¿Dalguién defende verdaderamente l'autonomía?
El reinu
d'España ta configuráu dende l'aprobación de la constitución de 1978 como un
estáu autonómicu. Ye verdá qu'esa denominación resultara ser dende'l principiu
una solución de compromisu pa nun alertar a los poderes fácticos, l'exércitu
fundamentalmente, que tanto temíen a les pulsiones separatistes. Fora un modelu
sacáu de la chistera como tantos otros d'aquellos que nos primeros años de la
transición apaecieron y que,
teóricamente, deberíen quedar consolidaos cuando esi períodu escepcional
acabare. La evidencia de que l'estáu centralista, hipercentralista en munchos
aspectos, nun podía caltenese, llevó al asuntu del estáu autonómicu pa que nun
apaecieran per lláu dengún pallabres como federalismu o confederalismu
y, muncho menos autodeterminación o independencia.
La cosa
marchó rellativamente bien mientres les competencies yeran poques y, nos casos
como'l vascu ya en menor midía'l catalán, nun colisionaben con otres comunidaes
o coles reservaes pa l'alministración central. Pero, más ceo que sero, llegaría
un día en qu'esa situación diba ser otra. Cuando al País Vascu yá nun-y queden
competencies por asumir, sacantes les más definitories d'un estáu (moneda,
defensa, asuntos esteriores), a Cataluña, Galicia y Andalucía dalgunes más,
ya'l restu llegare yá al másimu de les suyes, les coses entamaron a cambiar.
Tolos
espertos coincidieron entóncenes en que la constitución prevía un pieslle
federal, un modelu similar al d'Alemaña, cuya constitución yera la referencia o
la inspiración de la española. Les comunidaes que llegaron a l'autonomía pela vía
llenta yá taben en condiciones d'algamar les mesmes competencies que les de
la vía rápida, mientres qu'estes, agora especialmente Cataluña,
pretendíen entá más, nun intentu, cuando menos, de caltener diferencialidaes
xurídiques.
Nesti
momentu, tres la mayor recesión económica mundial dende 1929, empezó una
batalla fiscal, caracterizada pola denuncia de dalgunos gobiernos del conciertu
vascu y de la blanda llexislación madrilana. El debate centrárase en si yera
necesaria o non una política fiscal común, un modelu impositivu homoxeneizáu.
Mientres el gobiernu vascu siguió a lo suyo, el madrilanu alfrentábase a unos
cuantos y mui particularmente al catalán. Nun ye llugar nin momentu pa falar de
fiscalidá, pero sí de cómo facer un pieslle federal del modelu si se pon en
custión la capacidá de les autonomíes pa comportase asina. Tan truculenta ye la
cosa que los mesmos nacionalistes catalanes desixeron al gobiernu español una
política fiscal igualatoria.
Llegara la
pandemia'l presente y la cosa fuera a más, abriéndose una guerra ente un mandu
únicu y la xestión autonómica de la mesma. Tampoco ye llugar y momentu pa
discutir sobro la eficacia amosada o sí xestionó l'asuntu meyor el gobiernu
central, los autonómicos o cuántos d'estos. L'asuntu ye que, esta vegada
especialmente los medios, incidíen un día ya otru nel desmadre de "17
comunidaes, 17 estratexes". La situación medio se resolviera con un estáu
d'allarma únicu y la so aplicación discrecional por parte de les autonomíes.
El gobiernu
d'Asturies consideró que cerrar les fronteres yera la meyor política. Lo mesmo
sí o lo mesmo non: la mayoría somos legos y nun lo sabemos. Pero lo mesmo daba
porque nun tinía competencies pa ello. Agora'l gobiernu castellanollionés
decide adelantrar una hora'l so toque queda ya'l gobiernu central decide llevar
al autonómicu al Tribunal Supremo, colo fácile que sedría flexibilizar
el decretu d'allarma.
Al marxe de
qué política concreta ye la meyor, si hai o non que pesllar los bares, si hai
que vacunar nun orde o notru o si se confina por families o por conceyos, la
entruga ye otra de cara al futuru: ¿dalguién quier de verdá un estáu federal?,
¿dalguién creye na descentralización?, ¿dalguién piensa qu'esti modelu políticu
resuelve dalgo? ¿Qué pasaría si tuviéramos un modelu como'l norteamericanu, tan
envidiáu por dalgunos, onde incluso hai pena muerte nunos estaos y notros non?
