Gana una Italia cola que naide nun cuntaba

 

11 de xunu. Entamara la Eurocopa ya ye d'agradecer que se pueda ver nuna cadena que nun seya de pago. Turquía 0 Italia 3. Un enteteníu partíu de frontón nos primeros 45 minutos y nel segundu fúbol ente un equipu y mediu. Nun paez Turquía esa posible revelación de la que falaben ya Italia ye más de lo que cuntaben y, dende lluéu, muncho meyor de lo que viéramos nos últimos años. Pero esto acaba d'empezar.

12 de xunu. Sigui la Eurocopa. Viera un poco del Gales 1 Suiza 1, dende l'empate galés, y paeciérame enteteníu pero non gran cosa. Tamién viera dalgo del Dinamarca 0 Finlandia 1 (¡sospresa!) pero suspendiérase pol asuntu que tol mundiu sabe, el desvanecimientu de Eriksen, y nun viera la reanudación na que ganara Finlandia. Polo visto, peciérame mui superior Dinamarca y nun sé si nun pagara pol sustu. El Bélxica 3 Rusia 0, que sí viera enteru, fora un partíu guapu anque con clara superioridá belga, conforme a les espectatives.

13 de xunu. Inglaterra 1 Croacia 0: si nun tiníamos mui claro entá que la selleición inglesa, esta nuea fornada de fubolistes, suponía un cambiu impresionante, güei pudimos comprebalo, viendo que ya ata saben controlar el mediu campu. Más divertíu fora l'Austria 3 Macedonia 1, anque con menos calidá. Agora, el partidazu fora l'Olanda 3 Ucrania 2, con unos olandeses como nos meyores tiempos y unos ucranianos que, con cal y arena dende hai tiempu, güei tuvieron francamente bien. Polo que voi viendo d'esta Eurocopa, el campionatu promete, teniendo en cuenta qu'entá nun vimos a Francia, España, Alemaña. Portugal... y dalguna d'eses sospreses que siempres surden na fase d'equipos.

14 de xunu. España 0 Suecia 0, nun partíu que debiera tar ganáu polos españoles dende bien ceo pero que, con tanta incapacidá arriba, acabaron caendo a partir de la media hora nel xuegu malu pero ordenáu de los suecos. Eso sí, viérase por primera vegada no que va de campionatu, la idiosincrasia españistaní: empezar con retrasu porque les redes d'una portería nun taben bien colocaes y pitos del públicu a un xugador propiu, como-y pasó a Morata. Polo demás, dos sospreses, Escocia 0 Chequia 2 y Poloña 1 Eslovaquia 2, especialmente la segunda. Tuvieran un tanto de suerte los checos, que nun dominaron pa tal diferencia. Eso sí, el segundu gol de Schick pa posar la montera. Quedará esa imax como la del partíu, pero la victoria muncho-y debe al porteru, a Vaslic.

15 de xunu. Ungría 0 Portugal 3, lo esperao pero durante sesenta minutos paecía repetise lo d'España con Suecia, con unos portugueses dominando ampliamente, anque con unos úngaros mui superiores a los suecos. Ye que nesti xuegu los goles nun se merecen, márquense, y Portugal cumpliera y bien. ¡Y qué gran diferencia, dempués de tantu tiempu, lo d'un partíu con llenazu! Eso sí, paezme mui arriesgao tovía facer eso, y mui incomprensible pa otros sectores económicos. Pel so lláu, el Francia 1 Alemaña 0 nun defraudó: dos equipos sensacionales, la Francia de velocidá y riesgu, l'Alemaña de grupu ya estructura. Prestárame más Francia nun partíu perguapu. Una pena los dos orsais franceses, especialmente'l del gol de Mbappé, una auténtica xenialidá.

16 de xunu. Turquía 0 Gales 1. Bale faelo tóo, ata fallar un penal con una triba doble paradinha ensín xacíu, nun partíu perprestosu, enteteníu ya un tanto caóticu. Ata un final con tangana ya emburriones. Gales yá n'octavos. Italia 3 Suiza 0. Vilu a cachos porque nel mundiu rural cualisquier pequeña tormenta marcha cola lluz, cola siñal de televisión o coles dos coses. Capoco marchaba l'asuntu. Eso sí, acabo de rellenar la declaración d'IRPF y nun viera denguna casiella de deducción por nun tener los mesmos servicios públicos básicos qu'el restu de los ciudadanos. A lo que diba: colos 30 o 35 minutos que pude ver (ví dos goles polo menos, el primeru ya'l terceru), Italia mui superior ya yá n'octavos. El partíu Finlandia 0 Rusia 1 nun lu ví.

17 de xunu. Un Ucrania 2 Macedonia 1 enteteníu y con ganes poles dos partes, pero ganó al final el meyor fúbol ucranianu. Pel so lláu, un interesantísimu Dinamarca 1 Bélxica 2, con un equipu danés sosprendente, o non tanto a tenor de lo visto con Finlandia enantes del tráxicu percance d'Eriksen, qu'al puntu tuvo de sosprender a los belgues. Pero Bélxica diera una clase maxistral nel segundu tiempu. Ya Olanda cumpliera ensín problemes frente a una Austria que poco pudo pa torgar la victoria neerlandesa por 2-0. Esto va perfilándose ya ensín sospreses pel momentu.

18 de xunu. El Suecia-Eslovaquia amenazaba con ser lo peor y lo más aburrío del campionatu en viendo cómo marchaba'l primer tiempu, con una Suecia que paecía buscar otru empate y que yá vería qué facer nel últimu partíu. Pero Suecia amosó saber lo que trae ente les manes y tóo cambió nel segundu tiempu, frente a una Eslovaquia aseadina pero impotente, que acabó perdiendo por 1-0. Croacia 1 Chequia 1: la mesma situación. Nel primer tiempu, Croacia, con cuásique la mesma base que la del Mundial de 2019 nun llevaba nunca'l balón pel centru, cosa que facía mui bien, y paecía tener como llerza a xugar. Los minutos favorecíen a los checos y pasó lo que pasó. Pero llegó'l segundu tiempu, Croacia cambió, los checos nun se dieron ya'l partíu fora bien guapu. Ya Inglaterra 0 Escocia 0. Podría decir qu'Inglaterra fora una decepción pa lo que s'esperaba, pero la realidá ye que fuera una Escocia que plantegó mui bien l'alcuentru. Paecía que los escoceses pretendíen aguantar el primer tiempu, apertando y deseperando a los ingleses, pero fueron muncho más allá, xugando francamente meyor. Inglaterra perdía la claridá d'idegues ya Escocia ganaba en táctica ya en tarrén. Pero, faciendo un bon resume, hebo más pasión y más folixa que fúbol, onde lo más guapo fuera la melé nel ária inglesa, mui de british clasicism. Eso sí, esi neñu, Gilmour, ¡qué fiera!

19 de xunu. Ungría 1 Francia 1: ¿hai dalgún convidáu de piedra nuna Eurocopa? Normalmente Francia ye un equipu ensín vistosidá nin gracia pero que'acaba imponiéndose pola so eficacia na posesión y sacar oru de cualisquier oportunidá, pero... Ungría llega una vegada y gol, Francia empata nuna xugada bastante tonta. Al final, durante más de media hora, Francia tolo fiaba a Mbpare, y nun fue suficiente. Portugal 2 Alemaña 4: el meyor partíu de los que yo viera, con una victoria alemana bien merecía, anque otru resultáu nun diba ser cosa rara. Alemaña dominara en tóo, con un Portugal que xugara mui bien al contrataque, pero eso nun da pa muncho. ¡A ver si va pasar como nel Mundial, qu'a cada partíu que pasaba víase que yeran Cristiano Ronaldo ya otros más! Y España 1 Poloña 1, ¿o echaron pela tele otra vuelta l'España-Suecia pero con goles? Los españoles siempres paecen merecer más, pero ye qu'esto ye un xuegu que consiste en meter un balón pente tres palos. Y, si pa enriba, regales coses... El meyor, Morata, non namás pol gol sinón por posición y por oportunidaes. ¿Agora qué, sufríos españistaníes?

20 de xunu. Italia 1 Gales 0. Italia saca los 9 puntos d'esta primer fase, cuando pocos cuntaben muncho con ella, ensín dengún gol en contra y ganando colos suplentes a una Gales peleona. Y Suiza 3 Turquía 1, partíu que nun viera.

21 de xunu. Austria 1 Ucrania 0. Fora un partíu enteteníu, nada del otru mundiu pero con una Austria que, lloñe de la brillantez, comete pocos errores; ya una Ucrania mui a la española, controlando la pelota pero ensín saber qué facer con ella nos últimos trenta metros. Austria n'octavos. Finlandia 0 Bélxica 2 nun partíu aburríu y soporíferu ata los últimos venti minutos, que la cosa fuera animándose, con más posesión d'una Bélxica yá clasificada y xugando al trantrán, ya una Finlandia que da pa mui poco sacantes d'aguantar y aguantar. Rusia 1 Dinamarca 4, partíu que nun ví. Y acabose lo único interesante: si de güei podría salir n'octavos un morbosu Rusia-Ucrania.

22 de xunu. Croacia 3 Escocia 1, partíu que nun viera y que, como yera d'esperar, manda pa casa a los escoceses. Enteteníu y dalgunes vegaes guapu, cuando metíen velocidá, esi Chequia 0 Inglaterra 1. Una convincente Inglaterra, con esa llínia de tres situada nun espaciu ente la media y la delantera, y riba tóo con mui bon xuegu llateral, peles dos bandes. Pero, si nun ye l'equipu que menos goles mete, sedrá por poco. A partir del minutu 30 de la segunda parte empezáramos a apigazar, xugadores ya espectadores: nin un tiru a puerta. "¿Vamos dexalo asina y dexar de facer esfuerzos?". Ya equí entren los analises de probabilidaes. Les dos selleiciones yá taben n'octavos y la que pasara como primera diba alfrentase cola segunda'l grupu F, el terrible. Fixe unos númberos cenciellinos. Si daplicamos métodos d'estadística descriptiva, lo más probable ye qu'Alemaña seya segunda d'esi grupu, teniendo la mesma probabilidá de ser primera Francia y Portugal; mientres que si facemos una aprosimación d'inferencia lo más probable ye qu'Alemaña seya primera. ¿Qué pensaríen ingleses y checos? Y los cálculos de Chequia alteraríense col tercer gol de Croacia a Escocia.

23 de xunu. Nun viera'l Suecia 3 Poloña 2 nin l'Alemaña 2 Ungría 2. El Portugal 2 Francia 2 sí que lu siguí. Meyor Portugal na primera parte y Francia defendiendo como siempre pero aprovechando peor les salíes. La segunda parte fora otra cosa y bien emocionante. Allá pal minutu 80 yá daben la cosa por bona, viendo lo que taba pasando en Munich con Ungría. Paez mentira que nuna Eurocopa exemplar en nun pitar cualisquier cosa, fora precisamente Matéu Lahoz el de la gran cagada del penal contra Portugal. Si eso ye penal yo soi superiora de les adoratrices. Ungría pa casa, con gran contentu del so públicu y del so gobiernu, que, por fín, ven a los sos fubolistes dexando esos pozos de xudíos, lliberales, masones, maricones y comunistes. Y, por fín, ganó España: Eslovaquia 0 España 5, con una victoria más que merecía. El primer tiempu falábamos del cuentu de siempres: dominar, xugar y nada. Cuando'l porteru eslovacu paró'l penal de Morata... en fin. A esperar que Suecia cumpliera. Y el 0-1 en propia puerte d'una manotada'l porteru. Dempués tóo cambió y viérase un equipu que, amás de xugar bien, alcontraba la eficacia. Gustome Sarabia y, riba tóo, Jordi Alba. Ya'l vieyu perru Busquets sigui poniendo gayola y movilidá. Allégrome, especialmente, por Luis Enrique y por dalgunos de la tele, como'l calvu llorón ya'l toreyes enfurruñáu.

26 de xunu. Dinamarca en cuartos de final dempués de golear a Gales por 4 a 0. Victoria danesa bien merecía, con dominación total dende'l minutu 20 de la primera parte, qu'ata ehí llegó Gales, y mayor entá nel segundu tiempu. Na fase de grupos yá me gustara Dinamarca, controlando los partíos pero ensín rematar el llabor, perdiendo inclusive los dos primeros alcuentros, ún d'ellos con una Finlandia que tiró una vegada y marcó ya'l sustu d'Eriksen. Tamién en cuartos Italia, tres ganar por 2 a 1 a Austria. Un partíu con tres partes. Una Italia qu'ocupa mui bien el campu contrariu, dominando y xugando per tolos sitios: eso fuera'l primer tiempu pero demasiao na horizontal. De toles formes, recordando la fase de grupos, tóo apuntaba a una victoria fácile. El segundu tiempu entamó igual pero con Austria más incisiva y valiente, con una defensa perpotente y con gran esfuerzu físicu. Italia desdibuxada ya ensín fuelgu, y gol austriacu anuláu. Y cola prórroga volviera la Italia que suponíamos, con un golazu de Chiesa. Esta Italia, na mio opinión y polo que yo viera, ye una clara favorita d'esta Eurocopa, ya eso que tener alantre a dalguién que se llama Immobile da mala espina.

27 de xunu. Bélxica y Chequia a cuartos de final. Contundente Olanda 0 Chequia 2, con una "naranxa estática" de fúbol probetayu que nun fue a superar nunca la ordenada táctica'l contrariu. Merecía victoria checa ante, vala la terminoloxía tan propia de los neerlandeses, una escuadra desarbolada, con víes d'augua per babor ya estribor ya ensín naide na ponte. Bélxica 1 Portugal 0 nun partíu con muncha igualdá ya un primer tiempu de miéu y respetu peles dos partes, col síndrome de nun meter la pata. La segunda parte fuera emocionante, riba tóo tres el gol belga. Si nun fuera porqu'esto consiste en meter un balón ente tres palos, Portugal mereciera dalgo más. En viendo lo visto nun podemos falar de sospreses pero les apuestes nun tuvieron mui afinaes.

28 de xunu. ¡Vaya tardi-nuechi de fúbol la d'esti 28 de xunu, d'eses que faen afición! ¡Catorce goles y una tanda de diez penales! España y Suiza van vese les cares el vienres que vien en cuartos. El Francia 3 Suiza 3, un partíu fantásticu, nun respondiera a lo esperao previamente pero sí a lo visto nel campu. Dempués del 0-1 y fallar un penal aquello paecía ser un espeyismu. Pero los helvéticos nun se dieran. Francia ta mui bien armada, dende una defensa mui segura a una delantera mui eficaz. Suiza xugara de tu a tu a la campeona mundial y la principal favorita dende enantes d'empezar el tornéu, con rapideza allantre ya una defensa recia. Y partíu vibrante ya un tanto llocu esi del Croacia 3 España 5, nel que los españoles merecieron con claridá la victoria y pasáronles más putes de lo que fixeron pa ello los croates. España aguantó bien y supo reponese del mazazu'l primer gol y de dir a la prórroga cuando a siete minutos del final ganaba por dos goles. Como me vien paeciendo dende'l principiu la Eurocopa, por frente a los que tanto esperaben d'esa selleición, Croacia nun ye nin la solombra del Mundial de Rusia, siempres a la defensiva y dependiendo de Modric les poques vegaes que-y llega un balón. Tóo taba de cara pa España pero llegó'l 1-0, igual ún de los goles más tontos de la historia'l fúbol d'alta competición y, dende lluéu, el más tontu que yo me recuerdo. Na prórroga, la victoria diba ser pal que nun cometiera l'error más gordu ya errores nun faltaron na media hora ensín táctica denguna que fue aquello. Pero, en fín: una España muncho más convincente que Croacia y que confirma lo visto escontra Eslovaquia. ¿Ya'l viernes, qué? Yo apostaría por España, pero... Dos bones selleiciones nel campu y con bon dominiu de balón pero con un detalle diferente: Suiza marca goles en xugaes clares, España cuásique siempres con barullu.

29 de xunu. Inglaterra ya Ucrania piesllen la llista de cuartos de final. La selleición inglesa ellimina a l'alemana con un 2-0, venciéndola por primer vegada nuna gran competición dende la final del Mundial de 1966. ¡55 años! Alemaña, que se divierte cola pelota nos pies, xugó a esperar y cuerrer la banda, con una bona combinación d'unos estremos que diben a pierna cambiada, pero nun llograba superar al bloque defensivu inglés, firme en toles fasteres del campu. Ata qu'Inglaterra alcontró la combinación clásica, la qu'ellí llamen seven eleven. Y rellumaron McWay, Cross, Kane, ya especialmente un delanteru pequeñu de fina táctica como Sterling. El partíu Suecia 1 Ucrania 2 nun lu ví.

2 de xunetu. España ya Italia a la semifinal. El Bélxica 1 Italia 2 fora trepidante, sensacional, de poder a poder pero, pal mio gustu, con una Italia superior, dominando y calteniendo táctiques d'ataque inclusive ganando con claridá, enantes del penal. Bélxica col orde de siempres, el que lleva encadarmando dende hai unos años, pero ensín premiu. Italia ye un equipu que nun apara de morder allantre, de buscar portería. Ye un equipu impresionante. El Suiza 1 España 1, solucionáu a penales, fora muncho más pesáu, con poca brillanteza, con unos suizos técnicamente perbonos que, como lleven faciendo dende l'entamu la Eurocopa, nunca cambien la táctica. Por una vegada, España, mui gris, tuvo suerte, pero, como se diz popularmente, na rula nun pregunten, apunten. Sigo pensando qu'España va sufrir y más entá, visto lo visto, nuna semifinal con Italia. Xuega bien, controla los tiempos y paez mui fiel al espíritu de Luis Enrique. Llega bien a los tres cuartos del campu contrariu pero... o suerte, como tuvo güei, o marcar nun barullu. Güei sólo tiró de verdá a puerta en xugaes embarullaes.

3 de xunetu. Inglaterra y Dinamarca a semifinales, como yera d'esperar. Nun hebo sospresa denguna, anque nel Chequia 1 Dinamarca 2 pudo pasar dalgo más, a lo menos dir a la prórroga. Dominiu claru de los daneses, anque salieran al segundu tiempu como un poco noqueaos, como si nun supieran qué facer ante la posibilidá de nun ganar con claridá, cosa qu'aprovecharon los checos pa xugar los sos meyores minutos pero que bien ceo acabaron con un cansanciu evidente. Al final, cumpliérase lo pronosticao, nun partíu bastante gris. Ya'l Ucrania 0 Inglaterra 4, pesie al resultáu, bastante aburríu, por causa d'una Inglaterra que nun diba matase pa facer más de lo mínimo porque lo mínimo yera abondo pa ganar. Un gol nel minutu 4 del primer tiempu y dos en los cincu primeros del segundu permitíen a los ingleses dir al trantrán, cansar lo menos posible y facer tolos cambios, cola vista puesta na selmana que vien y nos daneses. Un equipu mui asentáu nel que tóos cumplen nel so llugar, exemplarizable nun home como Kane. Ya ensín un gol en contra en lo que llevamos de campionatu. 

6 de xunetu. Italia 1 España 1 y los italianos a la final. Dempués d'una salida fuerte d'Italia, la sellección azul xugó peor de lo esperao, al tiempu qu'España facía lo contrario, facelo meyor de lo que se suponía. A min sosprendiérame Italia pa mal. Daba por fecha la victoria italiana y viera un partíu nel que mereció perder. La estratexa italiana fora la d'aguantar ya esperar, porque fae muncho meyor una cosa: dominar ensín tener el balón. Los españoles sólo dominen si tienen la pelota nel so poder. Por eso Italia tiró menos vegaes a puerta pero siempres con pelligru, mientres qu'España fae lo contrario: tira y tira. Y, otra vuelta, embarulladamente cuásique siempres. Y, al trantrán, Italia xugó a dir a penales dende la metada la prórroga. Luis Enrique puede tar contentu porque ta faciendo un equipu sobro la marcha, asigún la so filosofía y con mayor credibilidá a cada partíu que pasa, pa desesperación de los más españoles de los españoles, los medios y los falandeiros de Madrid y del Madrid. Nunca viera yo, y viviera les últimes fases de la Eurocopa n'Asturies y nel País Vascu, tantu cariñu a la española. Efectu rebote escontra los cavernícoles, podríamos dicir.

7 de xunetu. Inglaterra 2 Dinamarca 1 y los ingleses, conforme a los pronósticos, a la final con merecimientu, la so primer final nuna Eurocopa. Un partíu guapísimu nel qu'Inglaterra presionó con una potencia mayor que nunca los venti primeros minutos, pero Dinamarca, un equipu sensacional, de los que más me gustaron ente tolo que ví, punxo les coses nel so sitiu ata'l puntu de marcar primero. Los ingleses pensaríen aquello de que los daneses taben twisting the neck of the horse. Pero, anque bien colocada, Dinamarca poco más pudo. Y Kane, ¡qué xugador!: controla la media, mete goles, asiste como naide, cae a les bandes, ata marca penales, anque seya un penal un tanto duldiosu na mio opinión. Inglaterra bien podría cambiar la lletra l'himnu: "God save Kane".

11 de xunetu. Italia 1 Inglaterra 1 y campiones los italianos na tanda de penales. Dos partíos y mediu namás que nun alcuentru. Nuna xugada perfecta y nel minutu 2 marca Inglaterra, que dominara en tolos terrenos y demarcaciones, faciendo'l xuegu que quixo, ata'l minutu 40, cuando les coses fueron igualándose. El segundu tiempu fora bien diferente, con una Inglaterra que sufriera tanto o más que contra Dinamarca y con Kane embaxo mínimos y Sterling desapaecíu. Y l'empate. Una pena la llesión de Chiesa, estraordinariu nel campu y columna vertebral del equipu azul. Demostrárase qu'Italia tien más rexistros qu'una Inglaterra que lluchaba contra sigomesma, contra la so historia, que, como dixera'l mesmu Southgate "nun ye tan bona como munches vegaes mos presta creyer". Y tamién contra una semifinal ganada con un penal inxustu y la sospecha, infundada como resultara evidente, de favoritismu. Italia, dalguién lo dixo, como Mae West, cuando ye bona ye perbona y cuando ye mala ye meyor. Esta Italia ye sosprendente: si nel segundu tiempu llega salir con otra camiseta, cualisquiera pensaría que yera otru equipu. En conxuntu, viendo los 120 minutos, gustárame más Italia. De la risión fecha himnu polos escoceses en 1996, con aquello de "it's coming home" al glayíu inglés d'agora de "bring it home". Nun pudieron, anque fora a penales. Ya Italia campiona por segunda vegada dende 1968. Inglaterra siguirá esperando.