Napoleón: doscientos años

 

Güei, 5 de mayu, conmemoramos la muerte de Napoleone Bonaparte, que finaba, con 51 años, nesti día de 1821, nel so confinamientu de la islla de Santa Elena, nun puntu perdíu nel océanu Atlánticu. Ñaciera n'Ajaccio en 1769, namás qu'un añu dempués de que Córcega fora incorporada a Francia, nel bierzu d'una familia nacionalista. De fechu, como mos cuenta Stendhal, nin tan siquier d'adultu, ya emperador, falaba mui bien francés y muncho peor italiano. El mariscal Dupont cuenta que-y prestaba, tando en guerra, dir a les tiendes onde taben soldaos corsos pa poder falar con ellos na so llingua. Y digo que conmemoramos al home porque faese complicao cellebralu. 

¿Cómo recordalu?, ¿como al xeneral Bonaparte, l'héroe de Tolón y de la revolución, y tamién el primer cónsul de la república?, ¿como al Napoleón que se coronó a sigomesmu como emperador?, ¿como al invasor y conquistador?, ¿como al artífice del códigu civil que sentó les bases del estáu de drechu? 

Fora encomparáu con Hitler por la historiografía inglesa y, llamativamente, non tanto pola española y pola rusa, que sufrieran les dos campañes más sangrientes del emperador francés. Los mesmos poetes románticos y los cronistes asturianos, de la nación que-y declaró la guerra y llamara na so aída al rei d'Inglaterra, unos contemporáneos ya otros dalgo posteriores, ponen l'acentu sobro mariscales como Ney, pero respeten la figura de Napoleón. Yeran lliberales, non como los sublevaos de Madrid del mesmu momentu, reaccionarios al serviciu, puede qu'inconsciente, de los borbones y los clérigos. Yeran afrancesaos anque anglófilos, antinapoleónicos pero bonapartistes. El mesmu Flórez Estrada lo escribiera: si la guerra contra Francia nun diba acompagada de la revolución, daba lo mesmo Napoleón que Fernando VII, y, puestos a elexir, dempués de la muerte, meyor el corsu.

Beethoven dedicárai una de les sos meyores composiciones pero, romanticista alemán como yera, cuando viera qu'invadía Alemaña, arrancó la primera páxina ya intitutola Sinfonía heroica. Pero siguió falando d'elli como d'un Lohengrin alloquecíu. 

La comparanza que-y fixeran con Hitler ye un despropósitu, como tamién la que dalgunos autores fixeron con Stalin o con Mao. Paul Johnson, historiador conservador inglés, nun llibru que nun tendrá más de quince años, diz que los grandes males del bonapartismu mauraron nel sieclu XX, na era de la infamia. Pienso que nun ye asina. Napoleón fue un personax históricu que pervive más alló de la so vida política y militar, mientres que los demás, particularmente Hitler, fuera de la so vida pública son un ermu vital. Napoleón nun ye, seguramente, un personax simpáticu al que seya fácile amar, pero nun ye un psicópata xenocida que, además, llevara la desgracia nin la ignominia histórica al so pueblu nin al so exércitu. Amás, el proyeutu d'un tiranu muerre con elli, pero eso nun pasara col proyeutu napoleónicu. Dengún estadista, dende los tiempos d'Augusto, dexara una güelga tan fondera na historia y na contemporaneidá. Afitara les bases de la sociedá lliberal.

¿Y fuera un gran invasor? Pues ye mui rellativa la cosa. Les guerres que llibró y ganó ente 1799 y 1802 yeren las yá entamaes poles potencies imperiales contra la Francia revolucionaria y dempués tuvo que llibrar seyes más contra coalliciones organizaes por Inglaterra. Namás que la invasión d'España puede considerase, estrictamente, imperialista. Y fuera, precisamente, la que más lloró: "esa infeliz guerra fora una gran firía, la desgracia de Francia".

Seguramente que fora l'últimu déspota illustráu, que nun dexara munchu espaciu a les llibertaes pero, a la escontra de los déspotas dinásticos, consolidó el principiu revolucionariu de la igualdá, mientres que los otros nun dieron llibertá nin tampoco igualdá. Esta ye la base del constitucionalismu modernu, sacantes el casu de los Estaos Uníos, que punxeron, pola so composición social, más énfasis na llibertá. 

Madame de Staël dixo de Napoleón que yera Robespierre a caballu. Yo creo que la figura del corsu ye muncho más importante que la del puritanu burgués. Y más grande nun sentíu anatómicu, escontra'l mitu'l pequeñu corsu: midía 1,69 metros, perriba la media d'una época onde'l varón inglés mediu midía 1,68 ya'l francés 1,64. Napoleón, pienso yo, cuando cabalgaba, llevaba na espada l'imperiu, pero'l so caballu diba cuchando revolución. Elli mesmu lo dixo en Santa Elena: "la mio verdadera gloria nun ye la de ganar cuarenta batalles, de les que Waterloo esborriará'l recuerdu, sinón el mio códigu civil, que punxo a los ciudadanos perriba de príncipes ya obispos".  

Robespierre a caballu, dicía Staëll. Hegel falaba d'elli como l'espíritu'l mundiu a caballu. Y Nietzsche, na so más fondera hermenéutica, dixo que yera síntesis de lo inhumano y lo sobrohumano.