A Luis Arias Argüelles-Meres, al amigu

 

Vigilate itaque, quia nescitis, diem neque horam.

Yá va una selmana de la muerte de Luis Arias Argüelles-Meres y sigo buscando la so columna nel periódicu. Marchó dende Salas dexando muncho por dicir, por contar, por escribir. Son pocos los amigos que faes cuando yá yes mayor, tirando pa vieyu. Faes bones rellaciones y aprecies a persones a lo llargo de tola vida pero lo que ye un amigu non tanto. Pero yo alcontré esi amigu de mayor dos o tres vegaes y, dende lluéu, ún d'ellos fue Luis Arias.

Yera un home cercanu y abiertu, comprensivu con cuasi tóo pero firme nes sos idegues. Ye difícile poner un calificativu referente pero pa mín yera un republicanu, non de la primera nin de la segunda, nin tan siquier d'una tercera, nin de la española o la francesa, nin de l'asturiana o la irlandesa... Yera un militante de la república como orde éticu, un ciudadanu nel más altu sentíu de París, de Cádiz o de Pensilvania. Dalguién escribiera que, n'aparente contradicción, yera un aristócrata republicanu, un aristócrata del intellectu. Yera un eruditu, un sabiu, un illustráu, tan cercanu al conocimientu como llonxanu a la pedantería. Defendía les sos idegues contra vientu y marea pero nun yera ún d'esos apocalípticos del et pereat mundus.

Arias entamara la so granible obra con Azaña o el sueño de la razón, llibru de 1990 nel que bucea nel pensamientu y l'acción del que fuera gran intellectual y políticu de traxedia, fríu y pasional a un tiempu, el de xuru meyor políticu de la España del sieclu XX. Azaña fora la pasión de Luis Arias, como Ortega fora la so llume filosófica. Llargues charres tuvi con elli, coincidiendo n'almiración por Azaña y discrepando bastante na consideración d'Ortega. Luis yera un tanto escolásticu, mientres que yo soi un tanto positivista. Pero siempres daprendí de les sos idegues, seguramente más de lo qu'elli daprendiera de les míes.

Arias nun yera sólo una persona culta sinón tamién un home d'acción, perbaxo esa apariencia mansulina que tinía. Los llectores de les sos columnes na prensa saben de la so valentía y del so carácter insobornable en defensa de la verdá y de la bondá. Nestos tiempos nos que la bondá ye obxetu de burlla y risión, como si fuera dalgo propio d'inxenuos anarquistes o cristianos, d'Arias podemos dicir, siguiendo a Machado, que yera "bonu nel bon sentíu de la pallabra". Y, con esa bondá como llábaru y cola crítica como adarga, defendía'l conceptu d'enseñanza escontra'l d'educación, consideración que, como docentes los dos, siempres compartí con elli. Y, más alló, cola aristocrática idega de que la enseñanza tien como finalidá igualar perriba y non perbaxo, como piensen los nuesos gobernantes.

Luis Arias yera defensor de lo pequeño, de lo llocal, de lo cercano. Taba namoráu de Llaniu, el so pueblu, del occidente asturianu, del baxu Narcea y del baxu Nalón, "la vieya Asturies con capital en Pravia" a la que cantara Fernán Coronas. Tamién amaba lo cuotidiano, escribiendo güei sobro la hermenéutica d'Unamuno y mañana sobro la fiesta'l choscu o sobro un Oviedo en Segunda B. Luis yera un gran oviedista y nun va poder ver al so equipu otra vuelta en Primera, porque esi día llegará. Dígolo yo, un encamentáu esportinguista.

Luis escribió sobre los meyores fíos d'Asturies y divulgó la so grandeza inellectual y política. Yera un asturianu enxebre, d'aquellos de calzón y montera... ya un llibru de Spinoza ya otru de Tocqueville. Defendiera una idega d'Asturies llibre ya illustrada, cosmopolita y non cosmopaleta. Fora defensor del nuesu idioma y, emocionáu, atropelláu como cenciellu que yera, contestó con brillanteza nun discursín na variante occidental al so nomamientu como académicu d'honor de l'Asturiana de la Llingua. Defendió siempres ya en toles tribunes l'estatus d'oficial pal asturiano. Non en baldre yera fíu del que firmaba les sos composiciones como Antón de la Braña.

Insobornable ya incómdu pal poder, los sos billetinos na prensa yeran una rara avis nesta Asturies na que furrulen los mecanismos del pelsebre y del duernu, nesta Asturies que ye un réxime al que nunca llegó la democracia. Dicía Cervantes, otra de les grandes pasiones d'Arias, que "yo no soy bueno para palacio, porque tengo vergüenza y no sé lisonjear".

Supe de la so enfermedá por Luis Rubio, presidente del Ateneo Jovellanos de Xixón. Por discreción al nun saber d'ello pol mesmu Luis, nin lu llamé nin lu visité, y nun sé si fixe bien. Pero sí que falábamos per internet y mos siguíamos ún a otru.

Asturies pierde a un gran home, a un intellectual de fuste, a un republicanu ensín dobleza. Amigu Luis, volvamos otra vegada a los grandes, como esi Llull que mos diz que "el filósofu nun claudica nin por amor nin por temor".