Esterminiu
(El Fielato)
Paez ser que nun tenemos problemes namás que colos llobos y, de poco pacá, tamién colos osos. Agora yá dan problemes les gaviotes. En Xixón, llóxico por ser la villa costera más grande, hai gran malestar nel vecindariu. Ye verdá que son paxarones cafiantes. Tas tomando tan ricamente'l vermutín nuna terraza y, de sópetu, ¡zas!, como un rayu pásate pela oreya una gaviota y arrampla col pinchu tortiella o la gamba gabardina. De plaga falen dalgunos. Vamos ver, que ye que tamos no de siempres. Xixón ya otres zones potencien el turismu y pa ello faen playes artificiales, pavimenten siendes costeres, construin escaleres nos pedreros, cuando nun faen feísimos endosaos. ¿Ónde quieren qu'añeren les gaviotes? Como tontes nun son, faenlo nos teyaos y diéranse cuenta que da menos trabayu atacar meses de chigre y comer parrochines frites que pelease por elles na mar. Namás cabe una solución: esterminales.
Enllenamos los montes d'ocalitos y nun dexamos sitiu pal corzu nin pal xabaril que, llóxicamente, baxen a los pueblos ya, últimamente, a les ciudaes, pasando peles urbanizaciones y los sos suculentos contenedores. Namás cabe una solución: esterminalos.
Esa repoblación con árboles que consumen augua más qu'esponxes tamién deseca les fontes, colo que baxa'l caudal de los rigos, colo qu'hai menos pexes, menos truches, menos anguiles... Amás, zampamos les críes, les angules, colo que mal queda la especie. Y los cagones, espulsaos de los pedreros como les gaviotes, tiren rigu arriba. Yá tenemos otra plaga que come los pexes y compite colos pescadores. Namás cabe una solución: esterminalos.
L'osu produz nel suroccidente asturianu, asigún los estudios menos optimistes, 20 miyones d'euros al añu y 350 emplegos direutos, el 90 por cientu de población llocal. L'osu ye'l reclamu turísticu más importante d'esos conceyos, pero, agora que piensen que tienen aseguráu'l turismu yá falen dalgunos de plaga. Y sobrovaloren los ataques, cuando nun hai falseamientos y trames mafioses p'atribuyir al osu lo que nun fae, como pasa notros llugares col llobu.
Los pueblos beneficiaos por ser parque vieron medrar la renta como nun vieran otros que son iguales. Nun hai más que pasar haza'l norte la llende llionesa pela parte de Los Picos d'Europa ya encomparar cómo tan les carreteres, cómo se conserven les cases y ata los edificios municipales. Nun hai comparanza: onde ye parque nótase y bien. Y agora, yá con bona renta, planteguen dalgunos qu'el parque ye la ruina. ¿Echamos cálculos? Y como'l llobu, l'osu, l'algaire ya otros medren un tanto... son plaga. Namás cabe una solución: esterminalos.
Y cuando los grandes predadores desapaezan y los cérvidos ya ungulaos enfermos nun tean quien los cace, porque los homes busquen trofeos y non allimentu, y la tuberculosis, la sarna o la brucelosis nun tea barreres naturales, el corzu, el rebecu, el ciervu, que, amás, dirán a pastiar onde les vaques, sedrán una plaga. Namás cabrá una solución: esterminalos.
Dicía hay un par de selmanes Vicente G. Bernaldo de Quirós nestes mesmes páxines que somos nosotros los invasores del territoriu. Igual ye un poco desaxerada la espresión, pero ye una bona reflexón: o vivimos n'equilibriu col mediu que mos caltién o esto va dir mui mal. Don Vicente dicía, con más razón qu'un santu, que será mester discutir dalgunes custiones secundaries pero non les fundamentales. Si entramos nel camín del esterminiu, tres les gaviotes, los osos, los llobos y los cagones... vamos nosotros. Asina furrula la naturaleza, cosa que sabíen esos ancestros nuesos de los que tanto presumimos.
