Una revolada de tres díes
Saliéramos d'Argañosu na mañanina'l martes pa dar un paseín pela sablera de Barru, nel conceyu de Llanes. Otru paseín pela de Laredo ya unes rabes pa entonar. Y Bilbao, pa mín una de les ciudaes más agradables y de meyor ambiente d'Europa, especialmente pola xente, por frente a chistes mui conocíos. Ellí viera, na tabierna Txiriboga, l'Inglaterra-Alemaña, con públicu mui mayoritariamente anglófilu. Yera tar como en casa. Ganara merecíamente Inglaterra pero con un partíu malu peles dos partes. Si Portugal y Francia cayeran, lo d'Alemaña ya Inglaterra fora de partíu de patiu escolar ata mediáu'l segundu tiempu. Esta Eurocopa va dar muncho de falar. ¿Una final España-Inglaterra?
Ya una pena: taba pesllada la Inakiren Taberna, ún de los templos del vieyu Bilbao, de carta curtia pero cocina de caserío, aconseyable miremos per onde miremos. Hai unos cuarenta años que la visito siempres que paso per Bilbao. Entós, segunda opción pa nun caminar muncho, bacalao pilpil nel Amarena, onde, na fachada, ta l'Amatxu Txikitera, la Virxe Begoña con un vasu vinu na manu. Ye l'únicu puntu'l Bilbao vieyu dende'l que se pué ver la basílica de Begoña, onde se ponía la hucha txikitera. Ye, esquina Pelota con Santa María, llugar de peregrinación durante les fiestes d'agostu. Ellí los txikiteros, los que poteaben pel barriu nos años cincuenta del XX, dexaben la calderilla que sobraba de les rondes, perrines y perrones, céntimos de peseta, nuna hucha pa los güérfanos, los neños de La Casilla, l'orfanatu. Estos bilbaínos, grandones como ellos solos, encastraron na paré una virxe sedante col neñu, de claru raigañu románicu, y con un vasu de los de culu, típicos vinateros, na so manu drecha. La imax tien quince años pero, tando en Bilbao, podría tener mil quince.
Unos vermutinos pel Bilbao burgués con visita a la biblioteca antigua de la universidá xesuítica, privilexos que tenemos dalgunos (hehehe...), y rumbu a San Sebastián. Paseín pela Concha y cena en La Espiga, con un pieslle sobrosaliente de pantxineta, un hoxaldre rellenu de crema caliente y con almendres tostaes, típicu postre donostiarra. Una nuechi de pequeñu autohomenax nel Llondres. Mañanina nel sable d'Ondarreta y dempués unos pinchos pel Donosti vieyu. Cafetín en Castro Urdiales ya unes anchoes en Santoña.
Posada y fonda en Santiyana'l Mar, con cena que llevaba sidre de la tierra, del Llagar de Somarroza, de Renedo de Piélagos. Un tanto dulzono pero nun taba mal. Eso sí, yera mester tomala dempués de dexala media hora porque taba de nevera. Dixérame'l rapaz, mui simpáticu, qu'elli nun sabía nada de sidre y qu'asina la prefieren los turistes, madrilanos fundamentalmente. ¡Ai, ai!, que van acabar saliendo les peores zunes de los peores chigreros d'Asturies... Díxei que tuviera unes botelles en fresco pero non frío y qu'a ver... Tomó nota pero... Caro qu'al día siguiente viera anuncies nos bares de pinchu y caña cerveza, vasu vinu o culín de sidre por 2,50 euros.
Nostante, tuviera tiempu pa un asuntu bien interesante. El rapaz aportara enantes de terminar de cenar ya entrugome por una cosa: "Santiyana'l Mar ye de Cantabria, pero yo teo sentío falar de les Asturies de Santiyana, ¿por qué?". Como yéramos los únicos clientes xunta otra parexa, nun tinía muncha xera, asina que sentose al nuesu lláu y atendiera con procuru a lo que-y despliqué. "Esto voi contalo a otros", dixo. Eso espero.
