Los grandes del Barça siempres con Quini
Quini xugara nel Barcelona ente 1980 y 1984, dexando una fuelga imborrable na ciudá ya en toa Cataluña. Cualisquier persona, con arguyu si ye asturiana y más entá si ye esportinguista, pué comprebalo con facilidá: cuásique trenta años dempués los barceloneses, los catalanes, seyan culés o non, falarán-y bien de Quini. Cuando se retiró, anque volviera al Sporting, l'equipu blaugrana organizó un partíu como homenax al so gran delanteru, nel que nun tuvo Maradona, qu'estimaba muncho a Quini, porque'l presidente Núñez vetolu pol so fichax col Napoli unos menses enantes, por más que l'asturianu pidiera la so presencia. Naquel partíu xugaron Castro, el so hermanu, Urquiaga, Núñez, Maceda, Camacho, Márquez, Da Silva, Figueroa, Cruyff, Kempes, Amarilla, Arconada, N'Kono, Giménez, Dani, Rexach, Urruti y Morán.
Agora grandes figures del Barcelona salen a defender la idega de que Xixón cuntie con una estatua d'El Bruxu. La prensa recoyía estos díes dalgunes opiniones, nes que queden sopelexaes les virtúes de Quini: amigu, home bonu, atentu, arrogante, cenciellu... y gran xugador.
Víctor Muñoz, aragonés, centrocampista haza atrás, con una potencia defensiva tremenda que-y daba la so corpulencia y la so resistencia física, diz: "Creyo que Quini, polo que representa p'Asturies y pa Xixón, merezlo tóo. Como persona yera un exemplu, un gran compañeru. Namás que fixo amigos. Ye obligao".
Andoni Zubizarreta, vascu, el fubolista con más partíos en Primera División de la historia, el quintu con más partíos internacionales cola selleición española y porteru míticu, diz. "Cuando pienso en Xixón, pienso en Quini. Y cuando pienso en Quini, pienso, inmediatamente, en Xixón. Ye imposible dixebrar al ún de l'otru. Creyo que si dalguién merez esi reconocimientu, una estatua, ye Quini. Elli representa lo bono'l fúbol y lo meyor de Xixón".
Pichi Alonso, valencianu, delanteru centro d'impresionante capacidá goleadora, el que fixo un hat-trick al Göteborg nuna semifinal de la Copa d'Europa, diz: "Tolo que se faiga ye poco. Yera la gayola consolidada y siempres taba de bon humor. Quedábamos ablucaos de la cantidá de cartes qu'arrecibía, siempres el que más tinía, más que Maradona. ¡Y contestaba a toes! Una estatua... Quinocho merez cualisquier cosa".
Hristo Stoichkov, búlgaru, Balón d'Oru, con cuatru lligues consecutives col Barcelona y semifinalista d'un Mundial cola camiseta de Bulgaria, diz: "Préstame falar d'una persona tan quería, tan almirada nel fúbol mundial. Perriba tóo, teo un gran honor porque m'encompararon munches vegaes con Quini. Almirábalu y sigo almirándolu. Obviamente soi'l primeru que voi sofitar esta gran iniciativa de poner una estatua al máximu ídolu del fúbol español y del fúbol de Xixón. Quini... siempres nos nuesos corazones".
El 9 del Sporting. ¡Agora, agora Quini, agora!
