¡Viva'l Primeru de Mayu!
Güei ye primeru de mayu y voi permitime tornar del italiano el testu del poeta anarquista Pietro Gori, que, con música del Nabuco de Verdi, el perconocíu movimientu coral de Va, pensiero, fora himnu de los obreros de los primeros años del sieclu XX. Durante'l fascismu el Va, pensiero yera una cosa incómoda: nun podía Mussolini arrenunciar a Verdi, el gran compositor nacional, pero la lletra alternativa de Gori sonaba silente, como la soledá sonora de Juan de la Cruz, perriba de les camises negres, los hachos y les blimes, y la corona de los saboyes. Y Mussolini pasó, el fascismu pasó, mientres qu'el movimientu obreru permaneció. Y quedó vivu Gori, y quedó vivu Verdi, y la república, y la democracia.
Los anarquistes d'entóncenes nun algamaron la so sociedá ensín clases ya ensín estáu, pero dexaron fondera güelga nel pensamientu y na mesma vida cuotidiana. El mayestru Proudhon, el rebelde Bakunin, el científicu Kropotkin reviven cada primeru de mayu. Y Gori, como Verdi, mos recuerden que la primavera del home llibre va llegar. La utopía ye lo que nun esiste pero puede esistir. La quimera ye lo que nunca esistirá. La utopía ye un mundiu meyor. La quimera ye pensar qu'esti d'agora ye'l meyor.
Quedamos con Verdi y con Gori.
Ven, ¡oh mayu!, espérate la xente,
salúdente los trabayadores,
dolce pascua de los productores,
ven y que rellume'l to espléndidu sol.
Nos praos nos qu'el frutu reñaz
güei retruñen del himnu los sones
enanchando darréu los corazones
de los paries ya ilotes de ayeri.
Esconsoñái, falanxes d'esclavos
de los sucios talleres y mines;
los del campu, los de les mariñes,
tregua, tregua al eternu sudor.
Llevantemos las manes calloses,
aupemos altaneres les frentes,
y lluchemos, lluchemos valientes,
contra'l fieru y cruel opresor.
De tiranos, del ociu y del oru
precuremos derremir al mundiu,
y al xunir el nuesu esfuerzu facundu
llograremos al final vencer.
Mocedá, ideales, dolores,
primavera d'atractivu arcanu,
verde mayu del xéneru humanu,
dái al alma xixa y valor.
Allendái al rebelde vencíu
que tien la so vista n'aurora,
y al valiente que llucha y llabora
pa un prestosu y feliz porvenir.
Termino: ¡viva'l primeru de mayu!
