Subir el salariu mínimu
(El Fielato)
Entamamos un cursu más col debate sobro'l salariu mínimu interprofesional, cola ministra Yolanda Díaz dimpuesta a dar la batalla, anque seya en solitario, pola so suba ya un PSOE esboligosu ya una patronal cerrada en banda contra cualisquier aumentu. La suba de 15 euros ye sobrodimensionao sistemáticamente, paeciendo qu'esi incrementu lleva poco menos qu'al colapsu sistémicu. Nesti sen, la posición de la patronal tien muncho d'ideolóxica y bastante poco que ver cola economía. Nun modelu competitivu, dizlo la mesma teoría económica convencional, neoclásica, l'incrementu salarial, non sólo nun perxudica al modelu, sinón que ye la condición básica pal crecimientu y, ente otres coses, elevar los beneficios. El salariu ye l'ellementu dinamizador más importante del sistema económicu y tien ser consideráu como una variable independiente, pola cenciella razón de que ye la única vía pela que'l trabayador consigue la so renta. Amás, nuna fase de crecimientu como l'actual ye bon momentu pa la meyora salarial.
El problema ye que na CEOE tienen munchu pesu aquellos sectores que lleven dende hai tiempu basando la so viabilidá na precariedá llaboral y los sueldos baxos, como única estratexa competitiva, mientres que les empreses más innovadores y actives na so adaptación dinámica a los cambios nun presenten dengún interés en participar nel debate, precisamente pa evitar una discusión ideolóxica que consideren una perda de tiempu.
La CEOE pudo apautar, nos asuntos llaborales de les discusiones sobro transición económica y medioambiental pal trieniu 2020-23, les bases pa un crecimientu salarial. ¿Por qué nun lo fixo? L'añu 2003 ye ellectoral y, polo tanto, bon momentu pa falar de subes dende les files del PSOE. ¿Ta reconociendo la patronal que l'asuntu nun tien importancia, o ye que dexa les coses al albur de les contradicciones socialistes, especialmente pola reiterada posición de la ministra Calviño, favorable a la conxelación del salariu mínimu? Escontra esta posición, ¿quedaría sola la ministrra Díaz, d'Izquierda Unida, y de cierta sintonía con Garamendi, un presidente empresarial non mui bien vistu pol Partíu Popular?
Dende l'otru lláu tamién arrecien les crítiques a Díaz. Arguméntase que los trabayadores que cobren el salariu mínimu son pocos y que, amás, la mayoría tien contratos temporales y de poques hores, colo que nun llega nin a esi salariu mínimu. Pero, siendo verdá esto, el salariu mínimu ye'l baremu sobro'l que se discuten la mayor parte los convenios, colo que la so suba influi directamente na meyora salarial xeneral. De la mesma manera, dalgunos rubros de la política social dependen d'esti salariu mínimu, con requisitos como, por exemplu, tener menos ingresos de equis vegaes esi salariu pa solicitar aída de vivienda, beques escolares, atención a la dependencia..., colo que, a mayor salariu mínimu, más posibilidaes de renta non salarial.
Tamién faen-y mofa a la ministra pola so propuesta: "con esos 15 euros voi cambiar la bicicleta por un BMW, nosotros dos vamos comprar una vivienda, yo voy comprar un cintu para poder apertalu, en casa vamos poner la llavadora un día más al mes...". Pero les coses nun se miden asina. Quince euros pueden significar dir a la peluquería cada dos menses envede cada cincu, o comprar unes chuletes de xata roxa un par de fines de selmana, o dir tomar unos culinos dos díes al mes y non unu... Y con eso, anque namás que lo fixeran cien mil asturianos, taríamos falando de un miyón y mediu d'euros na economía circular, nel comerciu de proximidá, acelerando los multiplicadores de renta y d'emplegu.
