un neñu ye un neñu y que, cuando nun tien
horariu d’oficina, ye imprevisible, creativu, revolvín… nun debe ser gracioso
y, dase cuenta de que nun sabes cómo tratalu debe ser mui frustrante.
Pero
esi ye’l modelu que tenemos, unos porque optaron por ello ya otros porque nun
tienen más remediu qu’aguantalo. Si esta crisis sirve pa dalgo tamién nesti
asuntu, nun taría de más.