Presunción d'inocencia nel actu, enantes y dempués

 (El Fielato)

    Lo de Xuan Carlos I y les sos cuites cola xusticia española, dexando a un lláu los asuntos como talos, les posibles tipificaciones, aseméyase cada día más a un vodevil pal que los ciudadanos pagamos relixosamente al traviés de los impuestos. L'últimu movimientu fora que los lletraos de la so maxestá acusen a la fiscalía de conculcar la so presunción d'inocencia al sabese pola prensa que ve indicios de cuatru dellitos como comisionista internacional. Asina, a bote pronto, eso nun paez cosa ellegante. El ciudadanu-espeutador anda confusu y piensa nel cine negru porque la cosa suena mui d'eso, de cosa... nostra. ¿Dalguién se presentará nel lobby d'un hotel con una tarxeta de visita onde se llee comisionista internacional? Y, al sentase pa tomar un burbon, ¿apartará la chaqueta pa acomodar el revolver? Non, naide nun maxina al rei d'España d'estes traces nuna nueche americana.

    Pué quexase'l rei (lo d'eméritu ye una fatada qu'a saber a qué mente privilexao se-y ocurriera) de qu'el documentu de la fiscalía se filtrare a la prensa y pueden los sos lletraos desixir una investigación por si hubiere responsabilidaes de dalgún funcionariu. Ye lo único porque, por suerte, yá nun tamos en tiempos de perseguir a los periodistes que dan lluz a noticies como esta, por más que tampoco tean esos tiempos tan lloñe, como recordará cualisquiera que tenga diez años.

    El casu ye que trescendiera el conteníu de la petición qu'el ministeriu públicu unviara a Suiza, na que se detallen unos indicios de criminalidá. Eso ye lo que, pa los lletraos, ye la preba de que ta conculcándose la presunción d'inocencia. Pero l'asuntu ye que, si nun se consignen indicios d'acciones perseguibles, dengún país respondería. Eso quier dicir que detallar les prebes indiciaries ye imprescindible. De dar por válida l'argumentación de los lletraos de Xuan Carlos de Borbón, nunca se podría investigar a naide: si la policía tresllada indicios de criminalidá al xuez o la fiscalía los consigna nun autu yá taría vulnerada la presunción d'inocencia.

    Non, home, non. La presunción d'inocencia significa que naide nun ye culpiable cuando entra como acusáu a un xuiciu y que dengún tribunal puede declarar culpiable a naide ensín prebes. Pero eso nada tien que ver conque la policía o la fiscalía nun puedan aportar les sos investigaciones previes nes qu'alcontraren indicios de dellitu.

    Pero ye más: dengún contribuyente s'entera pela prensa o dende l'alministración de que van imputalu por irregularidá fiscal dientro d'unos díes, dándoi tiempu a regularizar la situación y nun incurrir en dellitu. Pues el rei fue avisáu dos vegaes y les dos con tiempu suficiente pa regularizar la situación ya evitar males mayores. ¿Tamién equí se conculcó la presunción d'inocencia pol fechu de que se supiera l'asuntu?

    Amás d'esta llínia defensiva pa enantes de la causa, tamién ta llevantada la llínia defensiva pa dempués de la causa: el rei carez manifiestamente d'imparcialidá porque, si resulta culpiable, eso van aprovechalo los republicanos, los nacionalistes y los antisistema. Entá nun hai noticies de los xudíos y de los masones pero, de momentu, meyor dir asustando a los xueces col caos que se podría desendolcar si los dellitos queden probaos y del qu'el culpiable sedría cualisquiera menos Xuan Carlos I.

    La verdá ye que'el trabayu de los lletraos de Xuan Carlos ye complicao. Ye un cliente mui difícile, un casu que pon a preba la calidá del abogáu, porque complicao resulta paecer inocente cuando abandones el territoriu del estáu que ta investigándote, pases a ser residente fiscal notru y, amás, da la casualidá de que yeras el rei, el xefe l'estáu del que marchaste. Y, pa enriba, el to fíu, el agora rei, diz que nun quier saber nada de lo que puede heredar y que ta en cuentes per esos mundios de Dios. 

    Shakespeare escribiera que "inquieta ta la cabeza de quien ciñe la corona".