Amartya Sen: l'economista de los probes

 

Esti añu van gallardonar col Premio Princesa de Asturias a Amartya Sen, economista que trabayara na economía'l bientar y los mecanismos subyacentes de la probitú y, mui especialmente, nel analís de les famiaes, estudios que lu llevaran a algamar el Nobel en 1998 pola so contribución a la teoría y a la política del bientar económicu. Sen ye ún de los economistes que más fixera por ampliar la perspectiva d'esta ciencia y, dende lluéu, ye'l gran críticu del capitalismu de finales del sieclu XX y de lo que llevamos del XXI.

La so obra amosara la necesidá de que la economía y la ética marchen al empar, un rasgu qu'alcontramos yá nos sos primeros escritos, inclusive nos más técnicos de primera hora. Entamara la so perllarga vida científica ellaborando modelos matemáticos pa desplicar la ellección racional y, en xeneral, los mecanismos ya instrumentos de la economía del bientar, ameyorando'l llabor d'economistes tan emblemáticos como Pigou y Arrow. Pero Sen diba dar un pasu más, amosando una potente capacidá analítica p'alfrentar los problemes y custiones fundamentales de la sociedá, non namás que de la economía, a la que percibe como un subsistema de la totalidá social. Na so obra más conocía, espublizada en 1981, Probetú y famiada: un ensayu sobro'l drechu y la privación, demostrara que la fame nun ye desplicable coles teoríes heredaes del pensamientu malthusianu, que nun ye consecuencia de la falta d'alimentos pol incrementu de la población, sinón de les desigualdaes nos mecanismos de la distribución de dichos alimentos.

Siendo neñu, a Sen afleutolu fonderamente la famiada de Bengala, el so país, en 1943, que dexó, asigún los más optimistes investigadores la cifra de miyón y mediu de muertos, dando otros autores la de tres miyones. Nesi añu fiuera cuando les tropes britániques llegaron nun gran númberu pa resguardar la India d'una posible invasión xaponesa, lo que provocara un enorme incrementu de la demanda d'arroce, lo que llevó a descomanaes alces de precios. Años más sero, recordando aquellos díes nos que cuntaba con diez años, por más qu'elli nun sufriera la penuria, escribiera: "siendo neñu, cuando diba a la escuela nocturna, daprendí que la fame nun yera una custión meramente económica, de falta d'accesu al alimentu, sinón que tamién venía pola carestía de la educación, de los medios sanitarios, en definitiva, d'oportunidaes".

Sen diérase cuenta de qu'el fechu de que nel so país hubiere un réxime non democráticu, n'unión a la especulación que ye consustancial a los mercaos non tresparentes, fora la causa primera de la famiada, y non la escasez o'l volume de población. "Denguna famiada se diera nunca nuna democracia", por imperfecta que seya y trátese d'un país probe o ricu, escribe en 1999 nel so Desendolcu y llibertá, una fras que convirtió nuna de les sos máximes como economista. De fechu, nesa obra resalta que, dende que la India accediera a la independencia nun careciera más famiaes, mientres que s'estima que na China maoísta morrieron por fame ente cuarenta y ochenta miyones de persones ente 1958 y 1961.

Con estes premises, Amartya Sen, tal paez que siguiendo la reflexón de Churchill, piensa que la democracia ye'l peor sistema políticu sacantes de tolos demás, porque permite al ciudadanu afuxir de los malos gobernantes y, nesi sen, defende qu'el progresu económicu tea basáu nel trípode de xusticia, llibertá y democracia, una traducción actual de la vieya divisa de la revolución.

Ye por eso polo qu'afirma, contra la opinión dominante ente los economistes del stablishment, qu'el crecimientu económicu, si queremos que se caltenga, requier que les reformes polítiques y sociales precedan a les económiques. D'estra manera, pescancia que ye mester un equilibriu ente democracia y capitalismu, situación que nun se da nestos tiempos, cuando'l capitalismu vese perfuerte escontra una democracia debilitada y puesta en custión por autoritarismos y populismos d'estremaes tribes. Sen ye l'autor de les teoríes útiles pa una democracia ya una sociedá xusta, teoríes que ponen a la persona nel centru de les concepciones económiques, ya yelo porque conoz fonderamente les nueses esperiencies, les reacciones humanes cuando mos alfrentamos a situaciones complexes, más allá de les cencielles del mercáu.

Nesta concepción de la democracia económica, pa Sen l'estáu nun tien otra razón de ser que proporcionar les condiciones óptimes pa que les persones puedan vivir bien, con dignidá y suficiencia. A un tiempu, apela a la llibertá positiva, la qu'atalantamos como la capacidá real del individu pa facer dalgo, y non a la llibertá negativa, esa a la qu'apela un neolliberalismu enchipáu nos últimos tiempos, que queda reducía a nun interferir dende'l poder políticu nes decisiones individuales aparentemente autónomes.

Esta visión de les coses ye lo que-y permite afirmar, como fixera nuna entrevista de recién sobro xeopolítica, que "la Unión Europea va ganar relevancia porque Estaos Uníos yá nun ta en condiciones de desempeñar el so papel de lliderazgu".

Con esti bagax teóricu y metodolóxicu, Amartya Sen pasara de ser un economista pa convertise nun pensador global, humanista, deviniendo ser un autor clave na comprensión de la probitú y activista na llucha contra ella. Inxertu nuna visión interdisciplanar y mundialista, les sos aportaciones abarquen dende la teoría de la ellección al estudiu de les frebes del subdesendolcu y la pauperización, espardiendo a toles ciencies y disciplines sociales el so enfoque de les capacidaes personales. Sen, enllazando colos grandes clásicos, recupera'l rostru humanu de la economía y, d'esa forma, influera singularmente nos programes de desendolcu que tan diseñándose nel presente nun horizonte global, mundial. Pa elli la globalización "significa munches más coses qu'un espoxigue global, siendo tamién un intercambiu global d'idegues, de pensamientos, de cultura, que permite un crecimientu, pero d'una forma intelixente".

Dicía hai munchos años, siendo yo estudiante, el mio mayestru Sampedro, que los economistes convencionales definen la so disciplina como "la ciencia qu'estudia la riqueza", mientres qu'elli pensaba que, siendo'l subdesendolcu y la desigualdá lo más abondoso nel nuesu mundiu, lo llóxico sedría falar de "la ciencia qu'estudia la probitú". Añadía que, nel fondu, da lo mesmo porque si estudies la bayura acabes atopando la probetería. Pero, concluyía Sampedro, la diferencia ye sentimental: el talante del economista qu'estudia la probitú ye mui distintu al del que ta cómodamente analizando la riqueza. Daquella'l papel que güei cumple Sen taben cumpliéndolu autores como Galbraith o Myrdal, dos economistes que muncho contribueron a la mio formación.

Amartya Sen trabayara na creación d'indicadores sintéticos internacionales que foran más precisos y más integradores qu'el PIB y que la renta per cápita, tando detrás, por exemplu, del Índice de Desendolcu Humanu (IDH), que publica tolos años el PNUD. La renta per cápita ye un bon indicador porque mos fala de la prosperidá, non en xeneral, sinón teniendo en cuenta a la población que la xenera, pero nun abasta. Pa Sen hai que dir más allá, ata analizar les capacidaes de les persones, desplicando que "les mercancíes y los servicios son valiosos, pero nun lo son por sigo mesmos, sinón qu'el so valor reside no que pueden facer pola xente, o, más bien, no que la xente puede facer con esos servicios y mercancíes". El IDH cuantifica la producción, el PIB, pero tamién aspeutos como les espeutatives de vida o'l nivel educativu de los ciudadanos, De nun ser asina, los indicadores macroeconómicos nun son a midir cómo ye la vida verdadera de la xente.

La so teoría de la probitú atiende a les circunstancies de cada persona y va más allá de lo estadístico. Convencionalmente considérase qu'una persona ye oficialmente probe si nun llega a los dos dólares diarios, pero Sen afirma qu'una persona nun ye probe por nun tener esos dos dólares nin dexa de selo por tener tres, sinón por tener recursos suficientes pa vivir con plenitú. A esti respective, hai unos años, siendo presidente Sarkozy, formárase en Francia una comisión pa diseñar una batería d'indicadores que midiera meyor el bientar de los franceses. Nel primer informe qu'emitiera la comisión, dirixía por Sen, Stiglitz y Fitoussi, podía lleese qu'una de les razones poles que la mayor parte de la xente percibe que ta peor de lo que señala'l PIB nun ye otra que la realidá: la xente vive, efectivamente, mal.

Sen asienta'l so conocimientu económicu na filosofía y na ética occidentales, mui na llínia que podemos reconocer como spinoziana, pero ensín regatear crítiques a la visión occidental del mundiu, positiva y mecanicista. "Paezme que los economistes tienden a menospreciar la filosofía", escribiera va poco n'Annual Review of Economics. D'otra banda, tamién bebe de la tradición de la India, más una civilización qu'un país, meciéndola con aquella occidental. Eso da un carácter mui singular al so pensamientu como economista, afitáu en valores universales como la xusticia y la llibertá. Tamién de recién pidiéra-ys a los grandes mandatarios que dedicaren tiempu a escuchar porque lo fundamental ye una mente abierta ya una voluntá de collaboración. "Nun hai nada capaz de sustituyir al razonamientu críticu y la mayoría de los problemes del mundiu son resultáu d'un pensamientu zarráu y llimitáu", escribiera.

Como frutu de tóo ello, la so manera d'allegase a la correición de les inxusticies nun ye la de buscar un modelu perfeutu de xusticia, sinón dalgo enforma más pragmático como ye encomparar distintes opciones, reconociendo que hai idegues diverses de xusticia que pueden convivir nel tiempu.

La Fundación Princesa de Asturias, que presume de gran repercusión internacional mientres les hemeroteques y los rexistros de tol mundiu nieguen añu tres añu esa suposición (por exemplu, los principales periódicos internacionales dedicaron más espaciu a la muerte de Quini qu'a los premios), esta vegada acertó. Premiar a Amartya Sen ye un notable reconocimientu pa la Fundación, que homenaxea en 2021 a quien fora Nobel hai 23 años, un oportunismu que-y sedrá rentable porque poques persones tienen tantu pesu como esti economista ata nos últimos requexos de los cincu continentes. Ya ye curioso sentilu falar de sigo mesmu: "nun debo ser nada importante porque cuásique nun teo enemigos".