Hai que salvar al osu

 

(El Fielato)

Cuando entá nun llogramos un mínimu consensu nel asuntu'l llobu, apaez un problema nuéu col osu, dempués de qu'una muyer fora atacada hai un par de selmanes. La recuperación de la especie fue posible porque hebo una aceptación xeneralizada na sociedá asturiana, que asumiera al osu como emblema de la so naturaleza, cuásique como símbolu nacional. Per otru lláu, a esa valorización diba contribuyir el fechu de qu'el mediu natural yera ún de los pilares básicos d'un sector turísticu qu'arrancaba en medio d'una cris industrial descomanada. Tamién tuvo la so importancia'l fechu de que, por frente al llobu, el bardión nun representaba la cara escura y xabaz de la naturaleza nos cuentos y lliendes tradicionales, nin yera una figura cola qu'asustar a los neños. L'osu nun pertenecía a la parte negativa de les estructures del inconsciente collectivu. Pero nesa revalorización munchos llegaron a escaecer que tábamos tratando con una fiera montuna.

D'esta miente, partiendo d'una situación dramática a primeros de los setenta, en namás que cincuenta años la especie espoxigó, como fixeron otres, como'l llobu precisamente. Por munchos motivos, el llobu siempres tuvo en discusión, teniendo munchos defensores y munchos detractores. Pel so lláu, l'osu nun tuviera prácticamente enemigos, entendiendo tol mundiu que la so recuperación yera importante y poco conflictiva. Ata agora, cuando podemos tar entrando nun procesu de perda de valor social.

L'osu pardu nun ye una especie particularmente agresiva y los alcuentros violentos con persones fueron siempres rarísimos, prácticamente nulos, n'Asturies. Si nun se ven amenazaos, particularmente si falamos d'una fema con esbardos, opten por quedar encamaos o por escondese silenciosamente cuando noten presencia humana. De fechu, inclusive en países de muncha presencia d'osos, los ataques son pocos. Hai que tener en cuenta que, ente tolos osos, namás qu'el blancu, el que llamamos polar, ye un superpredador que tien al home como una especie más a cazar. De fechu, nel casu de la muyer de Somiedu viérase claramente que nun fora un ataque en realidá. L'osu ataca cargando a cuatro pates, mientras que nesti casu púnsoxe de pies ya empezó a dar manotaes, golpeando a la muyer. Nun se detuvo nin siguió cola agresión, sinón qu'escapó a escondese.  

Tamién nesta situación apaez como problema de fondu el despoblamientu y l'abandonu de l'actividá agropecuaria, nuna causación circular viciosa. Tamos escontra un asuntu complexu, que va más allá del ambientalismu y tien muncho que ver cola conservación del entornu rural. Ye una grave enquivocación contraponer lo rural colo natural y, si acasu, habría qu'atender pa determinaes actividaes nel mundiu rural que nun son tanto agrícoles y ganaderes cuanto turístiques, asina como pa una alministración que yá amosó la so torpeza durante dos o tres décades, lo mesmo acogotando a la sociedá rural que desatendiendo la protección ambiental n'espacios y con especies. La marcha de la xente y l'abandonu de les tierres ta camudando'l paisax, echádose a monte malu, d'artos y matoxu, a lo que la fauna adáptase pero onde nun alcuentra suficiente alimentación. Tuvimos una esperiencia cuásique de llaboratoriu esti añu pasáu: los tres menses de confinamientu supunxeron una colonización de dalgunes zones por fauna silvestre, viéndose, por exemplu, llobos na rasa costera, non porque hubiere munchos más, sinón porque nun alcontraben presencia humana que los obligare a recular.

Los osos, qu'hibernen menos pol cambiu climáticu, tan adaptándose al entornu humanu, especialmente los más xóvenes, atrayíos por contenedores y por un turismu irracional que, intencionadamente o non, aliméntalos y que se avera a ellos col envís de, si fuera posible, sacar una foto pa subila a les redes. L'osu nun ye un peluche sinón un animal xabaz, non mui pelligrosu, pero mui fuerte y más rápidu na reacción de lo qu'aparenta, y letal nun casu estremu. Ye un grave error pensar que la naturaleza ye una película de dibuxos de Disney ya'l monte un parque urbanu, mientres que la so idealización nun sólo ye otru erru sinón que poco aída a la so conservación.

Yá se fala de qu'hai munchos osos y que deben ser controlaos, espresión piadosa pa falar d'esterminiu. Tamos falando d'unos 350 exemplares como muncho en tol cordal, de los que 300 taríen n'Asturies, fundamentalmente nel suroccidente. Son pocos exemplares y con poblaciones aisllaes, a les qu'una simple enfermedá podría llevar al puntu del que partimos hai cincuenta años. Tamién, contra toa evidencia, afírmase qu'el crecimientu poblacional lleva a más ataques por pura llóxica. Por embargu, los estudios de décades despliquen que nun hai correllación directa ente densidá poblacional y númberu d'incidentes. Ya ye'l conocimientu científicu lo qu'hai qu'aplicar y non ocurrencies nacíes d'un sucesu más o menos tráxicu y del calentón de barra de chigre o de sala de plenos municipal.