Sí que vamos ver cambios culturales
El Fielato, 23 de setiembre.
Ye un tema recurrente nos
medios y nes converses cuotidianes falar de cómo y ata qué puntu esta pandemia
de la covid va cambiar les coses pa un futuru más o menos cercanu o más o menos
llonxanu. Cabe que, si la cosa dura muncho, vengan cambios radicales nel nuesu
sistema socioeconómicu y nos mesmos xuegos d’equilibrios mundiales. Ensín les
epidemies nun podríamos entender loa ascensos y les cayíes de los grandes
imperios, dende Roma ya España a los Estaos Uníos, pasando pola Francia de
Napoleón.
Difícile ye valorar agora
si esta pandemia actual va tener tan poderosos efeutos, pero si ye seguro que
mos cambiará usos y vezos del día a día, gustos, formes d’emplegar l’ociu, modelu
d’espectáculos… Vamos atender a unes coses que mos parecen naturales pero que toes vinieron impulsaes por cambios ideolóxicos,
enfermedaes o situaciones esceicionales.
El caballu como alimentu.
La ilesia prohibiera n’alta edá media, a impulsos de los cistercienses, el
consumu de carne de caballu. Los templarios impuxeron en media Europa la
prohibición. Inclusive en momentos d’asediu por fame, cuando la xente comía
tolo que tinía a manu, los flaires guerreros defendíen a muerte a los sos
caballos, y nun los comíen anque morrieran de vieyos o en combate. Pero llegó
la guerra francoprusiana de 1870 y la república alfrentárase a la costume.
Conclusión: güei sólo los franceses comen habitualmente carne de caballu.
Cocidito
madrileño. El pote de garbanzos con verdures y pita yera platu
festivu xudíu y los cristianos adoptáronlu pa la xinta’l domengu. Cuando
entamara la persecución y, riba tóo, tres la espulsión de los hebreos,
añadieron carnes de gochu pa demotrar que nun yeran xudíos y llamáronlo cocido.
¿Té o café? El café yera
la bébora estimulante de tola bona sociedá europea dende’l XVII al XIX, ata la
época napoleónica. Bonaparte y los sos alliaos, ente ellos Carlos IV d’España
y, dempués, el so mesmu hermanu, Xosé I, bloquearon les islles britániques y
los sos habitantes, en viendo que nun tiníen el café que procedía de les
colonies españoles, tuvieron qu’optar pol té de les suyes, India y Ceilán. Güei
la Europa continental toma mayoritariamente café y la insular té.
¿Una copa de brandy? Esta
ye entruga típica de les noveles y les películes ambientaes nes clases altes
ingleses. Falamos de finales del XIX. Entóncenes el whisky yera bebía de
campesinos escoceses ya irlandeses y de proletarios ingleses. Pero en 1870 la
filoxera entró na península ibérica, llegando en 1894 al Marcu de Xerez. Al
poco tiempu, los precios del brandy yeran tan altos que munchos burgueses
tuvieron que recurrir al whisky, pa lo que dalgunos destileros d’Escocia
supieran dar bona rempuesta. Güei ye’l brandy l’espirituosu más apreciáu, pero
por una minoría aristocrática.
Con protección de
cristal. En 1902, la Conferencia Internacional de Tuberculosis, propón contra
la espansión de la enfermedá midíes profiláctiques, ente elles, les
ventanielles de los teatros, de los bancos y de les estaciones de tren.
L’aceite de tola vida.
Ata bien entráu’l sieclu XX, l’aceite d’oliva yera consumíu nes sos zones de
producción, sacantes n’hoteles o grandes restoranes. Al acabar la guerra civil
española y con una posguerra de fame y necesidá, el gobiernu de Franco punxo en
circulación la cartiella racionamientu. La xente, pa tener qué comer, diba col
cartón a los centros d’abastecimientu militares y falanxistes. Pues resulta que
na dieta había una ración d’aceite d’oliva y asina se fora espardiendo por
países como Galicia y Asturies, ode’l so consumu yera, ata entós, marxinal.
¿Qué cambios del día a
día mos traerá la covid? Nun lo sé, pero de xuru qu’unos cuantos.
