La señora de la tonada
Finara en Noreña Diamantina Rodríguez, la gran dama de la canción asturiana, cuando namás que-y faltaben cuatru menses pa cumplir cien años. Ñaciera na collación de Vil.laxime, nel conceyu de Quirós, nuna familia aficionada a la música y, especialmente, curiadora de la canción tradicional. Criárase en Cospedal, nel conceyu de Babia, al otru lláu del cordal, n'Asturies cismontana. De neña sentía nun gramófonu la poderosa voz d'Obdulia Álvarez, La Busdonga, a la que siempres tuviera como referente. A mio güelu Manolo Infante, ñacíu en 1901, curdionista y cantarín de Cimavilla, el so barriu de Xixón, siempres-y sintiera dicir que nun hebo otra como La Busdonga, que yera de 1896. Por eso se fixo tamién un gran siguidor de Diamantina Rodríguez.
Con namás que doce años, Diamantina formara un dúo col gaiteru de Buedia, Argimiro Fernández, col que percorriera, de panderetera, les fiestes de cientos de pueblos y aldegues d'Asturies. En 1936 casaron, poco enantes de que l'home marchara a la guerra coles tropes republicanes. Nun lo tuvo fácile naquella mocedá yá un poco avanzada, de families paterna y materna vencíes, y casada con otru vencíu, sufriendo ensín cuentu les consecuencies d'esa derrota. Pero saliera alantre pola so entereza y fuercia ya entamara con una vida artística, como cantante de tonada, cuando pasó a vivir nel conceyu de La Ribera, una vida que diba llevala a ser la más grande ente les grandes. En 1950 pasara a vivir, yá pa siempres, en Mieres del Camín.
La tonada, un xéneru musical llíricu cercanu al lied, nun tien referencies historiográfiques anteriores al últimu terciu del XIX, pero tóo indica que tien raigaños perantiguos, vien visibles nel fechu de que llegara a nosotros acompangada por cuantos instrumentos esisten, nun faltando les pieces esclusivamente vocales. Pertenez al floclore más fonderu, a eso que los románticos alemanes llamaron volksgeist.
La tonada arrecibe un gran impulsu ya una modernización ente finales del XIX y principios del XX, col llabor emblemáticu y mui internacionalizáu d'El Gaiteru Lliberdón y, a un tiempu, coles aportaciones de compositores cultos enmarcaos nel nacionalismu musical asturianu, paralelu a movimientos asemeyaos nel restu d'Europa. Son los años de Torner, González del Valle, Del Fresno, Baldomero Fernández, Lavandera... Ye xustamente nesi resurdimientu renovador cuando apaez la figura de Diamantina Rodríguez. Asina, por exemplu, el so Arboleda bien plantada marca un verdaderu canon de la música vocal asturiana moderna. Tamién ye de resaltar que recuperó'l pianu pa la tonada, conforme a les idegues de Torner y, posteriormente, de Lauret, quien dixo, pa vergoña de les clases fates y pretencioses de l'Asturies oficial, que la gaita entraría nuna orquesta sinfónica, la montera picona veríase na ópera y homes d'esmoquin diríen a escuchar tonada asturiana. Pallabres profétiques les de don Benito.
Lluchadora y aporfiada, diera un pasu alantre perimportante cuando recuperó nun discu'l cancioneru de Torner, figura central de la música y la musicoloxía asturianes, editáu en plena dictadura, cuando'l mayestru taba nel exiliu. Daquella nun cantó delantre de Franco nel palaciu d'El Pardo, como taba previsto, porque taba enferma, pero dalgunos afirmen que...
Ye un referente indiscutible, fora llienda viva y, agora yá ye un mitu que durme na pumarada de los inmortales. Fora, amás, defensora de la llingua asturiana, de la so recuperación y del so prestixu. La voz de Diamantina, como yá dicía premonitoriamente esi nome suyu, la so forma d'interpretar y la so manera d'escenificar fuera modelu de munchos cantadores, muyeres mayoritariamente pero tamién paisanos, ata agora mesmu. Nun tuvo fíos carnales pero sí munches muyeres ya unos cuantos homes "canten por Diamantina", que ye esprexón asturiana perafitada. De fechu, de forma desinteresada, aidara a la formación de tres estraordinaries voces: Liliana Castañón, Marisa Valle Roso y Anabel Santiago. Esta última respondiera a la mayestra hai unos años con un discu que lleva por títulu Anabel Santiago canta a Diamantina.
Un día entrugáron-y, siendo yá mui mayor, pol trabayu de la so llarga historia y, discretamente, respondiera: "nací pa esto". Alón, señora. La patria, agradecía.
