25 de mayu
El Fielato y El Nora d'esta selmana.
El
25 de mayu de 1808 ye la fecha más importante de la historia
contemporánia d’Asturies.
Cola corona abdicada pol calzonazos de Carlos IV y col so fíu
Fernando, de mala corada y felón dende’l trubiecu, el que diba ser
Fernando VII, aclamáu pola plebe madrilana glayando “¡vivan les
cadenes!”, España dexaba d’esistir. Nunca España fuera una
nación porque ñaciera como imperiu cuando de la dinastía de los
Trastamara pasara a la dinastía de los Austria. Y agora, escontra
les bayonetes de Napoleón, nin nación nin imperiu. Alcalá Galiano
dexáralo claro: “España nun ye una nación y nunca lo fuera”.
Como
bien escribiera Ortega, un españolista poco sospechosu, cada vuelta
qu’hai un problema gordu siempres responden “les rexones y les
provincies”. Esta vegada, 1808, Asturies respondiera como nación,
entendida dende un puntu vista modernu, non míticu nin entemecíu
nes borrines de les lliendes medievales, rellatos metada históricos
y metada simbólicos.
Escríbelo
lluminosamente Pí i Margall, el gran teóricu revolucionariu del
federalismu de fines del XIX. “Allevantóse la primera Asturies,
que tamién fora la primera contra los árabes. Ensin entrugar a
denguna les sos vecines, ensin oyer otra voz que nun fora la de los
sos ermunos sentimientos, encadarmó un gobiernu de so, declaró-y la
guerra a Napoleón, organizó tropes y nun tuvo taramiella pa
despachar embaxaores que colaran a solicitar el sofitu d'Inglaterra.
Taba entóncenes aconceyada n'Uviéu la Xunta Xeneral del Principáu,
ayalga -diz el conde de
Toreno-
dichosamente guarecía del cuasi xeneral esfarrape los antiguos
fueros. Asturies invistióla cola suma autoridá y enfotó nella los
destinos de so”.
El
somedán Álvaro Flórez Estrada, educáu por Smith y Ricardo
n’Oxford y amigu de Mill, lliberal, francmasón, socializante y,
tamién, el más grande economista que diera esti país, presidiera
aquella Xunta. Escribiera nesos díes de mayu: “la
llucha contra l’invasor nun tien xacíu si nun ye a un tiempu una
revolución política”. Pa elli, que los amos foran los borbones o
Napoleón yera indiferente. El so gobiernu llama a les armes a villes
y conceyos y recluta un exércitu, al tiempu qu’unvía , como diz
Pí i Margall, al conde de Toreno a solicitar una alcordada con
Inglaterra. L’uvieín aconceya na cámara los lores, qu’aceuta
les condiciones, y los comunes apreben mandar tropes al mandu de
Wellington. Sedría interesante conocer los argumentos que los lores
emplegaron pa responder a la entruga de Xurde III: “estos
d’Asturies, ¿tienen llexitimidá y soberanía?”. El casu ye que
respondieran que sí.
Los
conceyos y les villes, dende Castropol a Santiyana y dende
Villaviciosa a Babia, dende Sayambre a Xixón y dende La Llébana a
Degaña, reclutaron homes y punxeron los sos recursos al serviciu
de la Xunta Xeneral. Llevaron los sos pendones xunta la bandera azul
cola cruz áurea de la victoria, reclamando pa sigo la heredá del
reinu ñacíu en Cuadonga, la llexitimidá de Cangues, de Pravia y
d’Uviéu. Yera una nación en pie y llevantada n’armes. Facíalo
pola llibertá. Yera l’Asturies “enxamás vencía”.
