Piotr A. Kropotkin, economista
Kropotkin ye, xunta Proudhon, el gran autor del anarquismu clásicu polo que toca al pensamientu económicu. El simple fechu de ser el teóricu socialista más tardíu faelu presentar un gran interés pal llector contemporániu, seguramente más de lo muncho que suscitara en décades anteriores. Herederu de los plantegamientos filosóficos y políticos de Bakunin, Kropotkin sepártase na so concepción económica pol so enfoque positivista. Nel fondu, Bakunin nun aportara una gran obra de calter económicu porque, dialécticu y discípulu de Hegel, dexára'l campu llibre nesa materia a Marx.
Kropotkin
vien d'una tradición científica que podemos facer nacer con Hume, a la qu'amete
una visión evolucionista heredera de Darwin. Poco dempués de salir de la
escuela de cadetes zarista, Kropotkin viaxa col exércitu a Siberia onde,
aplicando estrictamente los métodos de Darwin, llegó a la conclusión opuesta a
la del so mayestru. Diérase cuenta de
que Darwin, al analizar los trópicos, nos qu'el mediu ye poco llimitante,
sacara la conclusión que la supervivencia taba na competencia intra ya
interespecífica. Elli, al analizar les estepes boreales, onde l'ambiente pon
grandes llímites, observa que ye la cooperación la que permite la evolución y
l'adaptación. Entós, llega a una conclusión: n'habiendo les dos tendencies na
naturaleza, mesmo nos homes, necesitaremos la competitividá si'l modelu ye
competitivu, pero la cooperación si ye cooperativu. Y, embaxo esta posición, el
científicu da'l pasu haza l'economista anticapitalista.
El siguiente
pasu que da ye alfrentar cola visión marxista de lo económico. Como bon
positivista, piensa que la dialéctica nun responde a la realidá. Yá Hegel
escribiera que si la naturaleza nun coincidía cola dialéctica, mala cosa pa la
naturaleza. Kropotkin nun creye que se deba investigar n'economía siguiendo'l
modelu hegelianu de tesis + antítesis = síntesis, sinón el modelu de la
ciencia de hipótesis - tesis + demostración = teorema. Trátase del
primer teóricu d'una economía socialista, más lluéu vendríen otros, que
consideró que la visión ideolóxica ya interpretativa yera el pasu posterior a
la observación y analís de la realidá y non al revés, plantegando una cadena
metodolóxica inductivo-deductiva, de sucesivu ascensu y descensu'l
conocimientu, que ya vinía de la baxa edá media de Llull y llega a la
contemporaneidá de Russell. Por eso, pa Kropotkin, la dialéctica ye una
"encopetada metafísica".
El tercer
pasu que da ye plantegar una organización económica basada na descentralización,
na producción a pequeña escala y na superación de la dicotomía campu-ciudá.
Estes idegues son de plena actualidá, razón pola que Kropotkin ta viéndose
revalorizáu, non namái que polos movimientos que siempres lu revindicaron,
sinón tamién nes facultades d'economía. Y, con elli, vuelven a ponese nel
tapete les idegues d'otros autores posteriores como Abad de Santillán, Ward o
Bookchin, lo mesmo que medra l'interés poles iniciatives puestes en práctica a
lo llargo d'esti últimu sieclu que mos separa del 8 de febreru de 1921,
alborecer nel que finara'l príncipe anarquista.
