La Europa'l 10-30-60
El Fielato, 19 de mayu.
El pasáu día 9 cellebráramos el Día d'Europa, en recuerdu y reafirmación de la declaración que Robert Schuman fixera en 1950, xustamente cincu años dempués de la rendición de los nazis. Europa taba devastada ya otra guerra asomaba pel horizonte. Francia propunxo a Alemaña una alministración conxunta del carbón y l'aceru, indispensable pa una industria armamentística común qu'evitase otru alfrentamietu ente europeos y, a un tiempu, sirviera d'avisu a los posibles enemigos. Asina nacía lo que, siete décades dempués, ye la Unión Europea, setenta años impensables pa unos pueblos que llevaben matándose dende sieglos enantes. Non namás ye la Unión un espaciu de paz, sinón tamién de democracia y progresu económicu, non ensín pasar por crisis y dificultaes, lo mesmo que por tremendos fracasos en más d'una y de dos ocasiones.
Un antieuropeísmu irresponsable, más afitáu en dalgunos gobiernos y dalgunos partíos que nel conxuntu de la población, lleva con frecuencia a desaxerar los problemes y les disfunciones, escondiendo que ye la falta d'afondamientu na integración lo que los provoca. Cada vuelta que dalgunos gobiernos tienen problemes a los que nun saben responder o que nun quieren solucionar, echen manu de culpar a un ente misteriosu como bruxelles. Si en 1950 se diera un pasu tan grande, cincu años dempués de la mayor sarracina de la historia, ¿qué nun dicir de la pandemia qu'agora tamos padeciendo? Ye verdá qu'hebo problemes, improvisaciones y decisiones enquivocaes, pero, ¿dalguién piensa qu'ensín una política común, diben tar vacunándose miyones de persones, sacantes nos países más potentes n'investigación mélica y farmacolóxica, los que cuenten cola industria y les patentes? ¿Dalguién maxina l'escenariu d'una España o diecisiete comunidaes autónomes danzando pelos mercaos?
La Unión Europea nun ye, como se caricaturiza munches vegaes, un mostru burocráticu que más nada sirve pa facer declaraciones. Diéronla por muerta munches vegaes: cuando l'enfrentamientu de Francia y Gran Bretaña, cuando les guerres de los Balcanes y del Golfu, cuando'l brexit, agora cola pandemia. Tamién dieron por acabada la so moneda única en cuatru ocasiones en menos de trenta años. Pero la unidá caltuviérase y los últimos acontecimientos, tres l'aumentu presupuestariu y la mutualización de la delda, pueden llevamos a una fiscalidá común y a una nuea cadarma llaboral. Queda camín, muncho camín, pero tóo taba por facer el 9 de mayu de 1950.
Ya esi camín alfréntalu la Unión cola política ambiental y climática más comprometía, la política esterior menos agresiva, la política d'integración pa colos innmigrantes más xusta. Convién recordar tres cifres nes que se reflexa lo que significa Europa, y más en tiempos de recesión como los d'hai una década y los que tamos viviendo agora: 10-30-60. Los europeos somos el 10 por cientu de la población mundial, tenemos el 30 por cientu de la renta mundial y dedicamos a fines sociales y redistributivos el 60 por cientu del total mundial. Son datos, non pallabres guapes.
