Fin d'una revolución y la traxedia de dos homes

La insurrección entamara nes hores de l’alborada del día 5 d’ochobre de 1934, con una perbién coordinada acción d’aisllamientu d’Asturies, lo mesmo per estraes, per víes férriques y per telecomunicaciones. Tres cincu o seyes díes de combate, allá pal 11 o’l 12 diben perdiendo posiciones los revolucionarios. Ya’l día 15 les tropes del xeneral Balmes, dende La Pola de L.lena,  rompíen el frente d’Uxu y la resistencia de Figareo, ya entraben en Mieres del Camín, ocupando la cuenca d’El Caudal. Xixón, defendía polos anarquistes de José María Martínez, taba yá en poder del gobiernu.

Y pal 17 tóo taba perdío. Los revolucionarios d’Asturies, “sola en metada la Tierra”, como cantara’l poeta ultraísta Pedro Garfias, taben vencíos dafechamente. Son 18.000 soldaos los qu’ocupen el tarrentoriu, destacando les tropes coloniales, coordinaes pol xeneral Franco dende Madrid, pero embaxo’l mandu efectivu del xeneral Eduardo López Ochoa. Los combatientes qu’entá resistíen aconceyen en Sama, capital del conceyu de Llangréu y centru de la cuenca d’El Nalón. Son unos cuantos los que planteguen resistir ata’l final pero la mayoría, y con ella Belarmino Tomás, entendía que sólo una rendición pactada podría dar un poco de respiru, reducir el descomanáu númberu baxes que yá tiníen y aparar la represión que Yagüe nel país y Franco dende Madrid viníen desatando dende la toma d’Uviéu. Tomás y los más allegaos sabíen que la clave taba en contactar directamente col xeneral López Ochoa, al que tiníen por militar estrictu y profesional pero non sanguinariu. Tóos sabíen que Franco yera un monárquicu y Yagüe un fascista, mientres que López Ochoa yera un republicanu que sufriera esiliu.

El Comité Revolucionariu nun se fía ya unvía al teniente Gabriel Torrens, de la Guardia Civil, un home escuru, apresáu polos revolucionarios y más lluéu xulgáu por collaboración cola revolución, pa qu’apaute un alcuentru ente’l so presidente, Belarmino Tomás, ya Eduardo López Ochoa, o, cuando menos, un cruce directu de correspondencia. La entrevista fuera en Mieres del Camín.    

Aurelio del Llano cuenta que Torrens y Belarmino Tomás charraron nuna venta enantes de qu’el guardia marchara haza Uviéu. Diz que fuera testigu, pero munchos duldien d’esti fechu. Pero’l casu ye que Torrens llegó al cuartel xeneral de les fuerces gubernamentales y volviera coles condiciones de López Ochoa. Tales condiciones yeren inaceptables pa Tomás y pal so comité, fundamentalmente la entrega de los miembros de los comités revolucionarios anteriores. Taben dimpuestos a entregar les armes, a lliberar a tolos prisioneros, pero non a entregar a los compañeros. Aquello, evidentemente, yera de pura llóxica solidaria. Amás, llegaben les noticies de la brutalidá y los crimes de les tropes africanes, de Lisardo Doval y de Yagüe, amparaes por Franco dende Madrid. Entóncenes Tomás tomó una decisión pa munchos suicida: marchar a Uviéu a vese directamente con López Ochoa, xeneral y comandante en xefe del exércitu gubernamental.

Belarmino Tomás entró nel despachu de López Ochoa, que taba de pies y fumando. Diéronse la mano anque Tomás evitó cualisquiera referencia d’autoridá y dixo un simple “bona tardi”. Dempués, asigún dixera elli mesmu, pronunciara la so famose frase: “enantes d’entamar a tratar de lo que mos trai a equí, quiero que nun escaeza que los que tamos escontra somos dos xenerales; el de les fuerces gubernamentales que ye vusté ya’l de les revolucionaries que soi yo”. ¿Verdá?, ¿ensuañación? Quien lo cuenta ye Belarmino Tomás, que puede ponese enchipáu pa cola histpria. ¿Quién sabe? Pero, en viendo tolo que pasara poco tiempu dempués, cabe esi plante nun carácter como’l de Tomás.

Asina, el día 18, López Ochoa y Belarmino Tomás pactaron el final de la Comuna Asturiana. Tomás prometió que l’exércitu entraría nes collaciones y villes de les cuenques ensín arrecibir un tiru y qu’entregaríen les armes y a los prisioneros, pero a condición de que los llexonarios y los moros de regulares nun fueran en vanguardia. López Ochoa dixo que si pegaben un solo tiru poníalos en vanguardia y Tomás volviera a prometer nel nome de los suyos qu’eso nun pasaría, porque los sos homes yeran un exércitu revolucionariu disciplináu que cumpliría lo alcordao. De xuru que nun taba mui seguru de lo que dicía porque persabía que bastantes nun diben aceutar qu’un home tomara aquella decisión por tou un movimientu. Tampoco aceutó Tomás entregar a los miembros de los comités revolucionarios. Y, contra tou pronósticu, López Ochoa aceptó l’alcordada.

Y agora ye cuando surde una de les histories favorites de tolos alcuerdos más o menos secretos. El xeneral López Ochoa diz, tal paez qu’ensín venir a cuentu que “vusté yá sabe que yo soi masón y que por defender los mios principios lliberales y los mios sentimientos republicanos viviera desterráu duranle la dictadura”. Esta frase fora recoyía inclusive pol xornal ABC. Dalgunos historiadores piensen qu’una de les claves del alcuerdu tan rápidu y fácile ente los dos homes ye que los dos yeran francmasones, polo que la pallabra dada tinía la obligación especial de lo que xuraran ante la lloxa. La posibilidá d’esti fechu desplicaría especialmente la rapidez cola que López Ochoa aceutó que Tomás nun entregara a los sos compañeros, porque la llealtá ye un valor mui apreciáu pola orde del compás y la escuadra. Dicen tamién qu’al dispidise, López Ochoa-y dixo al socialista: “non como xenerales, sinón como hermanos”. Esto nun ta datao. Puede que los dos fueran masones. El xeneral sí que lo yera. Pero nun hai dengún documentu que lo prebe de Belarmino Tomás. Sí ye posible que Tomás acudiere a masones amigos pa facilitar la rellación con López Ochoa. Puede que Tomás tuviere simpatía pola masonería y que llegara a entrar na orde pero, de ser asíma, paez más probable que lo fixera yá nel so esiliu en Méxicu. Pero nunca apaeciera degún documentu, nin n’Asturies nin en Méxicu que lo demuestre.

El casu ye que Tomás volviera pa la cuenca d’El Nalón, pa Llangréu, l’últimu baluarte, ya ellí diera’l so últimu discursu como presidente del comité revolucionariu, a peitu escubiertu frente a una xente armao y desorientao ya ensín que nun faltaron glayíos de “traidor” y de “cobarde”. Dixo: “convencíos de que fuéramos fieles a la confianza que depositárais en nós (…) tenemos que confesar les nueses converses de paz col xeneral del exércitu enemigu (…) Nel restu les provincies d’España, los trabayadores nun supieron cumplir col so deber y nun mos aidaron (…) Anque tenemos fusiles, ametralladores, y cañones, fáltamos munición. Tolo que podemos facer ye concertar la paz”.

Hebo engarradielles y trafulques, como cuenta Alfonso Camín, pero aquellos socialistes y anarquistes diéronse cuenta de que Tomás tinía razón y aceptaron la derrota. Eso sí, munchos escondieron les armes en tenaes, cabañes y cuadres, por si facíen falta un día. Y sacáronles poco dempués, cuando, en 1936, otra vuelta tuvieron que vese les cares con xente como Francisco Franco y Juan Yagüe.

López Ochoa cumpliera cola so pallabra de masón y militar, pero la so alcordada con Tomás punxo de los nervios al teniente coronel Yagüe, al xeneral Franco y a Gil Robles, defensores los tres d’un bañu sangre. Lisardo Doval, carniceru a les ordes de los tres, organizó un sistema de tortures y asesinatos que llegaron ata’l mesmu despachu del presidente Roosevelt.

Ya equí pesllamos la historia tráxica de dos homes que, dende posiciones distintes, o non tanto, intentaron resolver lo meyor posible una traxedia. López Ochoa fora asesináu por milicies frentepopulistes madrilanes en 1936 y la so cabeza paseada peles cais de la capital nuna bayoneta por ser “el verdugu d’Asturies”. Belarmino Tomás morrería nel esiliu, tres declarar la soberanía d’esa mesma Asturies n’agostu de 1937 y, por segunda vez, de tener que rendise. La primera entregó una revolución, la segunda capituló como gobiernu.