Somos de Segunda ya en nada de Tercera



El Fielato y El Nora, 26 d'agostu.


Una de les custiones más llamatives de la pasada Conferencia de Presidentes, la de mayor puesta n’escena que yo me recuerdo n’años, ye que Pedro Sánchez dixera na so apertura que yera mester consiguir que nun hubiere “comunidaes que se vean de Segunda”. Sánchez tinía la ocasión d’aprofitar los fondos europeos aprebaos de recién pa responder con fechos y non con pallabrería a les necesidaes d’eses comunidaes que, torpones elles, igual se ven como de Segunda.

El casu ye qu’el presidente llegaba al aconceyamientu con una alcordada previa sobro un tratu privilexiáu a Euskadi, lo mesmo nel déficit global que na delda de les diputaciones forales. De manu, 1.700 miyones pa dir faciendo boca. Esto ye: entamaba la reunión con al menos una comunidá de Primera y, a partir d’ehí, yá veríamos lo que pasaba. Nun ye esto inventu de Sánchez, non. Yá González, Aznar, Zapatero y Rajoy, dende’l gobiernu central, dexaron claro que la so rellación col gobiernu de Vitoria yera billateral, mientres que col restu les rellaciones afitábense en decisiones multillaterales y, n’últimu términu, sometíes al criteriu de La Moncloa.

Por muncho que mos falen agora de cogobernanza, de poco mos van servir a los asturianos les bones pallabres de Sánchez y los xeitos de dignidá política de Barbón cuando’l gobiernu asturianu nun desendolcara un mísere proyeutu de nada y pa nada. Ya ye qu’esi gobiernu asturianu taría dimpuestu a facer toles polítiques necesaries si tuviera competencies pa ello y diz amén naquello pa lo que sí que tien competencies.

Yá sabemos qu’el cincuenta por cientu los fondos pa mitigar los efeutos de la pandemia van dir a Madrid y Cataluña. De manu, eses comunidaes representen el trenta por cientu la población del reinu, lo que, por mera custión estadística, yá mos diz per onde vienen los tiros.

Asturies tien un gastu sanitariu per cápita asemeyáu al del País Vascu y mui perriba del de Madrid y del de Cataluña, con un nivel de renta abondo inferior al de les tres, lo que sopelexa que l’esfuerzu fora mui superior, amás de que, dientro’l desastre xeneral, tóo indica haza una política social y sanitaria enforma meyor. Eso fala de la xestión de los executivos d’Uviéu, escontra’l despilfarru de los ricos pero, especialmente, del sacrificiu en tiempos de recesión económica como fueron los años diez por parte de los asturianos, de tóos nosotros.

Agora quier aplicar el gobiernu central un criteriu que beneficia a les comunidaes que peor xestionaron y que, tovía nestos díes, siguin nes mesmes. Son les comunidaes, Madrid y Cataluña, que privatizaron tolo privatizable y que prefirieron enllenar les faltriqueres de los sos amigos y les sos families a protexer la salú de los sos ciudadanos y caltener mínimos criterios d’equidá social. Puede paecer dura la observación, pero los muertos nun necesiten yá fondos europeos. Indicadores como’l de mortalidá deberíen analizase a la inversa de lo que se fae.  

Yá nel repartu anterior a la pandemia, el gobiernu español trensfiriera volumes inxentes d’euros a los grandes incumplidores de los criterios de déficit, precisamente los más ricos, Madrid y esi virtuosu arcu mediterrániu, que lleven zampando dende hai décades tola inversión pública había y por haber.

La economía ta pelos suelos, los déficit crecen de manera espectacular y, cola cris turística, la solombra la deflación vuelve asomar. Nesti contestu, los fondos europeos, pensaos pa facer frente a los efeutos de la pandemia, vuelven repartise colos criterios de siempres: a mayor incompetencia, mayores rebrotes, mayores recortes y más polítiques antisociales, más miyones d’euros que lleguen. Un datu: de los 140.000 miyones correspondientes a la primer partía de delda mutualizada 30.000 van pa Cataluña, una de les comunidaes, rexones, lander o departamentos más ricos y, a un tiempu, coles más lletales polítiques, socialmente falando, d’Europa.

Estos datos nun son ayenos a la visión que dalgunos gobiernos europeos tienen sobro l’usu que’l reinu d’España fae de los recursos comunes de la Unión. Dempués el gobiernu español, que prefier financiar a les cigarres cantores y desangrar a les formigues, falará en Bruxelles y n’Estrasburgu de xusticia social ya equidá económica.


Entradas populares de este blog

"Asturies tinía la soberanía propia d'un estáu: moneda, defensa ya esteriores"

Les multinacionales fieden a cuchu

Recepción solemne de Xuan Nel Gonzali como Repunante d'Honor