El repunante como categoría científica
Pué que pal repunante ser
talo seya una manera de comportase nel mundiu, una manera que podría resumise
nuna máxima: si nun-y gusta como soi,
cambie vusté. El repunante sabe qu’el problema de ser sarcásticu ye que
provoca que, en munches ocasiones, la xente recházalu por una prepotencia que
nun tien, porque elli vese como una persona que, cenciellamente, aplica la
llóxica. Ya, entóncenes, escontra esta actitú de los otros, simplemente diz
que, como-y importa muncho la opinión de los demás, ponse mui atristayáu. Esa
ye la razón pola que pásalo mui mal cuando ve que los fíos d’una moza o d’un
mozu que tuviera hai tiempu son mui feos. Y pásalo mal por l’otru, porque
piensa qu’eso nun pasaría si los neños foran tamién suyos.
Un gran repunante como
Bob Marley resumiera perbien la custión cuando, ente guitarrina y trompetona,
cantaba aquello de que yera responsable de lo que dicia y non de los qu’otros
entendieren. Hai inclusive una corriente más radical. Un tal Chus de Nazaret,
siendo neñu, escapó de la manu la madre nel mercáu la capital. La probe muyer
anduvo tol santu día percorriendo los caleones ata que lu alcontró d’espirica
colos sacerdotes. Riñéralu pola preocupación y el miéu que pasara y va’l
carapih.o y diz; “¿qué pasa, nun sabes que debo d’ocupame de les coses de mio
padre?”. María, qu’asina se llamaba la bona madre, miró con xeitu de munchu
aguante pa un cielu que cruciaba una palomba blanca. De grande fundara una
escuela que sigui viva y los más estremistes d’ella formen el Círculu de Texas,
que trabaya sobro la cantidá de problemes sociales que se podría solucionar con
una motosierra.
Pero, más alló de
l’autoidentificación del repunante, vamos dir a la so conceptualización
académica, formada dende fuera. ¿Ye’l repunante una categoría científica?
Vaigamos por partes. La ciencia ye la suma d’un obxetu ya un métodu. Entóncenes
la entruga ye otra: ¿ye’l repunante un obxetu d’analís pa la ciencia al que más
lluéu daplicaremos un métodu, yá seya sociolóxicu, antropolóxicu o inclusive
teolóxicu? Analicemos lo que los científicos dicen del repunante, aplicando un
criteriu de demarcación positivista que podríamos encuadrar nel falsacionismu
sofisticáu de Lakatos y la so teoría de los programes d’investigación.
Alcuentren estos
investigadores dos característiques nel repunante: el sarcasmu y la ironía. Son
categoríes non esclusives del repunante, pero valores representaos conforme a a
distribución ɸ, tamién llamada normal, gaussiana o laplaciana, raramente
s’alcuentren fuera de la muestra estadística de los repunantes. La razón
empírica llévamos a que, como escribiera el divín marqués de Sade, ye
fonderamente raro que quien tea munchu conocimientu seya al empar mui amable.
Por eso una de les característiques del repunante ye la de, coincidiendo cola
so mesma autodefinición, ser espertu n’aparentar que-y interesen les opiniones
de los demás. La sabiduría popular yá mos falaba d’esti fechu diferencial
cuando, acudiendo por exemplu al refraneru asturianu, dizmos qu’al repunante,
como al gochu, máteslu o déxeslu.
Esto polo que cinca al
sarcasmu. Analicemos agora la ironía. Esta figura comunicativa va íntimamente
lligada a la risa, pero non a la risa qu’una actitú o una esposición provoca en
terceres persones receptores, sinón a la que provoca, delles vegaes silente,
nel emisor. Rise ye bono. Dicen los anatomistes que tonifica los músculos de la
cara. Tamién opinen lo mesmo les industries químiques que forren la so riñonada
con cremes d’aloe vera (que ye una planta como los borbones, de la que se
descubre cada día nueves propiedaes), y d’acidu hialurónicu (qu’hai dos años naide
nun lu conocía y agora val pa tóo y ata los disléxicos ensín estudios saben
pronuncialo), productos pa tapar les engurries d’espresión. Pero mester ye rise
al mou humanu, que tamién rin les yenes y nun entienden los chistes.
El repunante risi, riba
tóo, de sigomemu. Ya esto por dos razones. La primera porque, por definición,
considera la so visión del mundiu muncho más rica y divertía que la de los otros.
La segunda, íntimamente lligada a l’anterior, porque nun-y interesa de los
demás los chistes nin los comentarios cachondos porque xúlgalos cuasique
siempres chabacanos y de mal gustu. Amás, siguiendo a Bentham y a Mill,
alcontramos tamién un ellementu utilitarista nesta visión: aquelli que se rí de
sigomesmu ye perafortunáu, porque nunca-y va faltar motivu de diversión. Amás,
el repunante sabe que si nun se rí ún de sigomesmu, la vida va facese más
llarga de lo que ye y, entá peor, acabando de maltomáu.
Como bien dicía Eben
Alexander, la risa y la ironía son los medios qu’utiliza’l nuesu corazón pa
recordamos que nun somos prisioneros d’esti mundiu, sinón viaxeros de pasu. El
gran neurociruxanu ponía’l deu na llácara: el repunante tien un espíritu trescendente.
Por eso hai tantos repunantes ente los francmasones, especialmente nos que siguin
la marca de la Gran Lloxa Unía d’Inglaterra. Ellos saben mui especialmente,
porque pa eso siguin ritos ancestrales y xuramentos medievales, qu’un home
llega averase a eso que llamen sabiduría
cuando, viendo películes d’adolescentes persiguíos de nueche pela biesca o
acorripiaos nuna casa victoriana, ponse de parte del psicópata.
Alcontrar lo cómico en
tóo ensin perder la seriedá ya’l puntín de sarcasmu impertinente, ye de
repunantes. Dizlo mui clariquino’l protagonista d’una de les principales
películes de cultu de la historia’l cine, Bitelchus:
“viera L’exorcista 169 vegaes y cada
vuelta la encuentro más graciosa”.
Na lliteratura
contemporánia, si hai un personax que representa la sencia del repunante ye
Guillermo de Baskerville, esa fusión de Sherlock Holmes y Guillermo d’Ockham,
tresuntu al empar de Hume y Montaigne, que ye’l protagonista de la novela d’Eco
El nome la rosa. El so discípulu, el
noviciu Adso de Melk, remembra: “na mio tierra, cuando dalguién fae chanza, diz
dalgo y dempués ruempe a rir escandalosamente, pa que tóos rían cola broma; el
mio mayestru Guillermo, en cambiu, namás ría cuando dicía coses series, y
manteníase perseriu cuando yera suponer que taba bromeando”. Nun escaezamos que
tol misteriu de l’abadia esñala al rodiu d’un llibru sobro la risa escritu por
Aristóteles y refugáu polos padres de la ilesia y persiguíu xabazmente, dando
por segura la so esistencia, pola inquisición, aquellos dominicos que foran
exemplu paradigmáticu de maltomaos a lo llargo la historia.
Dicen los principales
investigadores de la moderna psicoloxía, la que vien dempués de Freud porque
don Sexismundo taba más interesáu en pirules y fañagüetes, que ye mester rise
de les coses pa caltener l’equilibriu. El repunante sábelo por intuición, o
igual pol inconsciente collectivu, la sincronicidá y la epixenética. Ye qu’el
repunante ye más de Jung que de Freud. Pero lo cierto, tres aplicar les régules
de consistencia y de parsimonia, vemos qu’el repunante nun se preocupa del
equilibriu. El repunante ye más un magu qu’un equilibrista, que son les dos
formes opuestes d’asumir la vida y d’alfrentase a ella.
Un equilibrista ye un
mayestru en burllar la inestabilidá, mientres qu’un magu yelo en burllar la
probabilidá. Un magu siempres fae suya la crítica de Nietzsche, que dicía que
la probabilidá quier encerrar na so xaula a la posibilidá y, asina, suañar con que
lo probable goce de la enorme potencia de lo posible. Un equilibrista sigui la
estratexa’l koala, esi peluche tan simpáticu de les biesques d’Australia,
siempres apostando pola eficiencia y cuásique siempres n’equilibriu, con baxu
consumu y riesgu altu. Pero’l magu, estirpe a la que pertenez el repunante,
aplica la estratexa la rata, esi asquerosu roedor, siempres apostando pola
eficacia y lloñe de cualisquier equilibriu, con altu consumu y riesgu baxu. Por
eso, siguiendo el conseyu del mayestru Galbraith, el repunante opta siempres
polo desagradable enantes que polo desastroso.
Quédamos un puntu por
analizar, que ye custión tan importante como perifrástica, que requier d’una
amplia consideración hermenéutica: ¿pueden los repunantes agrupase?, ¿considera
un repunante a otru como par o aplica a otru repunante los mesmos criterios
qu’a otra persona cualisquiera? Equí los resultaos de la investigación nun son
concluentes. Dalgunes xeneralidaes podemos sacar pero nun son definitives,
aunque esperamos tenelo más afinao pa enantes de que conozamos les conclusiones
sobro la xestión de la pandemia la covid nel reinu d’España.
Pel momentu namás
cuntamos col ensayu sobro una muestra rellativamente reducía nes brumoses
tierres de los ástures, un país poco comprensible pa la llóxica formal y menos
entá pa la llóxica dialéctica. De toles formes, l’estudiu ye significativu
porque, asigún analises de regresión múltiple, los repunantes concéntrense
fundamentalmente n’Asturies ya Inglaterra. Sedría conveniente aplicar la mesma
metodoloxía con una muestra inglesa, tierra tamién brumosa de difícile
comprensión embaxo los parámetros de la llóxica.
Pero, recurriendo a un
enfoque estructuralista eclécticu, podemos sacar dalgunes conclusiones. En
primer llugar, la xuntanza repunante caltién les fundamentales característiques
d’identificabilidá y de permanencia, que son los primeros rasgos d’esistencia
d’una estructura. En segundu llugar, tóos y caún de los ellementos que la
formen son identificables na so unicidá. En tercer llugar, si ún de los ellementos
estructurantes falta o modifica’l so comportamientu, la estructura vese
modificada. Les rellaciones de causación son circulares, non lliniales. Bien
podríamos calificales como rellaciones de
causación espíchiques.
Polo tanto, la categoría
de repunante, non namás ye de rangu
científicu cuando l’analizamos como obxetu individualizáu d’estudiu, sinón que
tóo paez indicar que la repunancia
cumple colos requisitos metodolóxicos pa ser un sistema, entendíu como conxuntu
d’estructures agrupaes en modelos, conforme a la metodoloxía clásica
fenomenolóxica que mos vien dende Seaussure y Lévi-Strauss.
Terminamos citando a ún de los más preclaros repunantes del sieclo XX y faciéndolo nel so idioma pa nun perder migaya de conteníu nin tampoco de contestu. Escribe Julio Cortázar “¡no es por una cuestión de culpa, che; sos dostoyvskianamente asqueroso y simpático a la vez, una especie de lameculos metafísico!”.