"La declaración de la sidre como Patrimoniu de la Humanidá conlleva, por definición, sofitos".

 

(La Sidra, númberu 202)

Llucía Fernández Marqués: La revista La Sidra prepara un especial sobro la situación del sector nesta pandemia, entrevistando a espertos de varies especializaciones. Decenes de sidreríes tan pesllando y otres deciden pasar a echaores automáticos pa les terraces, la barra nun esiste y tamos avezándonos a dir pa casa a les 8. Falamos con David M. Rivas, sidreru y autor d'ún conocíu llibru sobro la historia y la cultura la sidre. Ye profesor, yá xubiláu, d'estructura económica. ¿Cree qu'esto va afeutar a la cultura sidrera o la sociedá asturiana tornará al so ser cuando esto apangüe? ¿Conoz dalgún otru momentu na hestoria d'Asturies en que ocurriere daqué asemeyao?

David M. Rivas: Nun creyo qu'esta situación vaiga poner en pelligru'l chigre y, en xeneral, tol entramáu cultural de la sidre. La bébora ya'l sector pasó momentos muncho peores, ente los 60 y 70, cuando quedó relegao al mundiu rural y a dalgunos barrios obreros. Nos 80 vimos que, con poco esfuerzu, el resurdimientu yera imparable. Agora la situación ye muncho menos grave. Lo de los horarios nun sé mui bien si va traer cambios. Posiblemente sí. De toles formes yo soi bastante partidariu d'adoptar horarios que llamen europeos. Los horarios nuesos provienen del franquismu, del apueste pol horariu alemán y abandonu del inglés, y de cuando'l pluriemplegu yera norma. Yo recuérdome de mio güelu xintando a la una y mio padre a les tres. Eso en Xixón, porque n'aldega tamién lo facíamos a la una cuando non enantes. Y cenar a les ocho. Si vien un cambiu asina pa nada influi nel mundiu la sidre. Una espicha va ser a les siete la tardi y non a les diez. Sí que m'esmolez lo de los echadores mecánicos, pero hai una solución alministrativa: negar el títulu de chigre o sidería y nun dar sofitos económicos a esos bares.  

L.F.M.: Teniendo en cuenta la solicitú de  Patrimoniu de la Humanidá de la cultura la sidra, ¿vería afayaizo que'l sector sidreru tuviere dalguna ayuda específica que evitare'l so deterioru?

D.M.R.: Esa declaración lleva arreyao, por definición, dalgunes tribes de sofitu. Pueden ser de munchos tipos: aídes directes, financieros discriminatorios, fiscales... Eso sí, volviendo a lo anterior, ensín polítiques de café pa tóos, sinón con clares y dures demarcaciones.

L.F.M.: No económico, ¿qué opina de la xestión que se ta faciendo de l'apertura/peslle de los chigres? ¿Qué consecuencies económiques prevé? ¿Podrán recuperase chigres y llagares? ¿Cómu podrien paliase estos daños no económico?

D.M.R.: Tolo que ta pasando paezme un despropósitu. Soi un inorante nesto de les pandemies pero dalgo sé d'estadística. Por eso soi partidariu de pieslles duros y curtios y non d'esa yenka d'esquierda, drecha, allantre, atrás... Nun me paez qu'el sector sidreru vaiga ser el más castigáu pola cris pero sí que va pasalo mal. La collecha'l 19 sacárase a trompicones gracies al branu, la del 20 sigui nos toneles en bona parte y cola del 21, teóricamente perbona, nun sabemos que va pasar. Yo soi optimista sobro'l futuru'l sector pero tien que renovase. Ya eso non pola situación coyuntural estrictamente, sinón porque asina se fae necesario dende hai un par de décades. Los llagareros que sepian aprofitar esta situación, diversificando ya innovando, van salir reforzaos. De fechu, ta dándose últimamente una integración vertical mui notable.

L.F.M.: ¿Dalguna idega más que-y prestaría comentar?

D.M.R.: Una custión importante sedría declarar al sector nel so conxuntu como ambientalmente sostenible, porque cumple les directrices de la Unión Europea muncho meyor qu'empreses que ya tan consideraes asina. Una botella sidre ye reutilizada una media de cincuenta vegaes, dalgo único nel mercáu.