"Un turismu caltenible social y culturalmente ye más rentable"


 

Mariano Suárez: Mui bones. Tamos con David Rivas, profesor d'universidá, concretamente d'estructura económica, pa falar d'un asuntu como ye'l turismu n'Asturies, siempres importante pero más nestes dómines braniegues. Profesor, ¿qué pué falamos del turismu como actividá económica? 

David M. Rivas: El turismu ye una actividá que va medrando, que va espoxigando, y que nun va dir a menos sinón que va dir a más. Pesie a les pandemies ya otres custiones del presente, que paez que influin nuna menor movilidá, el turismu medra y la cayía ye coyuntural, una situación qu'igual pué durar un añu más. Viaxar ye una actividá tan antigua como la mesma humanidá, munches vegaes como aventura, otres como espedición militar o científica, yá na so versión demográfica como migración. Pero'l turismu, tal y como lo entendemos agora ye un fenómenu venceyáu a la globalización y al aumentu de la renta de les clases medies urbanes de los países desarrollaos. Eso convirtiera al turismu, dende hai yá más de mediu sieclu pero riba tóo nos últimos venti años, nun sector vital pa la economía de dellos países. Por exemplu, yendo al nuesu casu, enantes de la pandemia actual, con datos de 2019, el turismu representaba p'Asturies un 10,6 por cientu'l valor añadíu brutu ya'l 12,7 l'emplegu. Son porcentaxes importantes ya eso que trátase d'un país que nun ta nos grandes circuitos. Lo que nun se suelen contabilizar son los perxuicios económicos que conlleva, dende los derivaos del deterioru ambiental ata los más inmediatos como'l desplazamientu d'otres actividaes, la perda de calidá de vida de dalgunos grupos de residentes, l'incrementu de los gastos públicos de les alministraciones llocales, munches vegaes de pueblos pequeños, ya un más o menos llargu etcétera. Son lo que la economía convencional llama efeutos esternos o esternalidaes. A esti respeutu, yo soi un defensor del turismu. Tar en contra, la verdá, sedría como querer derogar la llei de la gravedá. Defendo, polo tanto, el turismu, pero non cualisquier modelu turísticu.

M.S.: ¿Tamos n'Asturies con un turismu masificáu y que provoca munches d'eses esternalidaes o non?

D.M.R.: Hai una realidá ya una percepción. La percepción, lo que los asturianos piensen polo xeneral, sacantes los que viven d'ello, ye qu'hai un turismu masivu, qu'Asturies arrecibe demasiao turismu. La realidá ye otra pero esa percepción nun dexa de tener una desplicación llóxica. Al ser Asturies un país pequeñu y non bien dotáu pal turismu masivu xeneralizáu, por razones climátiques, orográfiques, de comunicaciones internes, tol turismu concéntrase nunos puntos mui determinaos. Ye como la percepción que se tien sobro la inmigración. Si garra ún el metro en Madrid un domengu pola tarde tiende a pensar que la inmigración ye enorme, mui superior a la real. La desplicación ye cenciella: los domengos pola tarde son de poco movimientu pa los madrilanos de tola vida. Eses hores dominicales son, normalmente, de vida familiar, de grupu íntimu, pero son les d'esparcimientu de los ciudadanos llegaos de recién, con otros vezos ya otros horarios llaborales. Entóncenes el metro va llenu de sudamericanos y africanos, por exemplu. Pues eso pasa col turismu n'Asturies, que ta mui concentráu, polo que se nota una presión mayor de la real, la que tendríamos si midiéramos en ratiu por habitante o por kilómetru cuadráu. Pero la presión ye mui fuerte nesos puntos, mesmo urbanos que rurales, asina como tamién nos espacios naturales. De fechu, n'ecoloxía emplégase un indicador como'l de capacidá de carga pa midir estos impactos y n'Asturies da cifres peraltes en dellos llugares. Por exemplu, ya eso llévamos a lo anterior, l'impautu sobro Los Picos d'Europa ye mui reducíu, pero resulta descomanao nel entornu de los llagos de Cuadonga, en Bulnes, nel beyu d'El Cares... Lo mesmo pasa con sableres como Rodiles, La Ñora, Verdiciu, Salinas o Aguilar. Eso por nun falar de Gulpiyuri, que ye un furaquín que debería tener controláu l'accesu. Gulpiyuri nun pué soportar los impautos qu'arrecibe. Nun soportaría tansiquier convertise nuna playa d'usu esclusivu pa los llaniscos. En cambio, la playa San Llorienzu nun carez d'impactos graves por causa'l turismu porque ye un espaciu urbanu y totalmente degradáu, anque haiga muncho xente. Nun ye lo mesmo aglomeración que masificación, nin degradación que presencia. Lluéu ta la urbanización, especialmente na costa y mui especialmente na costa más oriental. Esi impactu, vinculáu al turismu, provocó un deterioru ambiental ensín cuentu, una perda d'espacios agrarios y ganaderos, un procesu de subordinación cultural y, amás, una burbuxa inmobiliaria y financiera que, a un plazu mediu, funde les economíes llocales y acaba coles estructures sociales.

M.S.: ¿Qué soluciones ve pa esti turístimu masificáu, anque seya una masificación puntual y determinada?

D.M.R.: Hai munches midíes pa solucionar esto. Dalgunes son mui coercitives y difíciles d'aplicar. Tamos falando del drechu a la movilidá, mui en boga güei coles famoses sentencies de los tribunales sobro les llimitaciones por causa la covid. Dalgunes vegaes la única solución ye impedir el movimientu de la xente. Hai problemes que namás se pueden resolver aplicando direutamente prohibiciones, que van dende nun poder dir en coche ata un puntu a equis kilómetros del llugar, pasando por una llimitación del númberu de visitantes y llegando a la prohibición total d'accesu. Nos parques nacionales, por exemplu, hai llugares a los que nun se permite dir o permítese sólo con permisos especiales, lo mesmo que pasa coles reserves biolóxiques, como ye'l casu de Muniel.los. Tamién hai puntos na costa y áries de mar adientru que tan vedaos al turismu. Pero les coses complíquense muncho cuando falamos d'espacios poblaos, de llugares habitaos. Ya esi ye'l principal problema que tien Asturies. Les midíes coercitives más dures son fáciles d'aplicar n'espacios naturales, más o menos poco tocaos pola manu humana, pero nun pasa eso nesos otros sitios. N'Asturies son pocos los llugares virxes y lo qu'esiste ye una continuidá ya una integración ente lo natural y lo humano. Esti ye un país con miles d'años d'interrelación y los pueblos, les aldegues, nun tan alloñaes de les tierres de cultivu o de los pastos, sinón que tóo forma un conxuntu únicu, un verderu ecosistema. L'aldega asturiana nun ye mui diferente a como yera hai mil años ya inclusive como yera nel neolíticu. Y, caro, equí les polítiques de prohibición son complicaes d'aplicar. Si un pueblín sólo puede arrecibir, nun sé, cien persones al día, ¿qué facemos cuando pola fiesta lleguen los familiares que tan emigraos y sumen doscientos? Cola rixidez de la llei española, que ye aberrante nel mundiu rural asturianu, igual los obliguen a comer nun prau a tres kilómetros del pueblu. Anque esto paeza un chiste, nun lo ye. Coses d'esti tenor tan pasando agora con normatives d'otru calter.

M.S.: ¿Hai dalguna otra fórmula diferente de la prohibición que se puea aplicar nesos llugares onde les midíes más dures son difíciles o imposibles de poner en marcha?

D.M.R.: Hai instrumentos económicos como lo que llamen ecotasa, anque a min nun me gusta muncho'l términu. Yo quedaríame namás que con tasa. Nun sé'l por qué d'esa zuna por facelo tóo eco, como soste o como bio, además de que tamos falando, realmente, d'un preciu y non d'una tasa, que son coses perdiferentes n'economía. Nel fondu, trátase d'internalizar aquellos costes esternos de los que falábamos enantes. L'asuntu ye que los turistes paguen un preciu que, si ta bien fechu, previamente calculárase con dos criterios: que sirva pa compensar perdes socioeconómiques y que nun seya disuasoriu, esto ye, qu'aíde a la solución pero que nun torgue la movilidá. L'equilibriu nun ye siempres fácile pero, por llimitáu que seya esi preciu, dalgo contribui a iguar les coses, revirtiendo lo recaudao nel territoriu y na población. Eso sí, los qu'estudiamos esti instrumentu, como yo, que yá lo fixe hai cuásique cuarenta años cuando la mio tesis doctoral, sabemos que la internalización nunca ye completa nin suficiente. Nesta economía lliberalizada ye mui frecuente sentir falar, con esi o con otru nome, de la manu invisible. Ye una idega mui bien articulada por parte d'Adam Smith pa falamos de que la economía de mercáu autorregúlase y siempres algama equilibrios. Nel fondu ye una naturalización de les relaciones socioeconómiques, mui na llínia positivista del XVIII. Pero hai na estructura económica munches otres manos invisibles que nun son una metáfora nin un constructu ideolóxicu, sinón bien reales. El turismu que llega a un país como Asturies ye deldor d'una manu invisible: la del paisanu. El paisax nun ta ehí como Dios lu punxo nin ye una mera evolución de la naturaleza, sinón tamién el frutu d'una sociedá, d'una actividá humana. El nuesu paisax ye frutu d'un pueblu que lleva cientos d'años, miles seguramente, trabayando n'interrellación cola naturaleza. Asturies ye verde de praos lluminosos porque hai ganadería, porque se siega, porque hai pumaraes, porque se trabaya. Ya ye un paisax diversu porque cuerrespuende a una esplotación de policultivu. De nun ser asina, taríamos delantre d'una enorme estensión de matu y bardial tirando a pardusco ya intransitable. Esi paisanu, esa sociedá, esa manu invisible, tien qu'arrecibir una compensación porque la mayoría de los que se beneficien del turismu son particulares vinculaos a otros segmentos. De fechu, el turismu provoca problemes directos nel paisax, nel usu de recursos públicos y comunales, nel deterioru de víes pecuaries y de caleyes... Pero tamién provoca, o pué provocar, conflictos d'usu del espaciu de tribes estremaes. Por exemplu, en Somiedu, un procesu que yo siguiera dende los estudios previos a la declaración de parque natural ata'l presente, ya inclusu dirixendo la estupenda tesis doctoral que sobro l'asuntu presentó nel so día Xosé Alba, vese mui claramente. Ellí, el procesu de terciarización venceyáu al turismu supunxo una gran competencia polos edificios de les collaciones o del esterior de La Pola. Munches families vendieron cuadres, payares, bodegues, tolo que yera patrimoniu tradicional non protexíu, pa qu'abrieran bares, hoteles o apartamentos. Eso supunxo un desplazamientu, cuando non la desapaición, d'usos y actividaes agropecuaries. El que vendiera l'edificiu seguramente viose suficientemente recompensáu, pero non asina otros vecinos que lu alquilaben o lu llevaben a comuña ata esi momentu. Tamién esos cambios provocaron alteraciones notres custiones cuotidianes, como'l pasu'l ganáu o'l treslláu de bebederos y cebaderos a llugares más alloñaos de les viviendes. Tamién chigres-tienda pasaron a orientar la oferta a una demanda bien distinta de la llocal. Pues tolos que sufrieron eses perdes tienen que ser compensaos y pa eso un preciu, la ecotasa que llamen, furrula relativamente bien. Nel casu de Somiedu la solución fuera más fácile porque yá esistía una panoplia de compensaciones y aídes pol fechu de ser parque, pero esi nun ye'l casu del restu d'Asturies. Por eso un cobru al turista pué contribuir a un reequilibriu y a una valoración indirecta de lo que ta en pelligru porque, por desgracia, nesti modelu de nueso, lo que nun tien preciu acaba por nun esistir. Ya yo nun creyo qu'el turista mediu dexe de dir a Cuadonga o a Reres por tres euros o a Banduxu, Cuideiru o Penarronda por dos. Ye más, podría incluyise esa compensación notros precios como los d'aparcamientu o tresporte. Timanfaya ye ún de los parques más visitaos y, como por llei nun pueden cobrar por acceder, lo que faen ye que sólo ye posible percorrelu ensín baxar del autobús, de la guagua, colo que. indireutamente, tan cobrando pol accesu. 

M.S.: Entós, ¿podríamos falar de la posibilidá d'un turismu respetuosu col mediu ambiente, col paisax, cola cultura, coles tradiciones?

D.M.R.: Ye posible, evidentemente, y, amás, sedría un turismu muncho más rentable. Otra cosa ye l'ambición de les propuestes y la calidá de los instrumentos emplegaos. De fechu hai una montonera casos pel mundiu, dende pagar nos parques, como pasa en toa América, la del norte, la del centru y la del sur, ata poner un preciu a la entrada nun edificiu emblemáticu que, realmente, tien una finalidá más amplia que l'edificiu mesmu. Nun facer nada acaba al final col atractivu turísticu. Mire lo que ta pasando en Venecia. Hai un estudiu qu'amuesa que los alemanes que dexaron de dir de vacaciones al Mediterrániu español fixéronlo, mayoritariamente, pol deterioru. Pues esi deterioru, en parte, fue obra d'alemanes que pasaron ellí les sos vacaciones anteriormente. Si hubiere un preciu de compensación dende los años sesenta, igual les coses nun seríen les mesmes. En definitiva, ¿por qué pagar pa entrar na catedral d'Uviéu o nel Muséu de la Minería y non nel conxuntu urbanu de Llastres o nos tambayones d'Oneta? Hai esperiencies mui interesantes nos países nórdicos, Canadá, Nuea Zelanda, Irlanda o Alemaña, y tamién nel País Vascu ya en Navarra. Pa min son exemplares les iniciatives de Suiza y Austria. Conozo bastante bien les austriaques, especialmente les rellatives a la cultura vitivinícola. Y pienso que son esperiencies treslladables a Asturies, poles característiques naturales, el tipu población ya inclusive'l tamañu'l país.

M.S.: ¿Y sedría fácile aplicar n'Asturies una política d'eses característiques?

D.M.R.: Fácile, lo que ye fácile, nun hai cuásique nada. De manu hai que francer con inercies, mesmo alministratives que culturales, ya yá falemos de los turistes o de los mesmos naturales del país. Polo que cinca a l'alministración, un bon exemplu de lo que se ta faciendo y de lo que nun se ta faciendo ye qu'Asturies va arrecibir en breve unos 65 miyones d'euros procedentes de la Unión Europea pa, fundamentalmente, desestacionalizar el turismu y aumentar la so internacionalización. Eso ye una bona noticia, tanto no xeneral como pa les custiones de les que tamos falando. Pero, a un tiempu, el gobiernu asturianu piensa qu'el so modelu, el puestu en marcha en 1985, sigui siendo válidu. Y nesi modelu nun tan contemplaes midíes compensatories, sacantes les de tipu ambiental nos llugares protexíos por dalguna figura llegal preesistente. Pero ye que, de querer aplicar estes midíes, precios políticos de compensación a la población afeutada negativamente, Asturies tien nuna ventaxa notable: ye que ye un país pequeñu y, sacantes el centru, ye rural o de villes pequeñes, colo que cualisquiera intervención, si ta bien fecha, da frutos bien ceo. Amás tamos a tiempu de frenar la mala tendencia porque tovía falamos de puntos mui concretos y distantes unos d'otros. Porembargo, esa ventaxa vese afleutada por una custión social que pesa muncho: los paisanos nun valoren lo bastante nin el so llabor, más allá de la producción material pal mercáu, nin la importancia de lo que significa la so cultura pa un modelu de desendolcu. A ello podemos ameter que trátase la sociedá rural asturiana d'una sociedá mui poco dada a esperar, y menos arrecibir, nada de l'alministración, sacantes les aídes, polo xeneral europées subsectoriales, o ambientales si falamos d'un espaciu protexíu. Munches vegaes la xente nun sabe la potencialidá de lo que tien pente les manes, el poder y la capacidá colos que cuenta pa obtener recursos, pa incrementar la renta por facer, cenciellamente, lo que fae, lo que lleva faciendo dende siempres.

M.S.: Munches gracies David Rivas pola so aportación a esta campaña de "Turistes: Asturies nun ta en venta". Un saludu candial.


Entradas populares de este blog

"La oficialidá nun ye agresiva pa con naide"

Recepción solemne de Xuan Nel Gonzali como Repunante d'Honor