La romería llaica: de san Pedro a san Timoteo


 

El branu fiesteru va morriendo pasín a pasu y, anque queden entá romeríes y cellebraciones, seguramente esti día 22 ye la última de gran afluencia, por coincidir coles vacaciones d'una mayoría de naturales y foriatos y ser la propia de villa tan importante nel noroccidente costeru como L.luarca. Cellebramos a san Timoteo, cuya vida recuerden los cures na misa na so capiella valdesana.

Asigún el llibru Fechos de los apóstoles, l'unicu que podemos considerar históricu, cuando menos parcialmente, del llamáu Nuéu testamentu, Timoteo yera fíu d'hebrea y griegu, polo que cuntaba con una formación tanto xudía como pagana, anque la madre taba convertía al cristianismu. Siempres se lu vincula a Saulo de Tarso, Pablo, siendo ún de los grandes collaboradores del apóstole, quien lu llega considerar como un alter ego. Asina, Pablo escribe nuna carta a los filipenseses: "espero poder unviaros ceo a Timoteo, pues a naide teo colos mesmos sentimientos pa con vós nin que s'esmoleza tan sinceramente polos vuesos intereses". De fechu, Eusebio de Cesarea diz na so Historia ecclesiae que fora'l mesmu Pablo quien lo constituera obispu d'Éfeso. Ye Timoteo ún de los pocos santos veneraos col mesmu ciñu por católicos, ortodoxos y coptos.

¿Y cómo llegara san Timoteo a ser veneráu en L.luarca y gociar de tanta consideración neses tierres valdesanes y notres cercanes? Pues de manera denguna. Timoteo nunca tuviera devoción en L.luarca nin tampoco la tien dende 1910, que ye'l primer añu nel que se cellebrara la so romería.

Fuera entóncenes cuando llegara la rede d'augua a la villa y, pa cellebrar fechu tan importante, decidieron los vecinos buscar una fecha pa facer fiesta. Pa tener cierta seguridá de bon tiempu nel siempres variable y caprichosu branu asturianu, consultaron a los astros y al Calendario zaragozano pa descubrir qu'el día más lluminosu y de más hores de sol yera'l 22 d'agostu. Pa dotar a la fiesta de rigor y sonadía buscaron santu patronu, resultando qu'esi día taba dedicáu a san Timoteo.

Pero resultaba que Timoteo nun yera veneráu en dengún sitiu conocíu y, por nun saber, nun sabíen nin quién fuera nin qué prodixos fixera, y muncho menos qué aspeutu tendría, si mozu o vieyu, si flaire o campesín, si guerreru o músicu. Consultada la santa madre ilesia dieron, evidentemente, colos Fechos de los apóstoles". Y buscaron una imax antigua pa facer una copia, alcontrándola en tierres de Castiella. A un tiempu, los vecinos lluarqueses, ecabezaos por Marcelino Rico Rivas, cellebraron una xira a un práu de Ferrería, nel camín de Navelgas, onde fixeran, a campu rasu, bailles, cancios, xinta y xaréu. Ellí, esi 22 de agostu de 1910 quedara instituyía la Cofradía de San Timoteo.

Dende 1911 ata 1928 los marqueses de Ferrera ceden el mesmu prau a la cofradía, cuando ésta-ys compra Los Campones, un prau de 86 díes de güés, pola cantidá de 2.700 pesetes, prau qu'acabó por llamase al poco y ata agora Prau de San Timoteo. El 22 d'agostu d'esi añu nagúrase la capiella que güei conocemos ya instalase nella la talla de El Santín, obres les dos de Francisco Suárez Manso, más conocíu como Quico  Libelia.

Como cuerrespuende a una fiesta que sábese profana dende los sos anicios, los vecinos, vistíos colos chambrones grises nos que lleven cosía una t bermeya, llevantando nes manes bastones, nun saquen a san Timoteo de romería, sinón de paseín, y nun-y canten himnos sacros sinón el cumpleaños feliz ya un himnu llaicu al qu'el santín arrepostia baillando al ritmu los sos porteadores. Ye llamativo'l fechu de que la t de san Timoteo recuerda a la tau exipcia y, por forma y collor, a la cruz de la orde templaria. ¿Reminiscencies de la importante presencia masónica en L.luarca nos caberos años del XIX y primeros del XX?: sedría una hipótesis.

Dempués del paseín ya'l baillongu san Timoteo retírase ya entama una xinta popular con tol prau enllenu manteles ata que, en morriendo la tardi, un representante de la cofradía glaya:

¡a les nueve fuera'l campu,

que namái que queda'l santu!.

Evidentemente, la xaculatoria orixinal falaba de les siete, cuando l'horariu alministrativu yera'l mesmu que l'horariu solar.

Pero si'l ciclu fiesteru braniegu entama pesllar, anque tovía queda un mes, cola romería profana de san Timoteo, entamara cola non menos profana de san Pedro de La Felguera y que, amás, vien cellebrándose dende los mesmos años.

Asigún la tradición cristiana, Pedro, de nome orixinal Simón, yera un pescador del mar de Galilea ata que Xesús lu llamó a ser pescador d'homes. Sobro la so cabeza, cefas, asentó Cristo la so ilesia, una circunstancia de xuru falsa ya inventada muncho dempués. Cuéntase que fora crucificáu na collada Vaticana en tiempos de Nerón, asina como que los sos restos tan nos suétanos de la basílica papal dedicada al so nome.

Como pasara en L.luarca con san Timoteo, lo mesmo pasa en La Felguera con san Pedro. La romería de san Pedro entamara la so andadura'l 29 de xunu de 1908, na idega de caltener la fiesta que Pedro Duro daba a los felguerinos pola so onomástica, con gaita y tambor y na que sorteaba una partía de riales de vellón ente los trabayadores de la so fábrica. El rial de vellón yera una unidá de cuenta castellana que equivalía a una ventiava parte de la pieza de 8 reales, alcuñada por Xosé I y retomada nel trieniu lliberal y nel reináu de Sabel II. La moneda tamién yera conocía como duru, circunstancia que Duro aprovechó pa la so aleatoria donación.

Pedro Duro, qu'entamara la so vida llaboral como aprendice fabril, llegara a Llangréu dende La Rioxa na que naciera, nes tierres de Cameros, a mediaos del XIX, llevantando en 1857 una siderurxa na pequeña parroquia de Turiellos, concretamente nunos terrenos que llamaben La Felguera, topónimu que mos remite a la presencia de felechos, deriváu del llatín filictum o filectum. L'industrial uniera pa la historia económica y pa la memoria popular el so apellíu col de la tierra al dar nome al complexu fabril como Duro Felguera.

Pedro Duro, que llevaba como divisa la idega de que "a naide-y ta prohibío ameyorar la so suerte na vida", diseñara un sistema proteición al obreru qu'incluyía asistencia mélica ya enseñanza. Pal segundu obxetivu llevantó dos escueles, una pa neños ya otra pa adultos, con gran éxitu. De fechu, cuando morriera, en 1886, La Felguera presentaba el mayor nivel d'alfabetización d'España. La so muerte fora llorada polos que yá se llamaben felguerinos, que-y dedicaron la estatua qu'entá preside'l pueblu, enriba un pedestal blancu pola caliza, negru pol carbón y bermeyu pol fierru colao.

Cuásique trece años dempués de muertu l'industrial, el 29 de xunu de 1908, cellebrárase la primer romería de san Pedro y nun tuvo dengún componente relixosu sinón que fora una marcha cívica dende'l taller de torniellería ata'l centru alministrativu de la fábrica, con parada nel monumentu a Pedro Duro, nel qu'entóncenes reposaben los sos restos. Dempués hebo xinta y bailles con bandes de música, gaiteros y tamboriteros, asina como campionatu bolos. De xuru que l'añu más memorable d'aquella dómina fuera'l de 1919, cuando una avioneta acrobática, pilotada por José Piñeiro, sobresñaló La Felguera, siendo la primer aeronave que lo facía na historia.

La romería felguerina sigui viva y con perbona salú, anque careciera la influencia'l franquismu, que, col so integrismu de sacristía cuartelera, impuso un componente relixosu que sólo yera marxinal dende 1908. Eso llevara a que muncho xente piensa que La Felguera festexa al santu apóstole, cuando la realidá ye otra, el recuerdu a Pedro Duro, al pasáu industrial de la vieya parroquia de Turiellos y a la sociedá civil, llaica ya illustrada de la burguesía lliberal y del incipiente movimientu obreru.


Entradas populares de este blog

"Asturies tinía la soberanía propia d'un estáu: moneda, defensa ya esteriores"

Les multinacionales fieden a cuchu

Recepción solemne de Xuan Nel Gonzali como Repunante d'Honor