"Valorar lo más importante: la solidaridá"

Alejandro Fonseca: Despedimos yá a José Antonio Fidalgo pero no se vaya todavía que lo quieren saludar. David Rivas, bona tardi.

David M. Rivas: Bona tardi ya un abrazón a Fidalgo, el profe.

José Antonio Fidalgo: ¡Qué bárbaro! ¿Qué tal por esa Villaviciosa fermosa que lleves dientro?

D.M.R.: Mui bien. Tan los pumares de puta madre. Con esto del confinamientu, como nun vienen paisanos pel rural, tan les abeyes polinizando a mamplén.

J.A.F.: Don Fermín Canella, que fora rector de la universidá, autor de varios llibros qu’el profesor Rivas conocerá meyor que yo, brañaba en Colunga, en Vistalegre. Diba muncho per Llastres y tinía un amigu marineru, gran bebedor de sidre, al que llamaben Ramascón. Yá saben qu’en Llastres tóos tienen ñomatu. Esti yera Ramascón. Canella siempres-y cuntaba histories, desaxerando muncho, al estilu tradicional. Una vegada diz Ramascón: “¿cómo a vusté, don Fermín, siendo tan burru, pudieron facelu rector, home?”. El casu ye, cuenta Canella, que diba con Ramascón per Vistalegre cuando taben les pumaraes en plena flor y diz Ramascón: “don Fermín, la madre que lo parió, la d’hosties que van llevar esti añu les muyeres”. Pensemos nel razonamientu de Ramascón: hai muncho flor de pumar, va haber muncho mazana, va haber muncho sidre, va haber munches borracheres y va haber violencia machista, que diríamos güei.

A.F.: Afortunadamente yá pasara munchu tiempu d’eso.

J.A.F.: Sí, ho. Les pumaraes yá nun son como les d’antaño, la sidre yá nun ye como la d’antaño nin los bebedores de sidre somos como los d’antaño.

D.M.R.: Y tampoco les muyeres son como les d’antaño.

J.A.F.: Tampoco, tampoco. Pero, en fín, roxes o morenes… ¡sí, sí, sí!

A.F.: Agora sí que dispidimos ata la selmana que vien a José Antonio Fidalgo.

J.A.F.: Un abrazu pa tóos y particularmente pa Davicín Rivas. ¡Y cuidensén!

A.F.: Siguimos con amigos. A David Rivas siempres lu llamamos cola escusa de ser un bon pensador, un bon analista y, tamién, anque nun presuma d’ello, un gran economista. Pero güei tamién lu llamamos pa que mos fale de les sos emociones nesti tiempu de reclusión.

Monchi Álvarez: Sí, queremos saber cómo lo ta pasando en pueblu. La verdá ye que nun vive nada mal nel pueblín, como sabemos poles coses que pon nes redes sociales.

D.M.R.: En pueblu vívese meyor esta situación. La vida nun mos cambiara muncho. Eches de menos dir al chigre, echar la partidina, lleer el periódicu tomando’l vermutín… La mio vida ye la de siempres: trabayar na biblioteca, abeyar un poco pel facebook, echar de comer a les pites, segar el prau, cortar lleña, cuchar los pumares, dar una vueltina col mastín… Ye más llevadero porque nun ye un encierre.

M.A.: ¿Nun tuviera esa sensación de montaña rusa, de baxones y xubidones, de tar bien agora, más lluéu mal, dempués regulín?

D.M.R.: Yo llevelo bien tolos díes porque, como dicía, la mio vida nun cambiara muncho. Sí qu’hai una cosa que noté: duermo peor. Nun sé si sedrá polo que ta pasando. Ye más: yo nun teo pesadilles normalmente ya últimamente téoles. Ye probable que seya efectu de tanta información sobro la pandemia, de nun ver a la xente que quies… Nun veo a mio madre dende febreru ya échola muncho de menos. Ta bien, falo con ella, ye peleona nes redes… Pero son 85 años y vive sola.

M.A.: ¿Qué-ys diría a los urbanites qu’agora miren pa los pueblinos, buscando una casa, un prau pa edificar, por eso de que si vien otra pandemia que mos garre n’aldega?

D.M.R.: A min eso paezme una patochada, una desaxeración. Pienso que cuantisque pase esto la xente volverá a la normalidá, anque seya otra normalidá, y siguirá viviendo como vive. Puede que dalgunos sí que tomen esa decisión, pocos, pero habralos. Ya ye cosa bono, lo mesmo pa ellos que pal mundiu rural, que revive, riba tóo si vienen con neños. Pero acudir a la ruralidá por profilaxis sanitaria ye malo pa los pueblos y pa la xente que tome esa decisión.

M.A.: Vusté ye un bon analista y, como profesor d’economia, ¿qué va pasar dempués d’esta cris sanitaria y, seguramente, nel horizonte d’una cris económica?

D.M.R.: Yo soi más optimista escontra’l futuru. Paezme qu’hai demasiaos agoreros, demasiaos páxaros de malagüeru. La cris que mos vien, siendo fuerte, nun ye como les anteriores. Nun hai un problema de producción nin de productividá, tampoco de solvencia. Les empreses tan preparaes, non como nel 2008 o 2010. Si sabemos facer les coses medianamente bien la reactivación económica pue ser bastante rápida. Los que me conocen, ustedes mesmos, los de La buena tarde, saben qu’afuxo del optimismu y del pesimismu n’economía. Nun me gusten eses coses, anque ye verdá que dan audiencia, sobro tóo ser pesimista y dicir que l’euru funde, qu’el paru va ser tremendo, que la miseria va apaecer per toles esquines… Pero sí quixere poner un puntín d’optimismu nesti momentu. La cris yá ta equí, pero nun creyo que lleguemos a la depresión. La Unión Europea, llenta y pesada, ta respondiendo bien y lo que dalgunos llamen rescate nun ye un rescate, sinón poner en marcha mecanismos de solidaridá. Ye que tenemos un problema de lliquidez, non de solvencia, que yera lo que pasaba hai diez años. Agora, tamién ye verdá qu’hai xente a la qu’esto va garrala de frente y va pasalo mal. Pero pa eso hai polítiques pensaes, pa paliar lo meyor posible l’asuntu.

A.F.: Tamos daprendiendo a alfrentamos a coses que nun esperábamos, daprendiendo del confinamientu.

D.M.R.: Tamos daprendiendo munches coses. Yo, personalmente, daprendiera muncho nestes selmanes. Siempres fuí mui tochu cola tecnoloxía. Soi mui analóxicu, llegué mui sero a lo dixital. Pues resulta que sé facer coses col ordenador que nunca maxinara que diba ser a ello. Pero lo importante ye que paezme qu’entamamos a valorar el vivir d’otra manera. Eso de que la nuesa vida ye allegre, que somos la del demoñu porque tamos en chigre tol día, que somos abiertos y campechanos, más cantarinos que dios… Tóo eso tamos relativizándolo. Daprender un poco de los nórdicos, de la Europa central, d’esi calvinismu tan seriu, nun mos vien nada mal. Dir a cenar d’otra manera, que la espicha seya un ritu conforme al calandariu y non tolos sábados, pagar más poles copes pero menos vegaes… Ya yo quixera incidir nun asuntu particularmente importante y que quiero pensar que nun lo vamos escaecer nunos menses: daprendimos a valorar lo importante. ¿Y qué ye lo importante? Lo importante ye la solidaridá, damos cuenta de que dependemos unos d’otros, que ye mester protexer a los más vulnerables porque, a la fin, tóos somos vulnerables. Escontra cualisquier güelpe de la naturaleza, como ye un virus, tóos somos débiles y tóos dependemos de los demás. Si tenemos en cuenta que mos vien un cambiu climáticu a la vuelta la esquina, esa valoración de lo común, de lo público, ye perimportante. Y ver que l’estáu debe articular polítiques sociales y tamién, eso sí, curiar que nun se te meta na cama, porque les crisis son tarrén cuchao pa los autoritarismos y los totalitarismos.

A.F.: Tamién tamos daprendiendo a tomar decisiones equilibraes ente lo sanitario y lo económico.

D.M.R.: Tamos nuna situación na que nunca pensáramos. Los científicos sí que pensaran nuna coxuntura como esta. La xente de ciencia siempres da por descontao una pandemia, non esta concretamente y con estes característiques, pero siempres lo tienen nos sos modelos proyectivos. Tamién dan por descontao qu’un día saltará pelos aires una central ñuclear, anque igual nun pasa nunca. Lo que nun ta previsto ye la reacción social nin tampoco l’actitú de los gobiernos. Si de dalgo mos puede servir esta pandemia ye pa preparamos pa lo que puede venir, pa los siniestros que yá asomen n’antoxana, Yá lo falamos otres vegaes: el riesgu ya’l siniestru nun ye lo mesmo. El siniestru ye inevitable, pero’l riesgu ye’l cálculu de la probabilidá del siniestru.

A.F.: Supongo que la economía tien modelos, formulaciones incluso matemátiques, pa tomar decisiones. Pero, caro, al nun tener esperiencia sobro estes coses…

D.M.R.: Nun tenemos esperiencia en cómo afrontar una cris sanitaria. La última pandemia fuera la del gripe de los años venti. Fuera terrible, siendo un virus menos peligrosu qu’esti d’anguaño. Pero la ciencia ye cada vuelta más rápida ya eficaz. A los dos díes de declarase la epidemia en China yá sabíamos de protovacunes, de retrovirales, d’un montón de coses nes que nun entro porque nun sé nada d’esto. La verdá ye que me veo como un idiota arrodiáu de grandes espertos en microbioloxía y pandemies, tóos ellos nes tertulies de televisión. Cobrarán por ser tan llistos, que yo na RPA contenteme con una copa que me pagó Monchi Álvarez. Paez ser que Arantza Margolles va regalame un retratu de mio mesmu, la mesma persona, que ta faciendo. Normal: yo nun sé nada. Pero pa la teoría económica esta situación nun ye nueva. Tamos delantre d’una cris de demanda, asimétrica y con una temporalidá difícile de valorar. Pero hai mecanismos, más o menos keynesianos. Digo más o menos porque nun tamos nos años trenta y la teoría de Keynes ta caduca, pero entá podemos beber d’ella. Por exemplu, una cosa simple, tenemos la renta básica, la renta mínima, como queramos llamalo. Eso nun ye una ocurrencia de Pablo Iglesias o de Yolanda Díaz, non. Hai trenta años que se lleva estudiando cómo aplicar esa midía y más de venti aplicándose en diez o doce países, sabiéndose mui bien cuálos son los sos efectos. Nel fondo ye caltener la demanda agregada, tirando de la demanda pública y la política social ata que la demanda privada se recupere y camude’l ciclu. Ye lo que de tola vida se llamó política anticíclica, una política capitalista que namás llevaron alantre gobiernos esquierdistes, entamando por Wicksel en Suecia y Roosevelt nos Estaos Uníos. Nun ye la panacea nin una política pa siempres, sinón una política económica.

A.F.: Nesi contestu la Unión Europea ye pieza fundamental. Fálase de reconstrucción, cuásique llevándomos a un llinguax postbélicu.

D.M.R.: A min eses pallabres qu’inventen los periodistes y los asesores d’imax de los políticos nun me presten res. Entá me recuerdo d’aquello de la reconversión, un términu relixosu, volver a convertise. Babayaes, pallabres que nun signifiquen nada. Pero, al final, tóos acabamos por emplegales. La Unión Europea ta, nesti momentu, xugándose la so mesma esistencia. O tenemos más Europa o la Unión funde y los países detrás d’ella. La ultradrecha ta enchipada contra la Unión Europea, emplegando argumentos qu’inventó una esquierda imbécile hai trenta años. La Unión Europea ye la única solución, la gran baza, y si lo fae mal tará cavando la so tumba. Asina de claro. O Europa respuende con más unidá, con más competencies, con una única voz nel mundiu, o sedrá otru proyectu utópicu tiráu nes cunetes de la historia. Asina de claro.

A.F.: Un momentu duru, profesor, pero impresionante.

D.M.R.: Nun me recuerdo quién forta’l que dixo eso de “yo te maldigo, que vivas tiempos interesantes”.

M.A.: Nun creyo que lo dixera Kiko Rivera o l’hermanu.

D.M.R.: Non, nun me pega de Paquirrín, nin tampoco de dengún dirixente de la Internacional Borjamari.

M.A.: ¡Qu’afición tan garrando los borjamari a les cacerolaes!

D.M.R.: Tan echando a la pota una afición del copón. Debe ser la primera vegada que garren una garcilla ya una tartera.

A.F.: El casu ye que recetes poques. El profesor Rivas nunca va de profeta, nun vaticina como otros munchos y llimítase a desplicar les coses y a vislumbrar cómo van evolucionar. Muchísimes gracies pola so disposición, la que tien siempres.

D.M.R.: La verdá ye que siempres me llamen vustedes pa lo mesmo, pa que cuntie coses que nun tienen xacíu. Monchi Álvarez va entendeme: esto ye l’espíritu del 9.

M.A.: Al aparatu.

A.F.: Un abrazu.

D.M.R.: Pa vustedes otru y saludos a los oyentes.