Recepción Solemne de David Castañón como Repunante d'Honor
Como Repunante d’Honor de
2019 lléname “d’adguyu y satifación” dai el relevu a David Castañón y que
dengún repunante piense que tal decisión se tomara nuna UCI durante la
pandemia.
Podría dicir que David
Castañón ye técnicu superior en marketing y publicidá, amás de diseñador
gráficu, pero eso, pa ente nós, sólo ye importante pa dalgún torpe que nun sabe
emplegar más que’l programa Word y que mete la pata ata nel Facebook. Nun voi
citar pa nun dexar mal a naide.
Pa nós y pa min en
particular, Castañon ye gastroinfluencer.
Gastrónomu ye pallabra postmoderna pa
calificar al fartón de siempres. El nuesu homexeáu lleva bien la cosa, ata’l
puntu de ver con simpatía que seya conocíu como David Fartañón. Tamién resulta
que ye influencer, títulu del que nun
voi opinar, nun vaiga ser qu’eso seya asemeyao a la nuea cocina, que debe significar pagar trescientos euros y quedar con fame.
La gastronomía de güei ye
dalgo ambiguo y los sabios dexaron
hai tiempu de ser críticos pa ponese a describimos sensaciones. Por eso trunfen
en televisión concursos de cocina que siguin munches persones y qu’opinen
asigún lo que dicen los xueces. Vaya, que deciden qué platu ye meyor ensín
olelo nin saborealo. Ye como si se fae un concursu de música pola radio y los
oyentes son sordos. Afortunadamente, Castañón nun ye d’esos, sigui más bien
fiel a la tribu, anque seya valiente delles vegaes. Pero, en fin, como dixera Swift,
tamién el primer home que comiera una ostra fora un valiente.
Castañon ye l’alma del
grupu Les Fartures y con esi títulu espublizara un llibru que lleva por
subtítulu Ónde comer bien n’Asturies.
Ye un llibru únicu nel so xéneru, que non namás que mos lleva pelos meyores
chigres, tabiernes y restoranes del país, sinón que, coles llamaes farturrutes, faemos viaxar per villes y
aldegues, aparando en castros, sableres, brañes, ermites, palacios, horros,
texos, tambayones, puertos… o en fiestes, feries, mercaos… Comer y beber como
salía, parada o llegada pa dar a conocer la xente y la tierra de les que
surdiera esa gastronomía.
A esti respectu hai un
llugar común dende hai décades que yo voi permitime ampliar y facer una
referencia a la nuesa gastronomía con un toque repunante: con vinu ya estragón
ye cocina francesa, con pataca y pimentón ye gallega, con col fermentao ye
alemana, con mantega y vinu ye polaca, con crema ácida ye rusa, con salsa soya
ye china, con tomate ya oriéganu ye italiana, con fariña y aceite ye andaluza,
con llimón y canela ye griega… La cocina asturiana nun ye tan fácile de metela
nun arquetipu… ata que llegó: con rebozu, cualisquier cosa dientro ya una
freidora, ye cachopu.
Tamién recopila
barbaridaes de les cartes de dalgunos restoranes, mui especializáu neses
traducciones al español y, últimamente tamién al vasco, por parte de los
cosmopaletos d’esti país, de los que yá tamos sobraos y que van medrando: los
de las habitas, los caracolillos de mar, los txangurros, las sardinillas, los pintxos,
las lapas… Güei voi regalái dos
anuncies que viera yo mesmu y que me paecen enxebres y mui asturianes:
“morcielles caseres, feches con familiares” y “colos güevos de los nuesos
proveedores facemos tortielles variaes”.
Pero güei David Castañón
entra nel panteón de los Repunantes d’Honor. Porque Fartañón ye repunante cum laude. Y como tal, igual-y repunaba arrecibir el premiu. Pero non, aceutolu
con allegría. La verdá, pienso yo, repunante como’l que más, negase a un premiu
ye vanidá, ye apostar a dar más que falar y a facete más famosu, a la espera de
que te lu den póstumu y más grande. Pero, como diría un intellectual al altor
de Castañon, Hugo Sánchez, “los homenaxes en vida”.
Cervantes dicía que “al
bien facer enxamás-y falta premiu”. Y David Castañón tien muncho fecho y bien
fecho.
Como mayestru ceremonies,
arrecíbote nesti areópagu, polos tos méritos como repunante. David Castañón:
yes un perfeutu artefautu de defeutos.
