A propósito del comerciu y la pandemia
(El Fielato, 2 d'avientu)
La pandemia de la covid
obligáramos a alfrentar un vieyu debate que, felices y confiaos na nuesa
hipotética invulnerabilidá de país avanzáu del centru’l sistema, escaeciéramos:
¿qué pasa cuando apaez un ellementu esternu al modelu que distorsiona
completamente les rellaciones socioeconómiques? Llevamos un par de décades
alfrentándomos a crisis internes del modelu y, frente a toes, dixeron los
nuesos dirixentes: “d’esta vamos daprender”. Pero nada nun daprendieron, nada
nun daprendimos.
Podemos falar en primera
persona del plural porque ye culpia de tóos, como tamos viendo nesta cris
actual, esterna, más grave y más incontrolable con midíes convencionales, na
que nin les alministraciones nin los ciudadanos tenemos comportamientos, non ya
planificaos, sinón medianamente razonables. Pero tamién ye mester estremar ente
unos actores ya otros, porque la culpabilidá marcha al empar de la
responsabilidá. Nun ye lo mesmo falar d’un ciudadanu mediu, del trabayador
d’una fábrica, del estudiante, del ganaderu, del pensionista, que falar del
gobernante, del gran empresariu, del arzobispu, del director d’un gran mediu
d’información.
Ya ye lo que pasó y sigui
pasando col pequeñu comerciu, la hostelería o l’entramáu cultural, exemplos
claros de que poco daprendimos y, ye de temer, de que vamos siguir ensín
daprender. Lo que ta pasando nun ye frutu d’una perversidá gubernamental, nin
tansiquier de les engarradielles ideolóxiques de los nuesos representantes, sinón
de la so inorancia, cebada na so visión cortoplacista, una visión que nun pasa,
como muncho, de los cuatro años d’un mandatu o d’una llexislatura. El problema
ye que nun saben, con tantu asesor bien pagáu como tienen, y que son incapaces
d’alfrentar la incertidume. Como nun saben qué facer pa evitar la pandemia y
nun pueden o nun-ys renta ellectoralmente meter a la xente en casa, la única
solución qu’alcuentren ye desincentivar que la xente salga de casa. ¿Y qué
meyor que nun tener aú dir? Si nun hai comercios, nun hai chigres, nun hai
teatru, nun hai conciertos, nun hai cine… ¿pa qué salir de casa? Reconocen a un
tiempu que nun tan ehí los grandes focos d’infección, porque eso señalen los
estudios, pero ye que nun alcuentren otra vía. Y dalgunes vegaes faenlo masque
nada por aparentar que dalgo se ta faciendo. Naide nun se recuerda de que fora
esa tienda que ta a cien metros la que respondiera durante’l confinamientu de
marzu-xunu, especialmente en comunidaes avieyaes como l’asturiana.
Nun ye nueva la cosa. El
comerciu de proximidá, el sector cultural o la hostelería llocal lleven siendo
los grandes escaecíos de toles crisis a les qu’alfrentamos nesta fase del
capitalismu. Yá hai quien diz que ye la última, pero yá se dixo cuando
l’imperialismu de finales del XIX ya’l sistema siguió furrulando con una mala
salú de fierru más de cien años. Y nesa resistencia xugara un papel
fundamental, precisamente, esi conxuntu d’empreses pequeñes de carácter llocal.
El comerciu pequeñu xenera un texíu económicu, pero tamién social. Ye’l formientu
de la demanda privada llocal, base al empar de la demanda agregada
macroeconómica. Trátase d’una economía circular: el peluqueru peina a la
frutera, la frutera toma’l pinchu del hosteleru, l’hosteleru compra los diarios
al quiosqueru, el quiosqueru lleva una docena pasteles del confiteru. Los
clásicos desplicáronlo mui bien y más lluéu vino Keynes a sistematizar esa
teoría de la demanda, pero nun paez necesario estudiar en Harvard pa entender
estes coses.
Pongamos un exemplu que
bien puede ser real. Un turista llega a un hotel y paga cien euros por una
habitación, pero, como-y paez un tanto caro, decide subir a vela. Mientres lo
fae, un camareru garra el billete de cien euros y salda una delda col carniceru
del que ye cliente, el carniceru paga cien euros na llavandería a la que lleva
los mandilones y los delantales, la llavandera fae lo mesmo col ellectricista
que-y iguara la instalación y ésti paga una factura d’una cena nel hotel de la
nueche anterior. El camareru vuelve’l billete a la recepción ya’l turista, que
nun quedó contentu cola habitación, marcha colos sos cien euros. Son cuatru
deldes saldaes con un mesmu billete, pero que multipliquen la renta nacional.
Ye un exemplu simplayu. Le coses nun son tan cencielles, pero valmos pa
reflexonar.
Tamién díbamos daprender
muncho con esto de la pandemia, pero les coses pinten igual. Van venir más crisis
sanitaries y cada vuelta más graves, asigún avance’l cambiu climáticu y
vaigamos abriendo les últimes fronteres ya alcontrándomos con portadores de virus
desconocíos. Toles ciudaes tienen un cuerpu de bomberos. Nun esperen a que
quemen los edificios pa ponese a ello. Pues lo mesmo hai que dir pensando col
sistema sanitariu. Pero hai que dir más alló tamién no económico. Ye mester una
reforma radical del sistema fiscal, non namás que pensando nel IRPF, l’IVA y
l’impuestu sociedaes, sinón notros nuevos, y, pol lláu del gastu, na renta
social xeneralizada. Y dexar pa práu la discusión absurda ya ensín xacíu sobro
les sucesiones ya’l patrimoniu, cargada d’ideoloxía barata y de poca sustancia
tributaria.
Pa acabar, y mui
aplicable a Asturies: ¿quién tien competencies y pa qué? El mesmu presidente
Barbón reconoz que quería facer determinaes coses pero que nun puede porque nun
tien competencies. Los gobiernos d’Asturies nunca les quisieron y, si por ellos
fuere, menos que tendríen. Nun ta demás recordar qu’un gobiernu ensín
competencies ye, por llóxica pura, un gobiernu incompetente.